Vand(en) questien gecome(n) voe(r) meye(re) ende scepen(en) van loven(e)/ inde banck tusschen reyne(re)n vand(er) bauetten t(er) eenre ende/ mathieu de tilloix verweerde(r) t(er) ande(r) zijden als van zeke(re)n/ pe(n)ningen die de voirs(creven) mathieu getogen ende gehave(n) hadde/ van reyne(re)n voirs(creven) t(er) so(m)men van xl clinckarde(n) te xiiii stuv(er)s/ den clinckart tot behoef van twee rinsgulden(en) erffelijck den d(enieren)/ xviii t(er) quiti(n)gen die hij hem gegoet soude hebbe(n) en(de) bevesticht/ op zeke(re) huysen staende doen t(er) tijt inden dorpe oft vrijh(eit)/ van wave(r) welke huysen naed(er) hant mits der orloge(n) afgebra(n)t/ wa(r)en ende den pant alsoe geargert dat hen dien niet/ genoech wesen en mochte Versueken(de) alsoe sijn pe(n)ningen/ wed(er) te hebben(e) die mathieu voirs(creven) getogen hadde en(de) den/ selve(n) mathieu met rechte dairtoe bedwongen te wordden(e)/ Dairtegen de voirs(creven) mathieu sustineerde dat hij hem de/ guedinge doende opd(en) pant ende huysen doen t(er) tijt/ genoempt dat hij d(air)mede gestaen soude te voirde(r) want/ reyne(r) de guedi(n)ge niet en hadde wille(n) ontfange(n) voir/ de orloge als hij hem p(rese)nteerde soe hij seydt guedinge te/ doene hem d(air)af deylen(de) den eedt Seggen(de) oic dat hij/ alsnu de goede(n) opgedrage(n) hadde inde handen vanden/ hee(re) om reyne(re)n genoech te zijne vanden twee rinsgulden(en)/ voirs(creven) Hopende d(air)mede te gestaene zonder de pe(n)ni(n)g(en)/ weder te dorve(n) ke(r)en Dairop de voirs(creven) reyne(r) r(e)plice(re)nde/ sustineerde de (contra)rie p(rese)nte(re)nde zijne(n) eedt te doene dat
//
hij hem noyt voe(r) de orloghe weygeri(n)ge gedaen en/ hadde dan nae d(en) tijt vand(en) orlogen en(de) afbernen(e) der/ zelv(er) huyse(n) ende al mocht hij nu de goede(n) opgedrage(n)/ hebbe(n) dat dat niet genoech en wae(r) aengesien dat/ den gront geergert was ende niet genoech voir sijn/ rinte(n) als voe(r) met meer woirde(n) bij hen ten ynde/ als voe(r) in wed(er)sijden gealligeert Als dat scepen(en)/ der sake(n) gemaent wesende bijde(n) meye(re) de selve stelde(n)/ in handen vand(er) stadt ende relacie aldair gebuert/ sijnde inden vollen raide ende op al in wed(er)sijd(en) gelet/ es den selve(n) p(ar)tien uutgesproke(n) ende get(er)mineert/ voir recht dat den voirs(creven) reyne(r) vand(en) bauetten/ doende sijne(n) gep(rese)nteerden eedt voirs(creven) bij hem ov(er)/ genomen volgen sulle(n) en(de) in dien betaelt werd(en)/ bij zijnd(er) wed(er)p(ar)tien de pe(n)ni(n)gen bijd(en) selv(er) zijnd(er)/ wed(er)p(ar)tien getogen te weten(e) de voirs(creven) xl clinckarts/ in alsulker werden als mathieu de tilloix die/ ontfinck zonder e(n)nige rinten d(air)af te betalen(e) en(de)/ zonder oic de guedi(n)gen vanden panden ende/ goede(n) dair questie af es te dorve(n) aenveerde(n) welke/ xl clinckarde(n) betaelt sulle(n) werde(n) als bove(n) bij/ mathieuse voirs(creven) tussche(n) dit ende de naeste/ feeste ende jairmerct van wave(r) naistcomen(de)/ nae loven(e) kermesse In cons(ili)[o] opidi maii xxvi