het sijn comen int recht voe(r) den meye(r) en(de) scepen(en) van loeven h(er)/ jan vande(n) zijpe p(ri)est(er) die geleidt is tot den goede(n) jans wilen van/ ghind(er)bove(n) in deen side en(de) arnt van ghind(er)bove(n) dieme(n) heet coels/in dande(re) die oec geleidt is tot den goede(n) des voirs(creven) wilen jans va(n)/ ghind(er)boven tot behoef sijnre d(er) natuerliker kijnde(re) des selfs wilen jans/ in dande(re) de welke arnt versocht met alrehande redene(n) datme(n) hem inde/ voirs(creven) goede houde(n) woude en(de) sund(er)linge(n) in deen vierdel vande(n) voirs(creven) goede(n)/ te wete(n) aen van henrics gedeelte die buyte(n) lants was met redene(n)/ die hi daertoe cleedde (et)c(etera) Daer op de voirs(creven) h(er) jan dede segge(n)/ dat de vors(creven) goede hem en(de) sinen beleyde volgen souden en(de) dat bi des(er)/ redene(n) want al waert also dat de voirs(creven) arnt tot des voirs(creven) wilen jans/ goede van ghind(er)boven geleidt was dat was tot sijnre kijnder behoef/ die hen des niet en ond(er)wouden so en soude hi mette(n) voirs(creven) beleyde/ niet w(er)ken noch so en soude(n) hem de voirs(creven) goede niet volgen met wa(n)t/ de vors(creven) h(er) jan sympelike(n) tot sine(n) behoef tot des voirs(creven) wilen jans goede/ geleidt wa(r)e so soude(n) hem de voirs(creven) goede en(de) sine(n) beleyde volgen hier/ op maende de meye(r) van loeven de scepen(en) va(n) loeven die hen des beriede(n)/ en(de) openbaerlic wijsde(n) voer een vonnisse dat de voirs(creven) goede den/ voirs(creven) h(ere)n janne en(de) sinen beleyde volgen selen cor(am) alb(us) rike g(ra)ven/ bone vynck des donresdaeghs xxiiii dage in julio anno xxi [mo]