Vanden gedinge dat geweest heeft inde banc voir meye(r) ende/ scepen(en) van loven(e) tusschen henr(icke) van thiene(n) als p(ro)cur(eur) katlijne(n)/ sholland(er)s docht(er) henr(ix) de hollande(re) t(er) eende(r) en(de) den selve(n)/ henr(icke) hue(re)n vader t(er) ander(er) sijden Aldair de voirs(creven) p(ro)cur(eur) dede/ lesen eene deylinge tusschen hue(re)n voirs(creven) vad(er) t(er) eend(er) ende/ der selver katlijne(n) en(de) johanne(n) huer(er) sust(er) t(er) ander(er) vand(er) daet/ des tweeste(n) daighs januarii a(n)no xiiii[c] lxxvi d(aer) mede/ den selve(n) gesuste(re)n gedaen yerst uute(n) broode van hue(re)n voirs(creven)/ vad(er) in behoirlijcker manie(re)n gevallen sijn div(er)se p(or)ceelen van/ goede(n) d(aer) de vader sond(er) dair inne gereserveert te hebben(e) e(n)nige/ tocht behoirlijc en(de) halmelijc gerenu(n)cieert hadde tot sijnd(er) dochte(re)n/ behoef En(de) d(aer)entinden dede de selve p(ro)cur(eur) seggen hoe de selve/ vader bove(n) en(de) in (contra)rien vand(er) selver deylinge(n) en(de) renu(n)ciatien/ der voirs(creven) katlijne(n) voirgehoude(n) hadde en(de) noch hielt hue(r)/ kintsgedeelte vande(n) selve(n) aengedeylden goede(n) dat gebruycken(de)/ en(de) besitten(de) en(de) sijn p(ro)uffit d(aer) mede doen(de) gelijc oft d(aer)aff gheen/ deylinge oft renu(n)ciatie en wae(re) geschiet En(de) alsoe hadde/ de selve p(ro)cur(eur) hem mette(n) hee(re) sijn hande d(aer)aff doen lichten/ hopen(de) voir sijn (con)clusie dat de selve henr(ick) d(aer)aff sculdich/ soude sijn te scheyden en(de) die d(er) selv(er) sijnd(er) docht(er) die te vaste/ en(de) te vreke ghinck tot huer(er) bijleni(n)gen en(de) nootdorften/ behoef te laten volgen hem des getroesten(de) totte(n) rechte/ te voirde(r) want zij geloofde en(de) p(rese)nteerde die niet/ te v(er)sette(n) te v(er)thie(re)n noch te belasten e(m)mer soe langhe sij/ ongehoudt en(de) in huers vaders brood wae(r) ten wae(re) in/ nootlijcken saken bij raide weten(de) en(de) (con)sente vander stadt/ oft van hue(re)n naisten vrinden D(aer) tegen de voirs(creven) henrick/ de (contra)rie sustine(re)nde bij div(er)sen reden(en) namelijc al mochte/ sijn docht(er) voirs(creven) int stuck vand(er) voirs(creven) deylinge(n) en(de) v(er)thidinge(n)/ uut sijne(n) broode gedaen sijn geweest dat d(aer) om niet en/ volchde dat zij van dien goede(n) soe langhe sij ongebonde(n)/ wae(r) oft and(er)s in sijnen broode e(n)nich bewint vanden/ selven aengedeylden goeden oft hue(r) gedeelte va(n) dien sculd(ich)
//
wae(r) te hebben Hij dede oic seggen hoe hij beyde sijn dochte(re)n/ besorcht hadde in een eerlic cloeste(r) dair hij groote(n) cost en(de)/ last mede gehadt hadde en(de) dair toe sij huer niet en hadde/ willen geven mair meer geneycht wae(r) tot oneerbae(re)n leven(en)/ en(de) soude sij dan bewint van e(n)nige(n) goede(n) hebben dat soude/ sij moege(n) onnuttelijc en(de) oneerbaerlijck ov(er)bringe(n) Hij p(rese)nteerde/ eve(n)verre sij huer droege als een goet kint sculdich wae(r) te/ doen(e) hem wed(er)om in huer te q(ui)ten als een goet vad(er) met/

div(er)sen altricatien dair tegen de voirs(creven) p(ro)cur(eur) replice(re)nde en(de)/ de vad(er) duplice(re)nde met div(er)sen altricatien Soe v(er)re dat/ scepen(en) van loven(e) t(er) manissen smeyers gewijst hebben voir een/ vo(n)nisse dat der voirs(creven) katlijne(n) volgen sal huer gedeelte vande(n)/ goeden nae uutwijsen der deylinge(n) opde p(rese)ntacie bij huer/ gedaen in sca(m)pno cor(am) om(n)ib(us) scabinis decembr(is) xvi