Want jan hubrechts als geleydt nae des(er) stadt/ recht voir sijn wettich gebreck uuyt crachte van/ scepen(en) brieve(n) van loven(e) tot allen den goeden/ beyde have en(de) erve jans van nyvele en(de) henricx/ wijle(n) cordewaens geheeten opde hulst soe wair/ die gelegen sijn hem met brieve(n) van des(er) stadt/ gescreve(n) aenden meye(r) van cumptich oft zijne(n)/ stadhoude(r) te bynckem Alle deselve goede behoirlijck/ heeft doen leve(re)n en(de) den voirs(creven) ja(n)ne van nyvele/ en(de) der weduwen des voirs(creven) wijlen henricx/ cordewaens dach van rechte te compare(re)n inde/ banck voir meye(r) en(de) scepen(en) van loven(e) doen besceyde(n)/ oft zij hen dair tegen hadden willen oppone(re)n/ Aldair zij op heden als ten verstreken(en) daige/ nyet gecompareert en zijn noch procur(eur) van hue(re)n/ wegen den voirs(creven) geleydden altijt compare(re)nde/ en(de) trecht voirt versueken(de) Soe v(er)re dat de/ scepen(en) van loven(e) t(er) manissen smeyers nae dat/ hen bij rappoirte giel(ijs) eveloghe des(er) stadt bode/ behoirlijck gebleken heeft de voirs(creven) leveringhe/ en(de) dach besceydinge gesciet te sijne gewesen/ hebben voir een vonnesse wair de wed(er)p(ar)tie/ des voirs(creven) geleydden niet en compareert ten/ opstaen(e) smeyers en(de) d(er) scepen(en) datme(n) den selve(n)/ geleydden houd(en) soude inde macht van sijne(n)/ beleyde scepen(en) brieve(n) en(de) leveringe(n) alsoe v(er)re/ alst noch voir scep(enen) come(n) es In scampno febr(uarii) xii