Nae dien dat op hede(n) bijden raide vand(er) stadt geco(m)par(er)t /sijn willem helsscheviers t(er) eende(r) geven(de) aldair te kynne(n)/hoe dat hij en(de) sijn weerdy(n)ne over een jaer ende meer /gehouden hadden een jonck kint geheeten ruelken toebehoiren(de)/clase van velpe die noch een ander hadde dwelck oic bescaet/was bij machielen oliviers geheeten meriken van desselfs
//
claes yersten bedde van welken kynde(re)n wegen sij niet v(er)nueght/en worden bij den vader noch ande(re) p(er)soenen dair voe(r) sij aen he(m)/bescaet wae(re)n bezundert vanden voirs(creven) clase den vader die he(m) afhendich/ende vluchtich hielde buyten des(er) stadt tot ande(r) plecken en(de) plaetsen/dairt he(m) beliefde sonder oic bij zijnder tweest(er) huysvrouwe(n) tegewordich/te sitten(e) Bege(re)nde alsoe dat de naeste vrienden vanden selven kynde(re)n/van svaders wegen te weten(e) peet(er) rogghe en(de) machiel oliviers voirs(creven)/als mo(m)boirs van hue(re)n huysvrouwen he(m) d(air)af genoech deden en(de) tvoirs(creven)/kint dwelc hij hielt te he(m)wert namen om dair mede bij hen gedaen te/wordden(e) soe hue(re)n raet als naeste vriende gedragen soude want sij/nyemant anders naerd(er) en wisten aen te spreken noch den last van/dien te bevelen dair hen als de naeste vanden selven kynde(re)n dair/tegen de voirs(creven) p(er)soenen t(er) ande(re) zijden met he(re)n henricke van velpe/prieste(re) ende religieux des godshuys vanden p(re)dicke(re)n te loeven(en)/compa(rer)ende bijden selven raide hebben geseet ende besund(er)t de voirs(creven)/h(er) henr(ic) al mocht hij oem sijn vanden voirs(creven) kynde(re)n nochtan en stont/he(m) als religieux soe de hee(re) wete(n) mochte gheene(n) last van dien aen/te neme(n) noch en behoirde ende de voirs(creven) ande(re) weerlike magen en(de)/vriende(n) seyden hoe dat sij last genoech hadde(n) met huersselfs/kynde(re)n ende dat d(air) e(n)nige rinten wae(re)n den selve(n) kynde(re)n als/proprietar(is) v(er)schenen en(de) gelate(n) bij janne wijlen van velpe goutsmet/d(air)af de jairlijcssche betalinge yerst v(er)schinen sal ende inne gaen/te s(in)t jansmisse naestcomen(de) te weten(e) van eenen rinssche(n) guld(en)/en(de) xv stuv(er)s d(air) inne de selve kynde(re)n gericht sulle(n) sijn ende dat/dair oic wae(re)n twee rijd(er)s erflijc opden eemer d(air) inne lijsbeth/lyemi(n)cx hue(re) tocht heeft welke rinten men soude moegen/oft dactien van dien soe v(er)re sij den kynde(re)n compete(re)n of/toebehoe(re)n moegen mett(er) voirs(creven) tocht(er)sen consente vercoepe(n) bij/bij aggreacien vand(er) stadt om de selve(n) kynde(re)n d(air) mede te hulpen(e)/en(de) die te bekee(re)n in lijfpens(ien) ende betalinge(n) der lasten voirs(creven)/ende dat de stadt d(air) inne v(er)vangen soude moege(n) en(de) staen/inde stadt vanden vader der voirs(creven) kynde(re)n de tocht hier in inne/hebben(de) en(de) dien in desen v(er)vaen mits sijnen sobe(re)n regimente(n)/dwelc hij hielt als elckermalc weten en(de) sien mochte ende/oic want hij de selve sijn kynde(re)n laet ombesorcht als vader/van dien soe dat blijct hopen(de) dat dat naird(er) sculdich wae(re)
//
te gescien(e) en(de) dat de stadt d(air) op doogen hebben soude om dit te/moegen doen ten ynde dat sij ongelast bliven souden vande(n) selven/kynde(re)n en(de) dat die met hue(re)n goed(en) gehouden souden worden/Es geaviseert en(de) uutgesproken bijder wet h(ier) op gelet sijnde en(de)/get(er)mineert t(er) besorgenissen vande(n) voirs(creven) kynde(re)n bij consente en(de)/ov(er)geven d(er) voirs(creven) wed(uwe) aengaen(de) de voirs(creven) twee rijders erflijc/datmen die rinten en(de) oic ande(re) goe rinte(n) oft goede(n) d(air) de kynde(re)/en(de) hue(re) vader als tocht(er) inne gericht soude(n) moegen wesen v(er)coepen sal/op dats behoeft om die pe(n)ni(n)gen in lijfpensien bekeert te worden(e)/tot behoef d(er) selv(er) kynde(re)n ende oick om de gevallen(e) sculden en(de)/lasten d(er) selv(er) te betalen en(de) te cuelen(e) ende oic om de selve voirtane/tond(er)houden(e) want jonge wesen ende ombeiaerde kynde(re)n sijn/en(de) d(air) inne voirts kee(re)n dmeeste proufit d(er) selv(er) Behalve(n) dat d(er) /voirs(creven) lijsbette(n) hue(ren) duerdach langhe besorcht sullen wordde(n)/vande(n) pe(n)ni(n)gen comen(de) vande(n) voirs(creven) twee rijd(er)s erflijck twee rijd(er)s/tsjaers ende om de vesticheyt ende sekerheyt p(ar)tien in desen/te doen(e) soe sullen de vrienden uut crachte van desen metten/borgemeeste(re)n als in desen v(er)vangen(de) en(de) staende inde stat/vanden tochtene(re) ende vad(er) voirs(creven) de guedinge doen en(de)/partien dair van genoech sijn sond(er) uut saken van desen/in toecomen(de) tijden e(n)nigen last d(air)af te hebben(e) in des wettelijc/alsoe bij he(m) gedaen sal wesen Actu(m) in consilio opidi aug(usti)/xiiii/