Vanden goidshuse van gruene(n)dale en(de)/ woute(re)n van kareloe Het sijn comen in rechte in de voir meyer en(de) scepen(en) van loven(e) inde banc/ aldair wouter van kareloe van bruessel als wittich momboir en(de) vader/ jans wouters en(de) joffr(ouwen) katline(n) en(de) magriete(n) sijnre kijnde(re) noch onder/ hoir dage sijnde die voir meye(r) en(de) scepen(en) van loven(e) gegoet ende/ gheerst sijn inde goede hier nae bescreve(n) Ierst in iii(½) dachmael/ lands gelegen opten viertschoef inde p(ro)chie van leefdale tusschen/ de goede des godshuys van gruene(n)dale en(de) de goede der joffr(ouwen) van/ hondsberge It(em) in een dachmael lands gelege(n) inde voirs(creven) p(ro)chie ter/ stat geheten inde cappausdelle tusscen de goede zweeder was en(de)/ de goede des voirs(creven) goidshuys van gruene(n)dale in deen zijde ende/ brueder gielise vanden broeke convers p(ro)fess des voirs(creven) goidsh(uys) van/ gruene(n)dale inden name en(de) van wegen en(de) gemechticht vande(n)/ selve(n) goidsh(uys) van gruene(n)dale in dande(re) dair de voirs(creven) wouter/ van kareloe als vad(er) en(de) wittich momboir der voirs(creven) sijnre kijnder/ versocht en(de) dede versueke(n) bij sine(n) voirspreke datme(n) hem nae inhebbe(n)/ vand(er) voirs(creven) goedingen houden woude inde voirs(creven) goede Dair op de voirs(creven)/ brueder gielijs inden name vande(n) voirs(creven) godshuse van gruene(n)dale een aen/ sprake dede totten voirs(creven) goeden seggende openbairlic met veel notabile(n)/ worden dat de voirs(creven) goede den voirs(creven) goidshuyse van grue(ne)ndale ov(er) veel/ jae(re) toebehoirt hadden als hoir p(ro)per erve en(de) dat jan wilen snoeck/ de voirs(creven) goede als des voirs(creven) goidshuys goede en(de) erve vande(n) selve(n) godshuse/ in pachtingen gehoude(n) hadde met veel meer en(de) ande(re)n reden(en) die/ de voirs(creven) brueder gielijs van des voirs(creven) goidshuys wege(n) boet te thoene(n)/ hopende en(de) seggende soe wair hij die gethoene(n) conste dat den voirs(creven)/ godshuse van gruene(n)dale dan de voirs(creven) goede volgen souden Dair/ op de voirs(creven) wouter van kareloe alrehande redene(n) dede seggen ende/ besund(er)t dat hem alsulken aensprake nae inhebbe(n) van sijnre voirs(creven)/ goedingen aen de voirs(creven) goede gheen onstade doen en soude mids/ dat de voirs(creven) goede den voirs(creven) janne snoeck toe te behoe(re)n plaghen/ en(de) des waer hij wael getroest tot den vo(n)nisse der scepen(en) van/ loven(e) Op dwelc de meyer van loven(e) maende de scepen(en)/ van loven(e) die wijsden voir een vonnisse den voirs(creven) brueder gielise/ tot sijnen bethoon Ten daghe van thoenisse thoende de voirscr(even)/
//
brueder gielijs gelijc hem hij hem vermeten hadde Alsoe dat bij manisse(n)/ des meyers van loven(e) de scepene(n) van loven(e) ten eynde wijsden voir een/ vonnisse nae aensprake nae verantwerden nae thoenisse en(de) nae al/ dats voir hen comen wae(r) dat den voirs(creven) brueder gielisen inden name/ ende tot behoeff des voirs(creven) goidshuys van gruene(n)dale de voirs(creven) goede/ volghen selen cor(am) kersmak(ere) roelofs borch(oven) cap(elle)[ma(n)] smet maii xxiii