Van henricke witteman/ Het sijn come(n) in rechte voir meye(r) ende scepen(en) van loeven(e) inde/ banck aldaer raes van graven he(re) van heev(er)le ende van malevie(n) in/ deen zijde ende willem wittema(n) natuerlec soen wouters wilen/ wittema(n) die nae den rechte der stat van loeven(e) beleit is tot den/ goeden henrix wittema(n) sijns wittichs brueders oec soen des voirs(creven)/ wilen wouters in dande(re) alse van seke(re)n bedrive van rechte te doen/ van goeden ende ontgoeden metten pontghelde ende heerscap daer/ toe hoe(re)nde die de voirs(creven) henr(ic) wittema(n) hem ond(er)wonde(n) hadde ende te/ hemwaert track vanden tsijse van daelhem alsoe verre de ond(er)pande/ vanden selve(n) tsijse onder de heerlich(eit) des voirs(creven) raes inde p(ro)chie/ van heev(er)le gelegen wae(re)n Daer af de voirs(creven) raes van grave(n) nae/ dat de voirs(creven) willem versocht hadde datme(n) hem daer af in sine(n)/ beleide houden woude een aensprake dede tot den voirs(creven) willem(me)/ waert seggen(de) dat de voirs(creven) willem aen de voirs(creven) pontpe(n)ninc en(de)/ heerlich(eit) vanden voirs(creven) tsijse verdoelt wae(r) ende dat hij dat ond(er)/ sijn heerlich(eit) van heev(er)le niet hebben en soude ende dat waer/ redene(n) waer bij want hij sijn heerlich(eit) van heev(er)le te leene/ houden(de) wae(r) van onsen gened(igen) he(re) van brabant ende soe wat/ heerscap ond(er) sijn heerlicheit van heev(er)le gelegen waer oft soe/ wie onder hem dbedrijf van rechte pontgelt oft heerscap hadde/ datme(n) dat voert hielt van hem te leene oft ten erfdo(m)me ende/ dat dat wae(r) waer wae(r) dat boet hij te thoene(n) ende metten/ mynsten mede inden rechte te lyden Hopende soe waer hij dat/ gethoene(n) conste dat hem tpontghelt ende de heerlich(eit) vande(n)/ voirs(creven) tsijse volgen soude ende dat de voirs(creven) willem mids macht/ van sine(n) beleide gheen heerscap bedrijf van rechte noch pont/ ghelt onder hem noch sijn heerlicheit hebben en soude gemerct/ dat hij die van hem noch te leene noch ten erfdo(m)me en/ hielt Seyde oec de voirs(creven) raes he(re) van heev(er)le dat hij te heev(er)le/ van pontghelde den xx[sten] pe(n)ninc hief alsme(n) e(n)nighe goede/ dieme(n) van hem hielde verthierde ende dande(r) die oec heerscap/ aldaer onder hem hadden oec den xx[sten] pe(n)ninc ende dat/ boet hij oec te thoene(n) ende de voirs(creven) henr(ic) wittema(n) woude/ heffen den x[sten] pe(n)ninc ende also meynde hij dat hij daer/ mede verdoelt wae(r) ende dat hij onder hem gheen bedrijf van/ rechte noch pontghelt heffen noch hebben en soude mer dat/ hem ende sijnre heerlicheit volgen soude Noch dede seggen de/ voirs(creven) he(re) van heev(er)le dat hij de voirs(creven) sake vervolght hadde/ voir ons gened(ichs) he(re)n stedehelde(r) ende sijn ma(n)ne(n) van leene en(de)/ die aldaer inne geset te vo(r)en ende eer de voirs(creven) willem hem/ nae den rechte vander stat van loeven(e) tot des voirs(creven) henrix goede(n)/ hadde doen leyden dwelc hij oec boet te thoene(n) hoepte en(de) seyde/ / soe waer hij dat ghethoenen conste dat de voirs(creven) sake daer voirt gehandelt/ soude werden ende al w(aer)t alsoe dat de voirs(creven) willem allige(re)n