Cond sij allen lieden dat henric daems van holaer es come(n)/ in jegenwordich(ei)[t] d(er) scepen(en) van loeven en(de) heeft genome(n) en(de)/ bekendt dat hi genome(n) heeft van janne louijs thof geheten/ ten broeck des selfs jans mette(n) huysen hove(n) wynnende(n) lande(n)/ beemde(n) eeusele(n) heyden bosch weyden en(de) met allen sine(n) toebehoirte(n)/ inde p(ro)chie va(n) ov(er)yssche gelege(n) te same(n) mette(n) beemde die de selve/ ja(n) vercrege(n) heeft jege(n) merten brighets en(de) sine(n) zwag(er) uutge/ nome(n) de wate(re)n wuwe(re)n en(de) savore(n) aldaer inde welke de vors(creven) henric/ niet rechts hebbe(n) en sal Te houden te hebbe(n) en(de) te wynne(n) van/ half meye naist comende ene(n) t(er)mijn van sesse jae(re)n lanc deen na dand(er)/ d(aer) na sond(er) myddel volgende elcs jaers daer en bynne(n) om twelf/ gul(den) schilde d(er) mu(n)ten van loeve(n) en(de) ene(n) gulden pet(er) vanden slaghe/ des h(er)toge(n) van bourg(oignen) en(de) va(n) brabant beyde goede en(de) gheve/ tsente mertens misse inden wynter te betale(n) en(de) om vierthien/ sack rogs goede en(de) payabel pacht en(de) mate van ov(er)yssche met/ wanne en(de) met vede(re)n wael bereydt te weten acht sist(er) d(er) selv(er)/ maten voe(r) elken sack voirs(creven) gherekent alle jae(re) [hie(re)n bynne(n)] tsente andries misse/ / apostels te betale(n) en(de) tot loeven opt cost des vors(creven) wynne(n) te leve(re)n en(de) telke(n) t(er)mijn/ alse v(er)volghde schout Item sal de vors(creven) wyn alle de vissche die de vors(creven) jan/ jaerlex opte wate(re)n ten broeke vors(creven) en(de) oec ter moerlanen hebbe(n) sal tot loeve(n)/ daert de(n) vors(creven) jan gelieve(n) sal op des wynne(n) cost bri(n)ge(n) en(de) leve(re)n en(de) waert also/ dat de(n) vors(creven) janne e(n)nighe vuedinghe gebrake die sal hi cope(n) daert hem genueght/ en(de) de vors(creven) wyn sal die op sinen cost halen en(de) de(n) selven janne te(n) broeke vors(creven) leve(re)n/ It(em) en sal noch en mach de vors(creven) wyn opte houwe vanden bosschen des vors(creven) jans/ ald(aer) negheen beesten houden noch driven dan als de selve bossche(n) drie jae(r)/ out selen zijn mer sal die beeste(n) doen hueden en(de) v(er)wae(re)n also dat janne vors(creven)/ daer af egheen scade en come en(de) wae(r) dat hem d(aer) af e(n)nige(n) scade geschiede die/ sal de vors(creven) wyn de(n) selve(n) janne oprichten It(em) sal de vors(creven) wyn sijn berni(n)ghe/ moge(n) nemen om int vors(creven) hof te bernen aen hegge(n) en(de) haghen d(er) selv(er) goede/ ter minster scaden en(de) en sal egheen recht hebbe(n) e(n)nich hout te houwen op/ egheen vanden bossche(n) noch vorlen de(n) vors(creven) janne ald(aer) toehorende noch oec/ inde beemde die de vors(creven) jan v(er)crege(n) heeft jegen maelgiseer va(n) rosierbosch/ Ite(m) heeft de vors(creven) wyn noch genomen en(de) bekendt dat hi genomen heeft/ vanden vors(creven) janne louijs de thiende van haffligeem gelijc de selve/ jan die ten broeke