Van gheerde van houthem/ Item nae dien den vo(n)nisse dat bijden scepen(en) van loven onlanx leden gewijst es/ tusschen jasp(er) absoloens en(de) aerde vand(er) borch die na den rechte der stad van loven(en)/ beleidt sijn tot den goeden henrix wilen vander paelt in deen zijde en(de) gheerde van/ houthem die de wittighe docht(er) heeft des voirs(creven) wilen henrix in dande(re) van zeke(re)n/ goeden die bleven zijn nae de doet des voirs(creven) wilen henr(ix) vand(er) paelt en(de) katline(n)/ wilen smeets sijns wijfs Daer af de voirs(creven) jasp(er) en(de) aert inde rechte ov(er)gegeven/ hebben dat sij niet meer en beg(er)den dan ii[c] cronen eens voir de bastart kijnde(re)/ des voirs(creven) wilen henrix en(de) alsulken cost en(de) scade als sij int vervolgen vande(n)/ voirs(creven) goeden gehadt en(de) geleden hadden nae uutwisen vanden uut(er)sten wille(n) des/ voirs(creven) wilen henrix vander paelt gelijc tvo(n)nisse dat daer af gewijst es dwelc/ geregistreert steet ond(er) meest(er) gielijs vander stoct volcomelic begrijpt Soe sijn/ de voirs(creven) p(ar)tien weder comen int recht voir meye(r) en(de) scepen(en) van loven(en) daer/ weder aensprake en(de) verantwerden tusschen hen peh beyden geschiet es/ Also dat ten uutersten de scepen(en) van loven gemaent vanden meye(r) gewijst/ hebben voir een vo(n)nisse dat sij bliven bij alsulken vo(n)nisse als sij voirtiden daer/ af gewijst hebben en(de) alse vander cost daer op tvoirs(creven) yerste vo(n)nisse gewijst es/ es tvo(n)nisse also verre als jan vander paelt natuerlec soen des voirs(creven) wilen/ henrix vander paelt en(de) henr(ic) de plecke(re) sijn zwager die de bastart docht(er) heeft/ des voirs(creven) wilen henrix vander paelt houden dorren tot hoe(re) eet soe wes cost/ oft last dat sij int vervolgen vanden voirs(creven) goeden gehadt hebben totte(n) daghe/ toe van heden dat hem de voirs(creven) gheert dien opleggen sal en(de) als dat gheschiet/ es selen de voirs(creven) jasp(er) en(de) aert den voirs(creven) gheerde de brieve ov(er)geven lombart/ abs(oloens) lye(mingh)[en] roelants cap(elle)[ma(n)] velde lynthris iunior junii xxi/