Vanden questien ende gescillen uuytstaen(de) tusschen/ he(re)n diericke le begge ridde(r) aenlegge(r) t(er) eenre/ en(de) robrechte van hoeye verweerde(r) t(er) and(er) zijden/ aengaende alsulken heyssche en(de) voldoeni(n)g(en) als de/ selve h(er) dierick den voirg(enoemde) robb(er)de eysschen(de) is/ van twee mudde(n) corens erffelijc die robb(er)t wijlen/ van hoeye zijn vader in zijne(n) leven(e) soe de selve/ h(er) dierick seeght v(er)cocht hadde op seke(re) goede wijle(n)/ toebehoiren(de) janne jaron met al des dien aencleeft/ hebben hen de selve p(ar)tien vanden selve(n) hue(re)n/ gescillen gesubmitteert ende v(er)bonden in segers van/ rechte Te weten(e) de voirs(creven) h(er) dierick in joh(ann)em/ vasont en(de) de voirg(enoemde) robb(er)t in meeste(re)n barth(olomeeus)/ kyp secretar(is) der stadt van loeven(e) in sulker vuege(n)/ dat de voirs(creven) h(er) dierick zijne(n) heysch d(air) af in gesc(ri)fte/ doen sal en(de) ov(er)geven bynnen xiiii nachten naistc(omende)/ om den selve(n) robb(er)de d(air) af cop(ie) te moegen hebbe(n)/ en(de) d(air)entinden bynnen xv daigen d(air) nae de(n) selve(n)/ robb(er)d(e) d(air) op te moegen antw(or)d(en) en(de) de selve gesc(ri)fte(n)/ en(de) p(ar)tien gescillen ov(er) hebben(de) sullen de selve segg(er)s/ die nae recht verlijken opdat zij co(n)nen en(de) moegen
//
oft and(er)s de selve p(ar)tien gescillen met des dien/ aencleven mach soe v(er)re p(ar)tien dat in hen hand(en)/ ov(er)bracht sullen hebben ov(er)bringen in handen van/ scepen(en) van loeven(e) [om] bynnen den selven xl daig(en)/ d(air)af leeri(n)gen en(de) vo(n)nisse te hebben(e) nae recht/ Promitt(entes) rat(um) renu(n)c(iantes) hinc inde sub pena cause/ cor(am) buets(ele) bouchout junii xviii