Item joes van oerbeke de jonge en(de) jouffr(ouwe) katlijne/ van brakele sijn huysvr(ouwe) wettige docht(er) g(er)lecx wijle(n)/ van brakele t(er) eenre en(de) jan scat als man en(de) mo(m)boir/ ka(tlij)[ne(n)] van brakele natuerlijcke docht(er) des voirs(creven) g(er)lecx/ van brakele inden name van he(n) selven en(de) in des(er)/ verva(n)gen(de) ende op hen nemen(de) hue(r) kinde(re) die zij/ nu hebben oft namaels tsame(n) vercrijge(n) mochten/ t(er) ande(re) in p(rese)ntia hebben gekint en(de) gelijdt voe(r)/ he(n) ende hue(re)n nac(omelingen) dat [zij] om t(er) ned(er) te leggen(e)/ alsulke questie(n) ende diffe(re)ntien wesen(de) tussche(n) de/ voirs(creven) p(ar)tien uut saken vanden erfrinten en(de) den/ erfbrieve(n) van xii dobbel mottoen(en) sjaers staende/ op seke(r) goede des he(re)n van geldrop nae/ / uutwijsen(en) vanden selven brieve d(aer)inne de voirs(creven)/ wijlen g(er)leeck van brakele opten xxvii dach maii/ a(n)no xiiii[c] negentich voe(r) scepen(en) van shertogen bossche/ gegoet heeft vrancken van langel tot behoef der/ voirs(creven) katlijne(n) van brakele natuerl(ijc) docht(er) des voirs(creven)/ g(er)leecx uten twintich gelijcken mottoen(en) erffel(ijc) die/ de selve g(er)lec met eene(n) oude(n) scepen(en) br(ieve) vanden/ bossche heffen(de) was opde voirs(creven) goede she(re)n van/ geldrop nae uutwijsen(en) desselfs veraccordeert/ en(de) eensworrden zijn der poenten ende conditien/ h(ier)nae bescreven die zij malcande(re)n in w(er)sijden geloeft/ hebben tonderhouden(e) ende te voldoene tot eeuwigen/ dagen Ierst dat den voirs(creven) janne scat en(de) zijnd(er)/ huysvr(ouwe) ombelet vanden voirs(creven) joese volgen sal/ den voirs(creven) brief spreken(de) vand(en) xii mottoen(en) erffel(ijc)/ voirs(creven) ende dat den ouden erfbrief vand(en) xx[tich]/ mottoen(en) erffel(ijc) voirs(creven) sal bliven berusten(de) onder de/ wet te loeven(e) tot behoef van beyd(en) voirs(creven) p(ar)tien vors(creven)/ om elker p(ar)tien soe v(er)re het huer ae(n)gaet opde manie(r)/ nae bescreven huer d(aer)mede te moegen behulpen/ om tot hue(re)r betalingen te comen(e) op goede loffel(ijke)/ cautie van dien altijt wed(er) te bringen(e) ter selver/ natue(re)n Item dat de voirs(creven) jan scat en(de) zijn/ huysvr(ouwe) voir hen en(de) voir hue(r) kinde(re) van nu/ voirtane te vreden zijn sullen metten viii(½) mottoe[n(en)]/ erff(elijc) vand(en) voirs(creven) xii mottoen(n) erffel(ijc) ende dat/ den voirs(creven) joesen en(de) zijnd(er) huysvr(ouwe) dande(r) iii(½)/ mottoen(en) erffel(ijc) d(aer) af van nu voirtane volgen/ sullen totten surplus vand(er) geheeld(er) rente(n) ende/ dat jan scat en(de) zijn huysvr(ouwe) den selve(n) joese(n)/ en(de) zijnd(er) huysvr(ouwe) vand(en) selve(n) iii(½) mottoen(en) erff(elijc)/ guedi(n)ge en(de) vestich(eit) doen sullen voe(r) scepen(en) va(n)d(en)/ bossche t(er) manissen desselfs joes en(de) zijnd(er) huysvr(ouwe)/ op cost desselfs joes Item es bevorwert soe/ v(er)re den voirs(creven) janne schat en(de) zijnd(er) huysvr(ouwe)/ e(n)nige(n) hinder oft belet gedaen wordde(n) het/ / wae(r) vanden leenhee(re) oft and(er)ssins aen hue(r) voirs(creven)/ viii(½) mottoen(en) erff(elijc) alse dat hen jairlijcx die o(m)belet/ niet volgen en mochten dat dan in dien gevalle/ de voirs(creven) joes sculdich sal zijn den selve(n) ja(n)ne ende/ zijnd(er) huys(vrouwe) een gelijcke rinte van viii(½) mottoen(en)/ erff(elijc) xvii r(ins)gulden(en) erff(elijc) d(aer) voe(r) te bewijsen(e) en(de)/ te besetten nae d(er) stadt recht van loeven(e) en(de) d(aer)aff/ genoech doen Op sulcke conditie nochtans soe v(er)re/ de voirs(creven) ka(tlij)[ne] na(tur)lijc aflivich wordde sonder wettich/ oir van huer [acht(er) te laten dat dan nae de doot van huer] en(de) hue(re)n man oft zij e(n)nigen acht(er)liet/ de selve rinte devolve(re)n en(de) toecomen soude der/ voirs(creven) wettig(er) docht(er) des voirs(creven) g(er)lijcx huysvr(ouwe) joes/ van oirbeke oft huers gebreken(de) hue(re)n wettigen kinde(re)n/ nae uutwijsen(en) vanden voirs(creven) brieve vand(en) xii mottoen(en)/ erff(elijc) Item es oic conditie dat den voirs(creven) ja(n)ne/ scat en(de) zijnd(er) huysvr(ouwe) volgen sullen de twee leste/ gevallen(en) jae(re)n vand(en) voirs(creven) viii(½) mottoen(en) ende des/ sullen d(aer) tegen oic v(er)smelten alsulken costen van/ rechte d(aer)inne de voirs(creven) joes gecondempn(er)t/ es den voirs(creven) janne inden leenhof van brabant/ ende desgelijcx alle ande(r) costen die tusschen p(ar)tien/ voirs(creven) des(er) aengaen(de) t(er) eenre oft t(er) ande(r) zijd(en) e(n)nichss(ins)/ gedaen moegen zijn Ende mits desen hebben de/ voirs(creven) jan scat ende zijn huysvr(ouwe) ger(e)nu(n)tieert/ en(de) quijtgescouden allet recht en(de) actie dat hen/ uuyt crachte vanden testame(n)te des voirs(creven) g(er)lecx/ oft and(er)ssins vorde(r) compete(re)n mochte(n) inde goed(en)/ naden selven g(er)lecke acht(er)gelaten ende desgelicx/ oick alle costen die jan soude moege(n) heysschen(de) zijn/ den ouden joese cor(am) h(er)meys buets(ele) dece(m)br(is) xiii