Item peter van kersbeke sloetmake(r) in deen zijde en(de)/ katlijne chybels docht(er) wijlen pet(er)s chybels inden name/ van huer selve(n) ende van wegen aliten cybels hue(re)r suster/ nu absent zijnde die zij hier toe geloeft heeft te v(er)vangen/ t(er) and(er) zijd(en) in p(rese)ntia hebben gekint ende gelijct voir/ hen en(de) hue(re)n erven ende nacomelingen dat zij met/ malca(n)de(re)n overcomen ende eensworden zijn aengaende beyde/ der selv(er) p(ar)tien huysen ende goeden aen een gelegen/ inde borch strate tussche(n) de goede gielis van caverchon/ in deen zijde ende de goede jacops ouderogge/ in dander der poenten en(de) erfvorw(er)den naebescreve(n)/ die de selve p(ar)tien in wed(er)sijden malcande(re)n geloeft hebbe(n)/ vast gestentich ende van werden te houden en(de) o(n)v(er)brekelijc/ / tacht(er)volgen(e) ende te voldoene tot eeuwigen dagen/ Ende yerst dat de voirs(creven) pet(er) van kersbeke de plaetsse/ vand(er) goten beneden t(er) eerden liggen(de) tusschen beyde huyse(n)/ der voirs(creven) p(ar)tien sal moegen te hemwerts nemen tot aent/ fundame(n)t vand(er) voirs(creven) gesuste(re)n huyse(n) soe v(er)re tvorste/ huys der selv(er) gesuste(re)n hem acht(er)weerts bestrect ende/ dat hij d(aer)op sal doen setten ende metsen eene(n) nyeuwe(n)/ steynen(en) mueer wel ende werckelijc gewracht ende/ dat de selve peeter om dat te doene sal doen/ schoren thuys der voirs(creven) gesuste(re)n ende den gevelwant/ van dien doen schoren thuys der voirs(creven) gesuste(re)n en/ afbreken en(de) de ty(m)meringe vand(er) selv(er) gesuste(re)n/ huyse van onder tot boven int maken vand(en) voirs(creven)/ muere inden selve(n) muer wel ende werckelijck ontfa(n)gen/ allessins sonder cost oft last der voirs(creven) gesuste(re)n ende/ dat de selve pet(er) van kersbeke dwater dat vand(en)/ voirs(creven) gesuste(re)n acht(er)sten huyse en(de) erve(n) sijne(n) doerganck/ en(de) afloop pleegh te hebben(e) doer de voirs(creven) gote/ t(er) eerden liggen(de) tussche(n) beyde de huyse(n) voirs(creven)/ sculdich sal sijn van nu voirtane t(er) straten uuyt/ te leyden doer zijn erve het zij onder den voirs(creven)/ muer met eender gehouwender goten oft bynnen/ den huyse desselfs pet(er)s aenden muer die(n) ald(aer)/ gemaect sal wordden als voe(r) Item es voirt in/ erfvorwerden ond(er)sproken tussche(n) de voirs(creven) p(ar)tien/ dat de voirs(creven) peter van kersbeke onder den osydrup/ vand(en) voirs(creven) gesuste(re)n huyse aenden voirs(creven) muer/ sculdich sal zijn te leggen ende wel ende werckelijc/ maken een looten gote van achter tot voe(r) t(er) straten/ om dwater vand(er) daken van beyden p(ar)tien huyse(n)/ comen(de) dair inne tontfangen ende dair doere/ sijne(n) afloop te nemen(e) voe(r) t(er) straten uuyt ende/ dat oic de selve peet(er) en(de) sijn nacomelingen/ possesseurs ende besitters van sijne(n) huyse/ voirs(creven) sculdich sullen sijn tot eeuwigen dagen/ tot hue(re)n laste tonderhouden(e) den voirs(creven) muer/ / ende de looten gote voirs(creven) sonder cost oft last/ vanden voirs(creven) gesuste(re)n oft hue(re)n nacomelinghe(n)/ besitters van hue(re)n huyse voirs(creven) ende dit ov(er)mits/ eene seke(r) so(m)me van pe(n)ni(n)gen die de voirs(creven) peter/ van kersbeke vanden selven gesuste(re)n d(aer)voe(r) bekint/ heeft gehadt ende ontfangen te hebben(e) die/

de voirs(creven) pet(er) It(em) es oic bevorw(er)t oft gebuerde/ dat de voirs(creven) gesuste(re)n oft hue(r) nacomelingen/ besitters van hue(re)n huyse voirs(creven) tselve hue(r)/ huys naemaels opty(m)me(re)n oft anderssins rep(ar)e(re)n/ wouden van ouden oft nyeuwe(n) wercke dwelck/ zij doen sullen moegen [talle(n) tijd(en) alst hen geliefte(n)] dat zij alle de selve hue(r)/ ty(m)meri(n)gen sullen moegen vesten ende ty(m)me(re)n/ inden muer voirs(creven) behoudeliken dien oft de voirs(creven)/ gesuste(re)n oft hue(r) nacomelingen tseve hue(r) huys/ hoeg(er) ty(m)me(re)n wouden ende [d(at)] de voirs(creven) gote alsoe/ hoeghe(r) geleeght soude moten wordden dat de/ selve gesuste(re)n oft hue(r) nacomeling(en) possesseurs/ en(de) besitters van hue(re)n huyse voirs(creven) therleggen/ vand(er) selver goten sculdich souden zijn te becostigen(e)/ sonder cost oft last des voirs(creven) pet(er)s mair die alsoe/ h(er)leet zijnde sal de voirs(creven) peeter en(de) sijn nacomeli(n)g(en)/ die sculdich zijn van dan voirtane tonderhouden(e)/ tot sijne(n) coste alleene gelijck voe(r) en(de) soe hij doen/ moet ende sculdich es van doene soe v(er)re/ die niet herleet en wordde gelijc voirs(creven) es/ Item es oick bevorwert dat de voirs(creven) peeter/ sculdich sal zijn alsnu wel ende loffelijck te/ rep(ar)e(re)n tot sijne(n) coste alleene allet ghene/ dat hij om den voirs(creven) muer te maken(e) ende/ sijn huys anderssins te r(e)p(ar)eren aender voirs(creven)/ gesuste(re)n huys e(n)nichssins gebroken mach/ hebben cor(am) buets(ele) bouch(out) junii xviii