Ite(m) na vele en(de) langhe hanteringhe(n) van recht dat voe(r) meye(r) en(de) scepen(en)/ va(n) loeven nu onlanx geweest is tussche(n) bouden van buyte(n) van lyere/ die na de hoghe heerlicheyt ons genedichs he(re)n van brabant en(de) na zijnre/ stat recht va(n) loeve(n) gegoedt en(de) gheerft is inde hoeve met haerre/ toebehoirte(n) jans vlemynck sone goerts wile(n) vlemincs gelege(n) tot/ conticke etc(etera) in deen side en(de) woute(re)n robijns va(n) mechelen die voe(r)/ meye(r) en(de) scepen(en) voirscr(even) inde selve goede gegoedt en(de) gheerft is/ alse goede des voirs(creven) wile(n) goert vleminx en(de) joffr(ouwe) kath(er)ine(n) wile(n) robijns/ sijns wijfs in dande(r) es bi mae(n)nissen smeyers en(de) wijsdom d(er) scepene(n)/ van loeve(n) tussche(n) de selve p(ar)tijen vanden voirs(creven) goeden een vonnisse/ uutgedrage(n) en(de) gewijst gelijc dat geregistreert en(de) begrepe(n) steet/ ond(er) ger(arden) van baussele secretar(is) d(er) stat va(n) loeven int boeck/ vanden jae(re) van xxxiii opte(n) neghensten dach van decembr(is)/ En(de) want dese(n) niet wed(er)staende de vors(creven) joffr(ouwe) ka(theri)[ne] robijns lodewijc/ en(de) rombout hae(r) zoene die si hadde vande(n) voirs(creven) wile(n) goerde vlemi(n)c/ in sine(n) leste(n) huwelike(n) stoil wed(er)comen sijn voe(r) scepen(en) van loeven/ en(de) hebbe(n) seke(re) scepen(en) brieve va(n) loeven bekendt en(de) geloeft enen/ woute(re)n copele coppelman van boexstel die sijn vo(n)nisse nemende/ hem wed(er) heeft doen leyden tot den goede(n) voirscr(even) en(de) d(aer) na/ thof tot conticke jacobs keermans va(n) ranst daer de [jan] vlemync/ na inhebbe(n) de(n) vonnisse voirgheruert vande(n) goede(n) voirscr(even) sijn recht/ v(er)volghde gelijc hi dat na inhebbe(n) de(n) vo(n)nisse voirscr(even) doen moeste/ en(de) sculdech was te doen met brieve(n) d(er) stat van loeven dede sluyte(n)/ So dat de voirs(creven) bouden van buyten comen is van biden rade vand(er)/ stat hen dese saken opdoende [en(de)] hen v(er)suekende want also hem docht/ dit se(re) en(de) grotelic was in cont(ra)rien de(n) vonnisse voirgheruert en(de)/ gaf d(aer) op een supplicacie ov(er) die van woerde te woerde hier na/ volght Eerbe(re) wijse en(de) voirsienighe he(re)n bouden van buten die tot/ sijnre grot(er) cost se(re) langhe v(er)volght heeft voe(r) u he(re)n scepen(en) van/ loeve(n) bidt u en(de) versuect van rechts wegen gemeynlic dat ghi
//
hem houden wilt in sinen vonnisse gelijc als ghi umm(er) ten eynde/ wael doen selt hij en can oec niet wael bedencken hoe dat een ande(r)/ p(ar)tije mocht wesen dan die yerste wae(re)n gemerct dat goert vleeminc/ en(de) sijn wijf doen sij den yersten brief bekendde(n) in gehelen stoel sate(n)/ en(de) also si meyndde(n) der goede wael mechtich wae(re)n Oec wae(re)n dese/ kijnde(re) doen onder hae(re) daghe en(de) in hae(re)n broede umm(er) niet rechts/ hebbende noch behoudende inde goede anders dan hen van vad(er)/ en(de) van moed(er) blive(n) of aencomen mochte(n) En(de) ofmen aldus dese/ saken alt(oes) wed(er) op hae(re) yerste b(ri)ngen mochte so en soude/ nu(m)mermeer sake gheeyndt werden wantmen soude alt(oes)/ wael lude vijnden die maegh souden sijn en(de) wed(er)brieve bekenne(n)/ souden Dese supplicacie gheexamineert zijnde en(de) [na] dat de wed(er)p(ar)tie/ hae(r) bescheyt voe(r) den rade vand(er) stat voe(r) op gedaen hadde(n) daer/ in dat de selve raet claerlic bevant na dat de(n) yersten schoutbrief/ in geheelen bedde bi goerde vleminc met joffr(ouwe) kath(er)inen sijnre huys/ vrouwe(n) vorscr(even) bekendt was en(de) nu de na kijnde(re) voirg(enoemt) die/ desen leste(n) brief bekendt hadde(n) niet meer rechts gehebbe(n) en konsten/ dan hen van vad(er) en(de) moed(er) inde voirs(creven) goede aencomen mochte/ Daer om eest dat de raet vand(er) stat van loeve(n) ghet(er)mineert/ heeft voe(r) recht dat sij blijven bi alsulke(n) vonnisse als de/ scepen(en) va(n) loeven tussche(n) de vors(creven) p(ar)tijen vanden goede(n) vorscr(even)/ gewijst hebbe(n) en(de) datmen de saken vanden selve(n) goede(n) na/ inhebbe(n) vanden voirs(creven) vonnisse purge(re)n sal inden hof daer die/ gelegen sijn en(de) eest dan dat yemant e(n)nich recht vorde(re)n wilt/ dat hi dat sal mogen doen p(rese)ntibus henrico wante burg(i)mag(ist)ro/ joh(ann)e de oppendorp judoco absoloens scabinis henr(ico) de calstris/ joh(ann)e de nethenis waut(er) pynnoc de jonghe claes de kersmake(re)/ gheldolf rogghe henr(ic) vande(n) borch(oven) jans sone godefrido roelofs/ jasp(ar) absoloens dyonisio boys henr(ico) de muysen joh(ann)e de ysendijck/ goessuino vanden zande eustatio roelofs et henrico/ vand(er) molen scabinis lov(aniensibus) consiliariis opidi lovanien(sis)/ anno m[mo] cccc[mo] m(en)s(is) februar(ii) die vicesimasexta