Cond zij alle(n) liede(n) dat vranc box van droeghhouthem uut der/ p(ro)chien van hug(ar)de(n) es come(n) in jegenwordicheyt d(er) scepen(en) va(n) loeve(n)/ en(de) heeft genome(n) en(de) bekendt dat hi genome(n) heeft va(n) h(ere)n janne/ van dorp proefst des cloesters van vlied(er)beke inde(n) name en(de) van/ wege(n) des selfs cloeste(r)s thof van houthem gelege(n) inde p(ro)chie va(n) hug(ar)de(n)/ den voirs(creven) cloest(er) toebehorende met huyse(n) [en(de)] hove gelijc als dat daer/ belege(n) es met onderhalve(n) dachmael lants acht(er) tvoirs(creven) hof gelege(n)/ neve(n) wouters ve(re)nsallen wijngart en(de) voert met vieren(de)dertich/ boende(re)n [wynnens] lants ix roeden min en(de) met seven dachmael en(de) xlvi/ roeden lants ter weyden blivende gelijc de voirs(creven) goede de(n) voirs(creven)/ wynne mett(er) maten van hug(ar)de(n) openbaerlic ghelevert sijn Te houden/ te hebben en(de) te wynnen van half merte dat half v wesen sal/ int jaer ons ons he(re)n m cccc en(de) xxviii ene(n) t(er)mijn van twelf/ jae(re)n lanc duerende deen na dand(er) daer na sond(er) myddel volgende/ elx jaers daer en bynne(n) te wete(n) elc boend(er) d(aer) af om ond(er)half/ mudde [hards] corens goet en(de) payabel met alsulc als opt voirs(creven) lant/ jaerlex wassen sal met wanne en(de) met vede(re)n wael bereydt/ d(er) maten van thiene(n) Te wete(n) sesse halst(er) d(er) selver mate(n) voe(r) elc/ mudde voirs(creven) gerekent tsent andries misse apostels te betalen/ en(de) deen helecht vande(n) voirs(creven) pacht bynne(n) de(n) voirs(creven) cloeste(r) van/ vlied(er)beke en(de) dand(er) helecht int voirs(creven) hof te leve(re)n alle jae(re) den/ / voirs(creven) t(er)mijn duerende en(de) telke(n) t(er)mijn alse v(er)volghde schout En(de) oec elx jaers/ om vijf pont was een half pont ghingebers een half pont pep(er)s ende/ twee bussen soffraens tsente remeys misse jaerlex de(n) voirs(creven) t(er)mijn due(re)nde/ der came(re)n des voirs(creven) abds te leve(re)n of op dat de(n) voirs(creven) wynne genueght/ twee grijpen daer voir te betalen en(de) telke(n) t(er)mijn alse v(er)volghde schout/ Ite(m) is vorw(er)de dat de voirs(creven) wyn de huysinghe vande(n) voirs(creven) hove sinen/ t(er)mijn duerende houde(n) sal wel en(de) loflic vand(er) underster rikele(n) ned(er)w(er)t/ op sine(n) cost Ite(m) sal de voirs(creven) wyn jaerlex leve(re)n vierhondert walms/ om de voirs(creven) huysinghe [al] daer mede te decke(n) en(de) so waer me(n) jaerlex/ daer meer walme(re) behoefde so sal hi noch daer toe leve(re)n ii[c] walme(re)/ opt jae(r) naest volgende En(de) alsme(n) ald(aer) dect oft plect of so wat werke/ dat mijn he(re) dabt daer make(n) doet dair af sal de wyn den wercliede(n)/ de(n) montcost gheve(n) en(de) mijn he(re) de dachhue(re)n betale(n) uutgenomen va(n)/ nuw(er) ty(m)meringhe(n) Ite(m) sal de voirs(creven) wyn inde drie leste jae(re) vande(n) voirs(creven)/ t(er)mijn moge(n) hoervruchten vande(n) voirs(creven) lande