It(em) uut dien dat jan van postpo van brakeneyghen poirter der stad van loeven(e) t(er) eener zijd(en)/ ende jaq(ue)mart bacheler alse rintmeester m(ijns) gened(ichs) he(re)n sh(er)togen ter ande(re) comen sijn voe(r) den ra(ede)/ der stad van loeven(e) aldaer de voirs(creven) jan opdede dat de selve rintmeester met wille ende/ sonder hantheringhe van rechte hem uutgedaen ende in stucken gehouwen hadde twee/ waterbuysen de welke de selve jan op sijn proper erve ende sonder yeman(de) schade oft/ hijnder alsoe hij seyde onlangx geleeght ende vernuwet hadde gelijc ende inder vueghen/ men van ouden tijden aldaer ende daer omtrint doen mochte ende gewoenlijc wae(re) te/ doen ende soude daer af yeman(de) calaenge doen die hoirde te doen den smalen he(re)/ aldaer hoghe gerichte hebbende ende met den voirs(creven) rintmeester begerende daeraf/ de voirs(creven) jan v(er)richten ende behoirlike rep(ar)atie te hebben en(de) in sijnre possessien gehouden/ te worden tot aend(er)re tijt dat hij met ende nae den gemeynen rechte daer uut gewo(n)nen/ ware met meer woirden te weten ande(re)n cortelinge van geliken verrichtinge jeghen/ den selven rintmeester geschiet ware (et)c(etera) den voirs(creven) rintmeester daer op verantwordende/ ende kynnende dat hij de voirs(creven) buysen ontwee gehouwen hadde mair hij hadde dat den/ voirs(creven) janne doen kundighen meynende dat hij dat alse rintmeester des ov(er)he(re)n dien/ alle vlieten ende de kynnesse daer af toebehoirden wel doen mochte ende want/ de selve buysen sonder sijnen consente geleyt waren ende hijnd(er)lic alsoe hij seyde aen/ den strome oft vlyete voirs(creven) so hoepte hij eyntelijc dat hij de voirs(creven) calaenge alsoe/ te rechte gedaen hadde ende dat de voirs(creven) jan des van hem mogeliken te vredenstaen/ soude (et)c(etera) soe heeft daer de raet vander stad van loven de voirs(creven) p(ar)tien int langhe/ aengehoirt ende yegelijx bescheyt get(er)myneert en(de) uutgesproken en(de) tgemeyn/ recht wael geweghen voer recht en(de) bescheyt get(er)mineert ende uutgesproken/heeft in hoe(re)n vollen rade dat de voirs(creven) rintmeester den voirs(creven) janne rep(ar)atie/ en(de) verrichten doen sal vanden voirs(creven) buysen ende weder legghen also hij die vant/ doen hij de selve buysen instucken hyeuwe oft dede houwen ende dat gedaen/ eest dat hij alse rintmeester de voirs(creven) buysen calengie(re)n wille dat hij dat doe/ met rechte ende handelingen van wette daer en(de) alsoe dat behoirt en(de) sculdich/ es te gheschiene Act(um) in pleno consilio fe(r)ia quarta junii ultima anno xiv