mochte e(n)nighe/ possessie dat hoepte hij dat hem gheen onstade doen en soude aen tpontgelt/ ende heerlicheit mer den tsijs kende hij hem voer alle vo(n)nissen gemerct/ dat hij sijn heerlich(eit) van m(ijn) gened(igen) he(re) te leene hielde ende in m(ijns) gened(ichs)/ he(re)n leene gheen possessie en wae(r) dwelc hij oec boet te thoene(n) ende/ dies wae(r) hij getroest tot den vo(n)nisse hier op verantwerde hem de voirs(creven)/ willem ende dede seggen dat hem de voirs(creven) aensprake gheen onstade/ doen en soude ende reden waer bij want de voirs(creven) henric ende sijn/ vorde(re)n tvoirs(creven) bedrijf van rechte van goeden ende ontgoeden gehadt/ ghebruyct en(de) gepossesseert hadden ende den x[sten] pe(n)ninc van pont/ ghelde daer af alsme(n) e(n)nighe goede cochte of vercochte gehadt en(de)/ gehave(n) over xxxi oft over xxxv oft over xl jair ende daghe en(de)/ dat dat waer wae(r) dat boet de voirs(creven) willem te thoene(n) ende metten/ mynsten daer hij mede liden mochte inden rechte Seggende voert waert/ alsoe dat yema(n)den rechts gebrake vanden goeden daer op de voirs(creven)/ henric sine(n) tsijs hief dat dat voir sine(n) meye(r) ende late geschien/ soude ende oft sijs niet wijs en wae(re)n dat sij dan te loeven(e) ten hoode/ comen souden ende alse e(n)nighe goedinghen voir de voirs(creven) meye(r) ende/ late geschieden dat sij gewoinlic wae(re)n te loeven(e) te come(n) ende/ dragent voir de scepen(en) van loeven(e) om dat voirt van hen beseghelt/ te worden ende dat boet de voirs(creven) willem oec te thoene(n) Hoepte/ ende seyde soe waer hij dit gethoene(n) conste dat hij inde possesie/ vanden voirs(creven) bedrive van rechte te doen ende vanden pontghelde/ blive(n) soude ende dat de voirs(creven) raes hem met sulken besceide daer/ uut niet we(r)en en soude gemerct dat hij niet en bode te thoene(n)/ datment van hem te leene houdende wae(r) oft dat hij in sijn leenboec/ gescreve(n) stont oft dat yemant van hem te leene ontfangen hadde/ oft man daer af geweest wae(r) Noch seyde de voirs(creven) willem waert/ also dat hem dese pointen te cleyn wae(re)n des hij hoopt dat niet/ en es soe boot hij oft de voirs(creven) henr(ic) hoir behout te doen oft de ghene/ die dat sculdich wae(r) te doen alsoe dat nae den rechte der stat van/ loeven(e) behoe(re)n soude mer hij hoepte dat hijs niet en behoefde welc/ behout hij oec verclaerde inden rechte Hier op worden de scepen(en)/ van loeven(e) gemaent vanden meye(r) die wijsden voir een vo(n)nisse/ want hen de voirs(creven) p(ar)tien thonis vermete(n) hadden dat beg(er)den sij aen/ te ho(r)en ende dae(re)n teynden recht ende dbehout dat de voirs(creven) willem/ geboden hadde dat behielden sij te henwaert Ten daghe van thoenisse/ thoende de voirs(creven) raes dat den voirs(creven) tsijs van daelhem inder prochie/ van heev(er)le wae(r) gelegen Voirt thoende hij met goeden ma(n)ne(n) daer/ af deen was jan dierix geheten vander mo(n)nicken dat de abdt/ / van p(er)ke de he(re) van wavre ende her henr(ic) van wailhain heerscap hadde(n)/ liggende onder den voirs(creven) raese van graven te heev(er)le ende dat sij den xx[ste(n)]/ pe(n)ninc van pontghelde hieffen ende dat sij dat van hem te leene