te rosieren ter moleysen en(de) d(aer) omtrent vande(n) he(re)n/ van hafflighem genomen heeft Te houde(n) en(de) te hebbe(n) den vors(creven) t(er)mijn lanc/ duerende elcs jaers dae(re)n bynne(n) om twintich rijnssche gulden va(n) goude/ goede en(de) gheve tons(er) vrouwe(n) lichtmisse te betalen den vors(creven) t(er)mijn duerende/ en(de) telken t(er)mijn alse v(er)volghde schout Ite(m) of de(n) vors(creven) janne louijs bynne(n)/ de(n) t(er)mijn vors(creven) de vors(creven) thiende van haffligheem ontghinghe so soude de vors(creven) jan/ aende(n) vors(creven) wy(n)ne dair af ongehoude(n) zijn en(de) ontlast bliven It(em) sal de vors(creven) wyn/ alle tstro vande(n) vors(creven) goeden en(de) thiende comende int selve hof met sine(n) beesten/ etten en(de) sliten en(de) mest d(aer) af maken en(de) dat opt lant de(n) vors(creven) hove toebehorende/ wed(er) vue(re)n slants meesten p(ro)fijt en(de) nerghens elde(r) It(em) sal de vors(creven) wyn/ de(n) vors(creven) janne jaerlex hie(re)n bynne(n) leve(re)n achthondert goeder cusbae(r) walme(re)/ om de huysinge aldaer mede te houden en(de) te decken en(de) niet meer walme/ maken met tstro voirs(creven) te mest maken en(de) beke(re)n gelijc voirs(creven) is en(de) alsme(n)/ ald(aer) dect oft plect metst oft ty(m)mert d(aer)af sal de vors(creven) jan de dachhue(re)n/ betale(n) en(de) vors(creven) wyn sal de(n) wercliede(n) den montcost geven en(de) alsme(n) ald(aer)/ also werct so sal de vors(creven) wyn de(n) wercliede(n) den leem steke(n) en(de) leve(re)n/ en(de) vitselroeden theen en(de) dackroede(n) gheve(n) en(de) alsulken ty(m)merhout/ alsme(n) d(aer) verty(m)mere(n) en(de) beho[e]ven sal aende huysinghe stellinghe en(de)/ schue(re)n dat sal de vors(creven) wyn voe(r) tvors(creven) hof levere(n) It(em) sal de vors(creven) wyn/ de huysinghe ald(aer) houden vand(er) underster rikele(n) nederwart sond(er) cost/ des vors(creven) jans It(em) sal de vors(creven) wyn opte voirs(creven) goede houden hondert/ scape te minsten en(de) twelf hoet vees behalven sijn p(er)de It(em) sal de/ voirs(creven) wyn de voirs(creven) lande wel en(de) loflic wynnen en(de) werve(n) gelijc/ hier na bescreve(n) steet Te weten den roggen aert op vier getideghe/ voren en(de) de(n) ghersten aert oec op vier voren en(de) de evene op twee voe(re)n/ / ende op dleste jae(r) so sal de vors(creven) wyn den roggenaert besayt late(n)/ op vier getidige voren en(de) twee boend(er) ghersten op vier voren de evene/ op twee getideghe voren en(de) de brake eens o(m)me gedaen It(em) is vorw(er)de/ dat de vors(creven) jan op dleste jae(r) vande(n) vors(creven) t(er)mijn ene(n) sayer ald(aer) sette(n) mach/ die hem de twee aerde met goeden cusbae(re)n sade dwelc hem de vors(creven)/ wyn daer toe leve(re)n sal besayen sal den welken saye(r) de selve wyn/ sinen cost en(de) dachhue(re)n betale(n) sal It(em) es noch vorwerde dat de vors(creven)/ wyn jaerlex hie(re)n bynne(n) betale(n) sal de(n) co(m)mer en(de) tsijs die onse genedige/ he(re) de