Uut dien dat henric van plassendonck die vanden recht ende vander vriheyt is/ van sente peters mansscap van loeven als wettich man ende mombour heylwige(n)/ docht(er) jans wilen swevers hem voe(r) de stat van loeven anderwile beclaeght/ en(de) becroent heeft dat de goede liede van wickenvorst hem aent gebruyck/ vanden aerde van wickenvorst hijnder crot en(de) letsel deden hoe wael nochta(n)/ hi als mombour sijns wijfs en(de) sijns wijfs vorde(re)n d(aer) af in possessien geweest/ hadde(n) beghe(re)nde daer om en(de) versuekende de vors(creven) henric als [s(en)te] peters man/ van loeven aende stat van loeven dat sij hem in zijnre possessien wouden/ doen houden so heeft de stat van loeven als de ghene die dat sculdech/ was te doen den voirs(creven) goeden lieden van wickenvorst met hae(re)n brieve(n)/ gescreve(n) en(de) v(er)socht dat sij den voirs(creven) henricke(n) als mombour en(de) voeght/ van sine(n) wive voirs(creven) laten wouden en(de) berusten in sijnre possessien vanden/ aerde voirs(creven) of dat sij tot ene(n) seke(re)n daghe hen inden selve(n) brieve(n) v(er)claert
//
tot loeven jegen den voirs(creven) henricke(n) comen woude(n) om elk(er)liken/ sijn bescheyt van des voirs(creven) is op te doen tot welken daghe beyde/ de voirs(creven) p(ar)tijen comen zijn voe(r) de stat van loeven ene(n) yegeliken/ sine(n) bescheyt [al] daer opdoende met seke(re)n thoe(n)nissen en(de) bewaerheyden/ dat sij en(de) een yegelic van hen dair in bileyden daer toe sij wed(er) dach/ namen tot welken dage beyde de p(ar)tijen hae(r) thoe(n)nisse leydde(n) gelijc/ als dat gedroegh en(de) dat geleydt en(de) gedaen zijnde na dat den raet/ vand(er) stat van loeven de sake bevonden heeft in hae(re)n vollen rade/ ghet(er)mineert voe(r) reden en(de) recht want de voirs(creven) stat van loeven/ den voirs(creven) henricke(n) van plassendonck als mombour heylwige(n) zijns/ wijfs inde possessie vande(n) gebruyck vande(n) aerde voirs(creven) bevonden/ heeft dat de selve henric daer in bliven sal tot aen d(er)re tijt/ dat hi daer uut metten rechte gewonnen sal werden inden/ hove en(de) ter plaetsen daer dat behoert cora(m) ludovico roelants/ et henrico wante burg(i)mag(ist)ris joh(ann)e de oppendorp et judoco ab/ soloens scabinis et q(uam)plu(r)ibus aliis de consilio op(idi) lov(aniensis) anno xxxiii/ me(n)sis novembr(is) die t(er)ciadecima
//