Opde calangie die walterus braecma(n) als geleydt nae/ des(er) stadt recht totten goede(n) colijns de rouchijn voirt/ gestelt heeft op ende tege(n) machielen oliviers vetwarier/ dair soe de selve walterus op dede zeke(re) goede vande(n)/ selve(n) goeden colijn gevlucht wa(r)en tusschen dach ende/ nacht naist den huyse desselfs machiels inde dorpstrate/ Sustine(re)nde de selve walterus wantmen bevi(n)den/ soude dat de selve machiel behulp totter selv(er) vluchti(n)gen/ gedaen hadden als de selve colijn geruymt was met sijnd(er)/ huysvrouwen dat de selve machiel gehoude(n) soude sijn/ hem bij eede te verclarene de stucke(n) ende p(er)ceele(n) die/ hij als voe(r) gevlucht hadde en(de) hulpe(n) vluchte(n) ten ynde/ dat hem ende zijne(n) beleyde tot zijnd(er) wettig(er) sculde(n)/ behoef die in betali(n)gen mochten comen hopen(de) dat/ dat alsoe behoirde Dairtege(n) de voirs(creven) machiel/ antwerden(de) dede seggen dat de voirs(creven) walterus/ sculdich soude sijn selve de p(er)ceele(n) te vercle(re)n en(de) te/ bewijse(n) die hij meynde bijden selven machiele/ oft zijne(n) behulpe geruymt te zijne met meer
//
woirden in wed(er)sijde(n) gealligeert Es gewesen bij vo(n)nesse/ der scepen(en) t(er) manissen smeyers dat de voirs(creven) machiel/ cle(re)n sal bij eede de goede bij hem ende zijne(n) weten(de) en(de)/ behulpe uut des voirs(creven) colijns huyse inden voirs(creven) huyse/ ald(er)naest des voirs(creven) machiels gedaen oft gedrage(n) In scampno/ cor(am) absoloens h(er)meys hove nausnyde(re) scabinis junii t(er)cia