It(em) jan de raet soen wilen pelgrijms de raet in teg(enwordicheit) der scepen(en) van loeven(e) gestaen he/ heeft gekent en(de) gelijdt dat jannes vanden hove voertijden doeghdelic tegen hem ge/ cocht en(de) gecregen heeft alrehande goede te herssel en(de) inden lande van arschot te/ werchte(r) en(de) elswair d(aer)omtrent gelegen gelijc die genoempt en(de) gespecifieert staen/ inden scepen(en) brieve(n) van loeven(e) d(aer)af gemaic sijnde en(de) dat hij hem vanden selve(n)/ goeden en(de) cope ov(er)lang wittelic en(de) wel betaelt heeft en(de) dueghdelic v(er)nueght/ alsoe dat hij den selve(n) ja(n)nese vanden hove van dien goeden en(de) cope en(de) van/ alsulker quiti(n)gen als jannes hem aende selve goede bekent hadde en(de) voert/ van allen ande(re)n sculden brieven gelufte actien vorw(er)den en(de) toeseggen d(aer) inne/ de selve ja(n)nes vanden hove ten voirs(creven) janne waert gehouden mocht zijn/ uut ocsuyn vanden voirs(creven) cope oft e(n)nichs sins and(er)s tot den daghe toe van heden/ volcomelic quijtschelt voe(r) hem en(de) sijn nacomeli(n)ge teeweghen daghen geloven(de)/ de voirs(creven) jan de raet den voirs(creven) ja(n)nese noch sijn voirs(creven) goede daer aff/ ne(m)m(er)meer aen te spreken te eysschen oft te moeyen bij hem selven noch by/ nyemande and(er)s noch hem rechts tot den selven goeden dan die te mogen/ lossen oft and(er)s te v(er)meten in e(n)inger manie(re)n bekenne(n)de voirt de selve/ jan de raet dat hij ja(n)nese vanden hove nye en beval noch en (con)senterde/ vanden voirs(creven) gelde oft coepe e(n)inch gelt goet oft wa(r)e te gheven arnde/ van seve(n)berghe bastart noch janne molema(n) en(de) dat ja(n)nes hem oic/ nye ind(er) voirs(creven) betalinge(n) af en corte noch en rekende e(n)nich gelt oft/ goet dat hij den voirs(creven) p(er)sonen oft e(n)nigen van hen van jans raets/ weghen soude hebben gegeven oft betaelt wynge willemair aug(usti) xii