Ite(m) uut dien dat willem rys(er)mans sone henrics wile(n) ris(er)mans van/miskem voe(r) de stat van loeven inhadde doen scriven lambrechte/scepens oec van miskem die ov(er)mids vonnisse van scep(en)en brieve(n)/van loeve(n) come(n) en(de) geleydt is tot de(n) goeden jans wilen rys(er)mans/oud(er)vad(er) des voirs(creven) willem rys(er)mans daer de selve wille(m) ris(er)man/seker becroen voe(r) de stat opdede seggende en(de) meynende dat de/voirs(reven) beleydbrieve ond(er) de scep(en)en van miskeem geleeght waren/tot behoef d(er) ghemeynd(er) erfgenamen des vors(creven) wilen jan rys(er)mans/o(m)me d(aer) mede te weren dat aleyt wilen quatters die wijf was/des voirs(creven) wilen jans gheen tocht hebben en soude inde goede des selfs/wilen jans En(de) oftmen daer toe d(er) brieve te doen hadde So soude/de voirs(creven) lambrecht scepens die d(aer) toe mogen halen en(de) dat ghe/weert zijnde so soude hi die ond(er) de scep(en)en van miskem wed(er)/b(ri)nghen En(de) dede voert segge(n) de vors(creven) willem dat de vors(creven)
//
lambrecht de voirs(creven) brieve gehaelt hadde en(de) hadse noch in zijnre behout/sond(er) die ond(er) de scep(en)en van miskem te b(ri)nge(n) mids de(n) welken hi besorght/wae(re) dat de voirs(creven) lambrecht hem hijnder aen zine goede doen mocht die/hem van sijns oud(er)vaders weghen toecomen en(de) in deylingen gevallen wae(re)n/met meer woerde(n) die de selve willem daer toe dede segghen Bat d(aer)/o(m)me de vors(creven) willem d(er) stat van loeve(n) vors(creven) dat sij hem d(aer) toe helpen woude(n)/dat hi des aen sine goede te vreden zijn mocht Op dwelc de vors(creven) lambrecht/hem v(er)antwerde en(de) seyde ond(er) den ande(re)n dat hi den voirs(creven) wille(m)me rys(er)man met/den voirs(creven) beleyde aen zine goede nu(m)mermeer belet noch hijnder doen en woude/met meer woerde(n) die hi d(aer) toe seggen dede Also dat de raet vand(er) stat/na dovergheven en(de) tkenne(n) en(de) lyen des voirs(creven) lambrechts t(er)mineerde voe(r)/reden(en) en(de) recht dat de vors(creven) lambrecht nu(m)m(er)meer opte goede des vors(creven) willems/die hem bleven zijn vandern voirs(creven) wilen janne ryserma(n) sine(n) oud(er)vad(er) metten/voirs(creven) beleydebrieve werken en sal sond(er) argelist p(rese)ntibus jacobo ex lyemi(n)gen/et andrea de voshem burg(i)mag(ist)ris et om(n)ibus aliis de consilio des vridaeghs/xxvi daghe in junio Anno m[mo] cccc[mo] t(re)cesimot(er)tio