Nae dien dat in questien comen sijn bijden raide vand(er)/ stadt berbele truydens aenleggersse t(er) eenre ende de/ werdi(n)ne jans wile(n) amelrijcx geheeten papeghey t(er)/ ande(r) zijde(n) aldair de voirs(creven) berbele te kennen gaf/ hoe zij omtrint vastelavont vergadert hadde geweest/ met janne als hij noch in wesen(de) was dair zeke(re) goede/ ma(n)nen bij wa(r)en dair zijs huer toe gedroech Ald(air) de/ selve wile(n) jan begeerde amelricx begeerde dat zij hue(r)/ hande lichte(n) woude(n) vanden goeden toebehoiren(de) wile(n)/ gheerde vanden panhuyse die de selve berbele alhier/ met rastamente voir meye(re) ende scepen(en) uutgewonne(n)/ hadde voir xi rinssche gulden(en) drie stuv(er)s dairaf gheert/ voirs(creven) te huerwert gehoude(n) was hij soude huer betale(n)/ de voirs(creven) so(m)me die zij tacht(er) mocht wesen ende dat/ alsdoen zij d(air)mede te vrede(n) sijnde ende lichten(de) huer/ hant vand(en) coe ende van allen ande(re)n goede(n) den selve(n)/ wilen gheerde toebehoirende D(air)op zij gep(ro)cedeert hadde/ ende die uutgewonne(n) met vonnessen voir scepen(en)/ alhier gesloten werdt dat de voirs(creven) jan wile(n)/ amelricx huer de voirs(creven) scult betale(n) soude binne(n) den/ tijde van beloken(en) paessche(n) doen naistcomende/ seggen(de) wair zij dat gethoene(n) conste dat de voirs(creven)/ wed(uwe) huer opleggen ende betalen soude deselve/ ende dair toe met rechte bedwongen wordde(n)/ Dair tegen de voirs(creven) weduwe ontkennen(de) genoech/ int geheele tvoirneme(n) vand(en) voirs(creven) berbele(n) heeft/ gesustineert de co(n)trarie te voirde(r) wantmen tselve/ alsoe niet bevi(n)den en soude ende nae dien dat/ de voirs(creven) berbele tot hue(re)n thoene gewesen sijnde/ bevonden wert bij deposicien van goeden ma(n)nen/ dairop gehoort de voirs(creven) sake genoech gesciet/ als zij bij geleet hadde(n) en(de) dat jan wile(n) amelricx
//
sijn schult d(air)af genoech gemaect hadde ende geloeft/ te betalen(e) te beloken(en) paessche(n) lestlede(n) de voirs(creven) so(m)me/ als dat den rechte genoech mocht wese(n) Soe es bijd(en)/ wet uutgesproken ende get(er)mineert voir recht dat/ de voirs(creven) weduwe amelrijcx sculdich sal sijn de voirs(creven)/ berbele(n) te betalen(e) ende uuyt te reycken(e) de voirs(creven)/ so(m)me van xi rinsgul(den) drie stuv(er)s bij huer geeyscht In cons(ili)[o] opidi maii xxviii