Vand(er) saken gecomen bijden raide vand(er) stadt/ tusschen janne blanckart inde(n) name van/ zijnd(er) huysvr(ouwe) ae(n)legge(r) t(er) eenre ende ja(n)ne/ dela sales geheete(n) seign(eu)r ales verweerde(r)/ t(er) ande(r) zijden die eene wile tijts dair/ te voe(re)n gehange(n) heeft ende gehandelt es/ geweest voe(r) meye(r) en(de) scepen(en) der zelv(er) stadt es op al int langhe rijpelic geledt zijnde/ des bijde(n) selve(n) p(ar)tien geseet geproponeert/ geexhibeert ende gethoent es geweest/ uutgesproken ende get(er)mineert voir recht/ bijden selve(n) raide dat de voirs(creven) jan dela/ sales den voirs(creven) ja(n)ne blanckart sculdich/ zal zijn sijn huwelike vorweerde te/ voldoene nae inhoudt zijnd(er) scepen(en) brieven/ van loeven(e) oft dat den selve(n) ja(n)ne bla(n)ckart
//
de gelev(er)de goede dair voe(r) volgen zulle(n) tott(er)/ tijt dat den selven janne blanckart bij daneele/ van glymes zijnen zwager behoirlike vesticheit/ vanden vijftich rinsgulden(en) d(aer) questie af es gesciet/ zal zijn alzoe wel vande(n) goeden van loeven(e)/ ende voe(r) wet van loeven(e) als den selve(n) janne/ blanckart bij zijne(n) swag(er) voirs(creven) vande(n) goeden/ van beveke(m) ende doirne gesciet mach zijn/ nae inhoudt den besceyde d(air)aff wesende/ gesciet ende gedaen inde(n) raide voirs(creven) t(er)/ p(rese)ntien van janne van buetsele borgermeester/ henr(icke) va(n)d(er) borch ja(n)ne va(n) roesme(re) ende jor(ijse)/ hubrechts scepen(en) he(re)n mach(iele) absoloe(n)s ridde(r)/ roel(ove) lombart lod(ewijcke) vand(er) borch ja(n)ne oliviers/ willem(me) va(n) raveschote janne va(n)de(n) vekene/ gheerde zeels willem(me) tybe symoen(e) h(er)mans/ janne halleman ende (christ)iane de longhe/ gesworen(en) raidt junii xvii