h(er)toge van brabant maelgiseer van rosierbosch en(de) die van genvaul/ aende vors(creven) goede hebben sonder cost en(de) last des vors(creven) jan louijs en(de)/ of de(n) selve(n) janne d(aer) af e(n)nigen scade quame die sal hem de vors(creven) wyn/ oprichte(n) It(em) sal de vors(creven) wyn de beemde aldaer wel en(de) loflic ryolen/ en(de) de grechten ald(aer) jaerlex ruymen en(de) vaghen en(de) te sinen afscheyde(n)/ die also late(n) It(em) sal de vors(creven) wyn de vors(creven) beemde mette(n) bogarde/ op dleste jae(r) vanden voirs(creven) t(er)mijne wel en(de) loflic v(er)maect laten En(de)/ oft de vors(creven) wyn op dleste jae(r) voirs(creven) sijn beesten inde bogarde/ lang(er) dan tot inganc meye meerte liet gaen so sal de vors(creven)/ wyn de beemde also v(er)make(n) dat de beesten inde beemde niet en gaen/ en(de) alsme(n) de straten en(de) rivie(re)n aldaer gebiedt te make(n) oft beleydt/ so sal de vors(creven) wyn die strate(n) en(de) ryvie(re)n also op sine(n) cost make(n)/ dat de(n) vors(creven) janne gheen scade oft last d(aer) af en come Ite(m) sal de/ vors(creven) wyn op dleste jae(r) vanden vors(creven) t(er)mijn tdijstelblock ald(aer) wel/ en(de) cusbaerlic v(er)maect en(de) beheymt laten It(em) is noch v(or)werde dat de/ vors(creven) wyn alle de appele(n) die wasse(n) sele(n) int vors(creven) hof jaerlex/ sal doen lesen op sine(n) cost en(de) die gelesen zijnde so sal de vors(creven)/ wyn tderdel vanden vors(creven) appele(n) met allen de(n) braetperen op/ sine(n) cost tot loeve(n) leve(re)n daert de(n) vors(creven) janne best gelieve(n) sal/ Ite(m) sal de vors(creven) wyn de(n) vors(creven) janne jaerlex hie(re)n [bynnen] gheven vijftich eye(re)/ tot paessche(n) It(em) sal de vors(creven) wyn opt leste jae(r) vande(n) vors(creven) t(er)mijn/ de messye en(de) de schuere ald(aer) vande(n) meste gheruymt laten wel en(de) cusbaer/ lic En(de) so wie vande(n) vors(creven) janne louijs en(de) henricke(n) sine(n) wy(n)ne scheyde(n)/ wilt dat sal hi mogen doen ten halven tide vanden vors(creven) t(er)mijn en(de)/ die also scheide(n) wilt die salt de(n) ande(re)n een half jae(r) te voe(re)n segge(n)/ En(de) alle dese vors(creven) punte(n) condicie(n) en(de) vorw(er)de(n) bove(n) bescreve(n) heeft de/ vors(creven) wyn de(n) vors(creven) janne geloeft wel en(de) volcomelic te houde(n) en(de) te/ voldoen talle(n) tijde(n) als si valle(n) en(de) v(er)schine(n) sele(n) in alle d(er) vuege(n) en(de)/mae(re)n manie(re)n bove(n) bescreve(n) en(de) telke(n) t(er)mijn als v(er)volghde schout/ En(de) hier af sijn burgen des vors(creven) wynne(n) alse p(ri)n(cipae)[le] sculde(re)n ongesund(er)t/ en(de) ongescheide(n) lodewijc vande(n) bossche gehete(n) keghel en(de) goessen/ tulbos de welke de selve wyn heeft geloeft hier af scadeloes/ te houde(n) en(de) tontheffen Hier wae(re)n ov(er) willem lomb(ar)t en(de) wout(er) wit(te)[ma(n)]/ scepen(en) va(n) loeve(n) gegeve(n) xxi dage i(n) febr(uario) int jae(r) ons he(re)n m cccc en(de) xxxvii