Cond sij allen lieden dat want stoet geschille en(de) twidracht opverstaen sijn/ geweest tuschen woute(re)n bau als wittich man en(de) momboer vrouwe/ margrieten van wezele weduwe h(e)r(e)n henrix wilen van ymmerssele ridders/ en(de) h(e)r(e)n gorde van halle priester die voer meyer en(de) scepenen van loven/ uyt crachte van beleyde van scepen(en) brieven van loven gegoedt en(de) gheerft/ is in alle de onberuerlike goede des voirs(creven) wouter baus in deen zijde ende/ willem van wesele diemen heet van sompeke brueder der voirs(creven) vrou margriete(n)/ ende henricke van ymmerssele soen der selver vrouwe margrieten voer hem/ ende voer arnde ende joffrou katlinen van ymmerssele sinen brueder en(de) suster/ die de voirs(creven) henric h(ier) inne geloeft heeft te vervaen in dande(re) vanden goeden/ beruerlic ende onberuerlic die bleven sijn na ende vander doot des voirs(creven)/ wilen h(e)r(e)n henrics van ymmerssele midts dat de voirs(creven) p(ar)tijen meynden ende/ hielden dat elc van hen inde voirs(creven) goede vorder ende meer gerecht souden/ wesen dan elc den ande(re)n kynnen ende lyen woude dwelc ter kynnissen/ van hue(re) beyder vriende comen is die daer om gedeedingct en(de) gearbeyt hebben/ etc(etera) daer om eest dat de voirs(creven) wouter ende h(er) gord ende de voirs(creven) willem en(de)/ henric voer hen ende hue(re) medeplichters als voirs(creven) is comen sijn voer scepenen/ van loven bekennen(de) ende verlyende ope(n)bairlic dat sij bij hulpen ende toe doen/ van hue(re) beyder vriende voirs(creven) verleken ende vereenicht sijn vanden punten ende/ articulen h(ier) onder bescreven inder vueghen en(de) manie(re)n gelijc dat h(ier) na/ ende onder vercleert is/ Inden yersten als vanden goeden van meysse ende van steyle daer om tuschen de/ voirs(creven) p(ar)tijen voer meye(r) ende scepenen van loven questie ende geschille geweest/ is sijn de voirs(creven) p(ar)tijen eens ende cleerlic gesloten dat de stat van loven op/ datmense daer toe verbydden kan twee van hue(re)n raede ende eenen van hue(re)n / secretar(issen) seynden sall byden wijsdom van grymberghen ten langcsten tuschen/ dit ende den lesten dach van meye neestcomen(de) om aldaer te vertasten en(de)/ te onder zueken hoe verre ende in wat manie(re)n elc vanden p(ar)tijen voirscr(even)/ inde voirsc(reven) goede na den lantrechte aldaer gericht sall sijn ende dat ond(er)vonde(n)/ ende uutgeseeght sullen beyde p(ar)tijen voirscr(even) daer mede gevreedt ende/ verenicht moeten sijn ende dat tgheliken gedaen sall werden bynnen den/ selven tide vanden goeden van yeteghem/ Item es oec verdeedingct dat wouter bau voirscr(even) aff sall doen doen
//
alsulken belett als janne inde mane gedaen is geweest bider goeder stat/ van mechlen van alsulker goedingen als hij gedaen soude hebben vanden/ goeden die wae(re)n ende toebehoirden woute(re)n wilen van ymmerssele te/ weten dat de voirs(creven) jan inde mane die sal moegen goeden wyen hem/ gelieft behoudelic dien als hij de goedinge doen sall datmen dan/ condicioneren sall in behoirliken formen dat die goedinge egheen hynd(er)/ dragen en sall vrou m(ar)grieten weduwe h(e)r(e)n henrix wilen van/ ymmerssele ridders in hue(re) lantrecht also verre als men bevynden sall/ na inhebben vanden besueke voirs(creven) hoe verre sij daer inne gericht sij/ Item es vort verdeedingct tuschen de voirs(creven) p(ar)tijen dat de voirs(creven) wouter/ bau den voirs(creven) kijnde(re)n van y(m)merssele tuschen dit en(de) des sondaechs na/ beloken paeschen neestcomen(de) oprichten en(de) overgeven sall tghebreck/ dat de voirs(creven) vrou margriete den voirs(creven) hue(re)n kijnde(re)n noch tacht(er) ende/ belanck is vander schattingen vander haven die tuschen hen gedeilt/ en(de) geschatt is ter goeder rekenyngen en(de) wettiger waerh(eit)/ Item es h(er) janne voert verdeedingct ende eyntelic gesloten tuschen/ de voirs(creven) p(ar)tijen dat de voirs(creven) henric arnt en(de) joffr(ouwe) katline van y(m)merssele/ ter stont over en(de) tot henwert hebben sullen den com tot mechlen/ staende metten juweelen daer inne wesende also verre men bevint/ ter goeder meyninghen dat hen die toebehoe(re)n ende als vanden/ brieven daer inne liggende dat elc p(ar)tije sijn brieve dienen(de) ende/ spreekende op de goede daer inne hij alleene gericht sall wesen/ te hemwert hebben ende nemen sall en(de) datmen de ander brieve/ hen beyden dienen(de) leggen sal in gewarig(er) hant daer sijs in/ beyden siden te vreden sullen wesen om ene(n)yegeliken hen d(aer) mede/ te behelpen [die] des te doen sall hebben op zeke(re) ende redelike caucie die/ altijt aldaer weder te bringhen als hij hem daer mede beholpen sal hebben/ Item es h(ier) inne noch cleerlic verdeedingct en(de) tuschen de vors(creven) p(ar)tien/ ope(n)bairlic gesloten als vanden gelde staende bynnen der stat van mechle(n)/ dwelc comen is vander affquitingen van xliiii c(ro)nen erfrenten en(de) desge/ lijx vanden goeden liggen(de) bynnen lyere ende daer omtrent die gecocht/ en(de) gecregen sijn uuter gemeynder haven dat de voirs(creven) p(ar)tijen tvoirs(creven) gelt
