It(em) want wouter van vriesele als wittich man en(de) mombour/ joffr(ouwe) geertruden van helmont nat(ur)lic dochter des he(re)n wile(n) van/ helmont woute(re)n van quaderebbe als mombour joffr(ouwe) m(ar)griete(n) sijns/ wijfs zust(er) der voirs(creven) joffr(ouwe) geertruden hijnder en(de) stoet gemaect heeft/ inde heerlicheit rue(re)nde vanden tsijse toebehoe(re)nde den hove [van] berchghem/ gelege(n) tot he(re)nthout en(de) uut dien de [vors(creven)] wout(er) van vriesele hem pijnde/ belet te doen inde voirs(creven) heerlicheit also dat de meye(r) en(de) late vanden/ selve(n) hove de(n) vors(creven) woute(re)n van quaderebbe niet manen noch wijsen/ en wouden mer slote(n) thofrecht aldaer en(de) dien na te volghen heeft/ de voirs(creven) wout(er) van quaderebbe bi h(er) symoene pynnoc ridde(r) die na/ den recht der stat van loeven geleidt is tot de(n) goeden des vors(creven) wout(er)s/ van quaderebbe den voirs(creven) woute(re)n van vriesele tot loeven in doen/ scriven om de saken aldaer na den rechte gepurgeert te werden/ Daer om eest dat de voirs(creven) wouter van vriesele comen is opte(n) dach/ van huden voe(r) scepenen van loeven en(de) heeft gekendt en(de) gelijdt/ openbaerlic dat hi de saken leet staen en(de) berusten te des(er) tijt/ gelijc si stonden eer hi dese saken nu tot he(re)nthout begonste en(de)/ oft hi namaels beraden wae(r) e(n)nich recht hier af te vorde(re)n dat/ hi dat doen sal voe(r) meye(r) en(de) scepen(en) va(n) loeven en(de) ner/ ghens elde(r) Bekennende waert de vors(creven) wout(er) van vriesele/ so waer hi e(n)nich recht vorde(re)n woude van saken aengaende/ de(n) goeden die hi heeft van des vors(creven) sijns wijfs weghe(n)/ dat hi dat doen sal voe(r) meye(r) en(de) scepen(en) voirs(creven) en(de) nerghens/ elde(r) aengesien dat sij hae(r) goede met scepen(en) brieven/ van loeven houdende es coram lombart boys febr(uarii) xii