oft/ ten erfdo(m)me hielden ende de voirs(creven) jan dierix droegh voirt dat dabdt/ vanden p(er)ke onder den voirs(creven) rase tot sulken plaetsen hief den x[sten]/ pe(n)ninc van pontghelde Voirt thoende hij dat hij sijn heerlicheit van/ heev(er)le te leene hielt van onsen genedigen he(re) ende dat in ons gened(ichs)/ he(re)n leene gheen possessie en wae(r) Hier nae volght des voirs(creven)/ willems thoenisse Inden yersten dede hij daer lesen eene(n) brief vand(er)/ daten m ccc ende lxix op sent thoemaes dach den welken brief/ begreep datmen voir meye(r) ende late lauwreys wilen van humelge(m)/ goedinghe gedaen hadde van eene(n) huyse ende hove gelegen te/ daelhem inde prochie van heev(er)le ende dat die late voirt bracht hadde(n)/ voir de scepen(en) van loeven(e) die dat voirt opte selve late beseghelt hadden/ It(em) voirt dede hij lesen ene(n) brief vander date(n) m ccc en(de) lxxxii xiiii/ daghe in merte daer mede jan van ghind(er)bove(n) van eev(er)sb(er)ghe bekent/ hadde henri(cke) van ghind(er)boven sijne(n) brueder dat hem den voirs(creven) tsijs/ van daelhem in deylinghen gevallen wae(r) ende dat de selve henr(ic)/ janne wilen de witte van overloe inden selven tsijs gegoet ende/ geerft hadde voir meye(r) en(de) laten der kijnde(re)n jans wilen witten/ welc late dat voirt bracht hadden aen de scepen(en) van loeven(e) Item/ noch eene(n) brief vand(er) daten m cccc en(de) een xiiii daghe in/ merte daer mede bastijn ende willem vanden perre gebruede(re)/ gegoet ende geerft hadden ene(n) gehete(n) henri(cke) mathe inde drie/ vierde gedeelte van huyse en(de) hove met sijne(n) toebehoirten/ gelegen te daelhem inde prochie(n) van heev(er)le voir meye(r) en(de)/ late wouters wittema(n) ende die late haddent oec voirt bracht/ aen de scepen(en) van loeven(e) Daer nae thoende de voirs(creven) willem/ met twee goeden ma(n)ne(n) dat de voirs(creven) henri(c) ende sijn voirseten/ tvoirs(creven) bedrijf van rechte van goeden ende ontgoeden gehadt/ ende gehanteert hadden ende den x[ste(n)] pe(n)ninc van pontghelde/ alsmen e(n)nighe goede daer af verthierde gehadt ende gehaven/ over xxx jaer over xl jaer en(de) over meer Voert droegen/ de selve goede ma(n)nen dat soe wa(n)neer voir meye(r) ende late des/ voirs(creven) henrix in sine(n) voirs(creven) hof e(n)nighe goedinghen gescieden dat/ die late gewoinlic wae(re)n dat te bringhen voir scepen(en) van loeven(e)/ die dat voirth op hem beseghelden ende dat sij dat oec gedaen/ hadden over xxx jaer ende ov(er) xl jaer ende daghe ende dat/ hoir beste wae(r) waert dat p(ar)tien voir de selve meye(r) ende late/ dinghden ende der saken niet wese wijs en wae(re)n dat sij daer/ mede come(n) souden aen de scepen(en) van loeven(e) als aen hoir hoot/ met alrehanden meer thoenissen die in beiden sijden geschieden/ weynich oft niet int recht dienende Alsoe dat de meye(r)/ van loeven(e) voirt maende de scepen(en) van loeven(e) die wijsden/ voir een vo(n)nisse dat alsulken aensprake als de voirs(creven) raes van/ graven gedaen hadde tot den voirs(creven) willem(me) waert dat die den/ selve(n) willem(me) noch sine(n) beleide gheen onstade doen en soude pynnoc/ opp(endorp) rijke abs(oloens) ov(er)winghe sept(embris) x