//
gelijc deylen sullen en(de) dan sullen de voirs(creven) kijnde(re) van ymmerssele van hue(re)n/ gedeelten den voirs(creven) woute(re)n en(de) m(ijn) vrouwen sijnre gesellynnen voirscr(even) t(er)stont/ weder overgeve(n) ii[c] cronen in alsulker weerden als daer staen en(de) gesedt/ sijn ende daer voer sullen de voirs(creven) kijnde(re) van ymmerssele de voirs(creven) ver/ cregen goede van lyere alleene erflic hebben ende behouden sonder den voirs(creven)/ woute(re)n vrouwe m(ar)grieten sijnre ghesellynnen en(de) h(er) gorde van halle e(n)nich/ recht daer inne te hebben oft te behouden ende tremanant dat den voirs(creven)/ kijnde(re)n vander ymmerssele van hue(re) helcht vanden voirs(creven) gelde alsdan wassen / en(de) over bliven sall dat sall de voirs(creven) wouter hen leve(re)n oft doen leve(re)n inder/ stat wissel van loven tuschen dit ende paesschen nu neestcomen(de) sonder/ argelist ende in beyden siden ter goeder meyninghen/ Item als vanden goeden int waterlant gelegen es verdeedingct op de vueghe/ als voirs(creven) is dat de voirs(creven) p(ar)tijen die deylen hebben en(de) behouden sullen gelijc/ dat na den lantrecht daer onder de voirs(creven) goede gelegen sijn sculdich en(de)/ gewoenlic is van geliken te geschien ende als vander molen te boechout en(de)/ vanden goeden geheten ten broecke beyde te boechout gelegen es oec verdragen/ datmen die reecken en(de) houden sall op des gheens cost die dat na den lantrecht/ aldaer sculdich sall sijn te dragen/ desgelijcs es vort verdraghen dat de voirs(creven) wouter en(de) h(er) gord op der stat/ wissel van loven setten ende brengen sullen alsulken neghen blau c(ro)nen als sij/ vanden goeden van yeteghem gehaven hebben ende oft de voirs(creven) kijnde(re) van/ ymmerssele oft hue(re) rentm(eeste)r oec vanden voirs(creven) goeden yet gehaven oft opgebuert/ hebben sidert dat de voirs(creven) wouter m(ijn) vrouwe m(ar)grieten sijnre gesellynnen/ voirs(creven) getruwt heeft meer en(de) boven dien dan sij ter wettiger waerh(eit) in p(ro)fijt/ vanden voirs(creven) goeden verleeght en(de) uutgegeven hebben en(de) sculdich wae(re)n uyt/ uut te gheven dat sij dat desgelijcs oec inder stat wissel te loven bringen/ sullen om dan dat den ghenen te volgen diemen bevynden sall na/ inhebben vanden voirs(creven) bezueke dat dat sculich sall sijn te volgen/ Voort es verdeedingct ende gesloten bij vrienden als voirs(creven) is tuschen de voirs(creven)/ p(ar)tijen als vanden renten van ii jae(re)n vanden goeden wouters wilen van/ ymmerssele die de voirs(creven) vrouwe margriete ende hue(re) kijnde(re) ten tide/ dat sij in gemeynen coste waren inne gebuert hebben de welke de/ voirs(creven) willem van sompeke als testamenteerder des voirs(creven) wilen wout(er)s/ van ymmerssele meynt dat hem sculdich sijn te volgen om daer mede
//
den uutersten wille des selfs wilen wouters te vervullen dat de/ voirs(creven) willem van sompeke den voirs(creven) woute(re)n een uutscreft ende copie/ vanden voirs(creven) testamente over leve(re)n sal metten welken de selve wout(er) schicken sall bij h(e)r(e)n arnde van ymmerssele ridder om bescheit ende/ cleernisse te weten hoe verre men noch ghebreckelic wesen mach en(de)/ aen wyen dat steet ende het [toe] comen is vander vervullingen vanden/ uutersten wille des voirs(creven) wilen wouters van ymmerssele ende dat/ geweten dat de voirs(creven) wouter bau en(de) de voirs(creven) kijnde(re) van ymmerssele/ na dien elc sijn helcht vanden voirs(creven) renten staphans voergeruert/ den voirs(creven) willem(me) weder over leve(re)n sullen also verre als dat/ behoirlic wesen sall om daer mede den uutersten wille des voirs(creven) wouters voert te voldoen oec ter goeder meyninghen en(de) sonder/ argelist/ Ende es h(ier) inne voert mede verdeedingct en(de) gesloten dat de/ voirs(creven) wouter bau vrouwe margriet sijn ghesellynne en(de) h(er)/ gord van halle den voirs(creven) willem van wesele behoirlike quijt/ scheldinge doen sullen van alle den rechte ende ghedeelte dat/ sij hebben moegen aen thuys met sinen toebehoirten geheten den/ aenstoet ende dat h(ier) op de voirs(creven) willem van wesele den voirs(creven)/ woute(re)n over gheven sall alsulken schoutbrieff als vrouwe/ margriet voirs(creven) den voirs(creven) willem hue(re)n brueder voermaels in/ hue(re)n weduwen stoele voer scepenen van loven bekent heeft/ dits gesciet voer mychiel abs(oloens) en(de) arnde vynck scepen(en) van/ loven xxi daege in meerte/