Van janne sceyman/ Item want onlanx voir meye(r) ende scepene(n) van loven(e) inde banc/ aldair in rechte geweest sijn jan sceymans van steenzele in deen/ zijde ende henrick wuest die nae den rechte der stat van loeven(e)/ geleidt is tot den goeden jacobs wuest sijns brueders in dandere/ van zeke(re)n goeden tot steenzele gelegen die come(n) sijn en(de) bleven/ nae de doet lijsbette(n) wilen woyts die wijf was des voirs(creven) jacobs/ Ende doen bij toedoen van vrienden de voirs(creven) partien hen buyten/ den rechte aldair stellende compromitteerden vande(n) voirs(creven) goeden/ in segge(re)n en(de) vrientlic yffene(re)n gelijc tcompromis d(aer) op gemaect/ clairlic begrijpt en(de) inhoudt ende desen navolgende de segge(re)n/ tusscen de voirs(creven) p(ar)tien gecoe(re)n hoir seggen vanden voirs(creven) goeden/ uutgesproken hebben bij o(n)noeselheide(n) en(de) sympelheide(n) sonder/ dat te doen voir scepen(en) van loven(e) ende nae dat midts dien de/ voirs(creven) hen(ric) wuest tvoirs(creven) seggen niet houde(n) en woude hoe/ wael nochtan de raet vander stat clairliken gevuelde dat/ / tvoirs(creven) seggen godlic ende redelic is Dair om eest dat de selve/ raet vander stat getermineert heeft voir reden ende recht dat/ elc vande(n) voirs(creven) p(ar)tien sijn segge(re)n brenghen sal voir scepen(en) van/ loeven(e) om tvoirs(creven) seggen aldair uut te spreken ende dat alsoe/ gehouden te werden Coram walt(ero) pynnoc iunio(r)e b et andrea/ de voshem burgim(a)g(ist)ris in pleno consilio septe(m)br(is) ultima