een half boende(r) en(de) niet/ meer Ite(m) sal de voirs(creven) wyn de voirs(creven) lande ten eynde vande(n) voirs(creven)/ sine(n) t(er)mijn late(n) besayt en(de) gewonne(n) ind(er) manie(re)n hier na volgende/ Dats te wete(n) elf boende(re) een dachmael en(de) xix roede(n) en(de) een halve lants/ wel en(de) loflic op getideghe vore(n) met wynt(er)coren gelijc sine(n) reenghenote(n)/ en(de) dat hi alle dmest dat hi op dleste jae(r) heeft vuere(n) sal op de/ selve elf elf boende(r) een dachmael en(de) xix roede(n) en(de) een halve lants/ met wynt(er)core(n) besayt te(n) meeste(n) p(ro)fijte En(de) elf boende(re)n en(de) lxxv roede(n)/ braken eens om gedaen en(de) elf en(de) half boende(r) vier en(de) halve roede min/ storte eens om gedaen Ite(m) sal de wyn voirs(creven) alle dmest dat vande(n)/ voirs(creven) goede come(n) sal jaerlex opt voirs(creven) lant vuere(n) slants meeste(n) p(ro)fijt/ It(em) sal mij he(re) dabt voirs(creven) de(n) voirs(creven) wynne alle jae(re) de(n) voirs(creven) t(er)mijn lanc/ duerende leve(re)n vijftich hope(n) stroes en(de) des gelijx sal de selve wyn/ oec leve(re)n vijftich hope(n) stroes en(de) dat etten en(de) slyten met sine(n) beesten/ int vors(creven) hof en(de) mest dair af maken d en(de) dat opt voirs(creven) lant vuere(n)/ slants meeste(n) p(ro)fijt Mer es ond(er)sproke(n) dat de voirs(creven) wyn opte ii leste/ jae(re) vande(n) voirg(eruerde) t(er)mijn int levere(n) vande(n) voirs(creven) vijftich hope(n) stroes/ ongehoude(n) sijn sal Ite(m) so en sal de wyn voirs(creven) ten lesten jae(re) gheen/ mest [elder] moge(n) vuere(n) dan op tvoirs(creven) lant En(de) waer dat sake dat inden/ voirs(creven) hove brant gheschiede oft geviele dat god verhuede(n) moet die/ toeq(ua)me van des voirs(creven) cloest(er)s wege(n) dat sal sijn te haerre scaden/ / Waert oec also dat daer brant geviele die toeq(ua)me mids ocsuyn des/ voirs(creven) wynne(n) dat sal sijn in scaden des selfs wynne(n) en(de) die(n) sal hi/ sculdich sijn op te richte(n) de(n) abdt en(de) sine(n) convent voirs(creven) ter taxacien/ van goeden knape(n) die hen des verstaen Waert oec also dat/ daer e(n)nige(n) brant geviele en(de) datme(n) negheen van dese(n) gepraemen/ en conste so sal elc p(ar)tie hae(re)n scade draghen Ite(m) sal de voirs(creven) m(ijn)/ he(re) dabdt en(de) sijn convent hebbe(n) en(de) houden inde(n) voirs(creven) hove sijn/ gijsten en(de) liggen twewerf tsjaers van alle goede op des wynne(n)/ cost En(de) eest oec dat sake [sake] dat de selve m(ijn) he(re) dabt met sinen/ gesinde dicker gevalt ald(aer) te comen dat sal oec sijn op des selfs/ wynne(n) cost uutghenome(n) wijn en(de) wassen kerssen Oec sal/ de voirs(creven) wyn ontfaen die monicke(n) en(de) gesinde des voirs(creven) cloest(er)s/ also dick als si ald(aer) inde(n) voirs(creven) hove comen selen op sine(n) cost uutge/ nome(n) van wijne en(de) in dien dat si met hae(re)n abite en(de) met orlove/ van hae(re)n ov(er)ste inde(n) selve hove