Van gheerde van dyeven/ Inden gedinge dat nu onlanx voir meye(r) en(de) scepen(en) van wiltsel geweest/ is tusschen gheerde van dyeve(n) in deen zijde ende wille(m)me en(de) pete(re)n vand(er)/ dyle ende goerde wijbrechts als wittich man lijsbette(n) vander dylen sijns wijfs/ suster des voirs(creven) willems en(de) peters in dander zijde van ene(n) wege die de/ selve gheert van dyeve(n) eysschende was doer over derve der een st(ra)te/ die plach te gaen vande(n) royters ha(m)me aen de oude dyle en(de) tot de(n) ha(m)me/ ter dylen en(de) tot opte dyle en(de) also voirt ov(er) den ham ter dyle tot maes/ vonde(re)n toe ute gaen tot der molen en(de) der ca(m)men van wijchmale/ dwelc des voirs(creven) gheerts erve is heeft des voirs(creven) gheerts van dyeve(n)/ wairheit gedragen yerst gemaent x goede mans op hoe(re)n eedt hoe(r)/ bester conden oft dair niet en ghinc ov(er) xxx jae(r) en(de) dage een strate oft/ wech aen die oude dyle vande(n) royters ha(m)me tot de(n) da(m)me ha(m)me ter dyle/ en(de) tot der dylen en(de) also voert ov(er) den ham ter dyle tot maes vonde(re)n droege(n)/ sij op hoe(re)n eedt dat hen wel kenlic wae(r) dat sij dair een strate hadden sien/ staen tusscen de oude dyle en(de) die goede wilen jans vand(er) dylen en(de) die/ strate uutgemaect met eenre haghen tot den ha(m)me ter dyle en(de) datme(n)/ doen aldair voer tot de(n) ha(m)me ter dyle en(de) ov(er) den ham ter dyle ov(er) een spicht/ aen maes vonde(re) en(de) waerme(n) hene(n) sijn woude te opene(n) tide als dat zae(re)n/ velt open ghinc die sulke van een? seide ov(er) xxxv jair en(de) meer die sulke/ ov(er) xl jair m(e) die sulke ov(er) lx jae(r) voirt dede hij hen mane(n) of sij dair/ yema(n)t hadde(n) sien scutten of ke(re)n doen name(n) sij op hoe(re)n eedt dat sij dair/ nyema(n)de te die(r) tijt en sage(n) scutte(n) noch ke(re)n Voirt gemaent iiii goede ma(n)s/ op hoe(re)n eedt oft jan van wijchmale des voirs(creven) gheerts voirsete dien wech/ in voerleden(en) tijde niet op gewonne(n) en hadde met rechte doe(r) dat goet doen/ name(n) sij op hoe(re)n eedt dat hoir beste conde wae(r) dat die meyer van wiltsel(e)/ dair een waerheit op besat en(de) dat doen ope(n) gewijst wairt en(de) opgedae/ waert hen voirt gemaent hoe lange dat des lede(n) sijn mocht seide(n) sij dat/ des lede(n) is tusscen xxvi jae(r) en(de) xxviii Voirt wairt gemaent den selve(n) oft/ sij niet en hadden sien open liggen die strate en(de) alle ma(n)ne dair ov(er) vae(re)n/ en(de) of sij den ham ter dyle niet en hebben sien ov(er) gaen gelijc den zae(re)n velde/ tot half aprille doen name(n) sij op hoe(re)n eedt dat sij die strate dair hadde(n)/ sien gaen aldair en(de) die beesten op hadden sien hueden en(de) allema(n) dair/ ov(er) voer van wair hij qua(m) en(de) wair hij hene(n) sijn woude en(de) dat sij den ham/ ter dyle e oeyt hebben sien ov(er) gaen gelijc den zae(re)n velde tot half
//
aprille noch droege(n) sij dat jan van wijchmale ter dier tijt dair gheen/ goede achter en hadde ligge(n)de Droege(n) noch iii goede mans op hoe(re)n/ eedt dat hen wel kenlic wae(r) dat sij dair een strate hadde(n) sien gaen/ vande(n) royters ha(m)me tot de(n) ha(m)me ter dyle op deen eynde in vae(re)n en(de)/ op dander eynde uut van waer die liede quame(n) en(de) tot der maes/ vonde(re)n en(de) vand(er) maes vonde(re)n ter mole(n) wairt en(de) dat sij dat gesien/ hadden ov(er) xxxv jae(r) Voirt droege(n) ii goede mans dat sij selve die/ beeste(n) gehuedt hadden op die strate en(de) dat sij dair te die(r) tijt nieman(de)/ en sage(n) scutte(n) met meer wairheide(n) die hij noch leidde sijn sake/ verschoenende Des voirs(creven) gheerts wederp(ar)tie thoende alrehande sake(n)/ hen weynich tot hoe(re)n rechte diene(n)de en(de) onder den ande(re)n thoende/ sij met ii goede(n) mans dat dat hoetvo(n)nisse wijsde dat dair enen/ wech gaen soude tot den ha(m)me ter dyle te zade en(de) made en(de) den/ lieden huer goet te vue(re)n? Voirt thoende sij dat met iii goede(n) mans/ dat sij dat goet dair gheert den wech ov(er) hebbe(n) wilt hebben sien/ liggen geslote(n) ov(er) xxx jae(r) en(de) daghe mee deen vande(n) drien droegh/ xxx jaire luttel myn of meer Also dat de scepen(en) van loven(en) ten bijbreng(en)/ vande(n) scepen(en) van wiltsele die dair om aen hen quame(n) ten hoode geve(n)/ den voirs(creven) scepen(en) van wiltsel voir een vo(n)nisse dat gheerde van dyeve(n)/ sine(n) wech volgen sal gelijc als sijn wairheit gedragen heeft P(rese)ntib(us)/ om(n)ib(us) scabinis v die me(n) xxix die mens(is) dece(m)br(is) vel c(ir)citer/ Anno xiiii[c] xxxvi