come(n) En(de) van tempeeste(n) en(de)/ gemeyne(n) orloghe waert dat si gevielen dat god verhueden/ moet daer af sele(n) de voirs(creven) abt en(de) convent den voirs(creven)/ wynne redelic versien gelijc ande(r) he(re)n plegen en(de) [men] gewoenlic/ is te doen boven en(de) beneden Ite(m) sal de voirs(creven) wyn opt leste/ jae(r) vande(n) voirs(creven) t(er)mijne van alle de(n) lande dat hi met sijnre ploech/ wynne(n) sal alle tstroe en(de) voesteringhe int voirs(creven) hof en(de) brenghe(n)/ en(de) dat daer etten en(de) v(er)there(n) met sine(n) beesten en(de) te mest make(n)/ en(de) alle dmest dair af comende boven dat hi opt voirs(creven) lant ghe/ vuert sal hebbe(n) int voirs(creven) [hof] laten en(de) negheen mest noch voesteringhe/ uut de(n) voirs(creven) hove vuere(n) uutgenome(n) crock erwiten caf en(de) hoy/ Ite(m) sal de voirs(creven) wyn alle die schaveyen grachte(n) en(de) weghe come(n)de/ doer en(de) neven tvoirs(creven) lant houde(n) en(de) maken wel en(de) loflic op/ sine(n) cost na slants p(ro)fijt Ite(m) sal noch de voirs(creven) wyn jaerlex/ de(n) voirs(creven) t(er)mijn duerende halen en(de) invuere(n) met sine(n) waghen/ en(de) p(er)den de helecht vanden stake(n) dieme(n) inde(n) wijngarde/ de voirs(creven) cloeste(r) tot hoxhem [gelegen] behoeve(n) en(de) orbore(n) sal en(de) daer/ voer sal de selve wyn hebbe(n) half de haghe om den selven/ wijngart gaende Oec sal de voirs(creven) wyn den voirs(creven) abdt/ en(de) convent alle jae(re) hie(re)n bynnen dienen twee daghe met/ sine(n) wage(n) en(de) p(er)de(n) omtrent thiene(n) oerbeke en(de) hoxhem en(de)/ / daer voe(r) sal de selve wynne jaerlex hebbe(n) vande(n) voirs(creven) abdt en(de)/ convent ene(n) rock gelijck(er)wijs si hae(re)n ghesinde gheven selen/ Voert es vorw(er)de waert dat sake dat bynne(n) den voirs(creven) t(er)mijne/ harde jae(re) q(ua)me(n) dat tcoren [te mael] qualic gheraecte datme(n) hem [de(n) voirs(creven) wyn] dan verbeyde(n)/ sal xv mudde corens [vande(n) vors(creven) pacht] tot na den oexst dat tcoren inde schue(r) wese(n)/ sal En(de) alle dese vors(creven) punte(n) vorw(er)den en(de) condicien boven bescreven heeft/

geloeft de wyn vast hebbe(n) geloeft de voirs(creven) proefst inde name en(de)/ va(n) wege(n) des voirs(creven) cloest(er)s in deen side en(de) de voirs(creven) vranc box in dande(re)/[malcande(re)n] vast en(de) gestedich te houde(n) en(de) te voldoen in alle der manie(re)n en(de) forme(n)/ gelijc voirscr(even) steet en(de) telken t(er)mine alse v(er)volghde schout En(de) hier af/ sijn borghen des voirs(creven) vranx alse p(ri)ncipale sculde(re)n ongesund(er)t en(de) onghesch(eiden)/ en(de) elc voe(r) al matheeis en(de) gielijs box sijn bruedere(n) en(de) wouter janne(n)/ jan cluppel en(de) henric cluppel de jonghe sijn brueder de welke de/ voirs(creven) vranc box heeft geloeft hier af co(m)merloes te houde(n) en(de)/ scadeloes te heffen eg(idius) rike (et) ar(nol)[d(us)] vande(n) velde anno xxvii[mo] januarii [xxii]