Vranck van dyeven/ geleydt (et)c(etera)/ It(em) want ten vervolghe vranx van dyeven onss ingeseten poirters/ die bij zeke(re)n myddele van rechte ov(er)mids vo(n)isse van scepen(en) brieven/ van loeven(e) comen en(de) geleydt es totten [goeden] jans byesewale bontwerckers/ gescreven es geweest aende bailliu van geldenaken dat hij bedwonge/ wille(m)me gielb(er)t sijn hadde hande af te doen vanden goeden h(ier) nae genoempt/ den voirs(creven) goeden toebehoiren(de) Yerst van eene(n) huyse en(de) hove gelegen bynne(n)/ geldenaken opte merct tusschen de goede maroye wylloy en(de) de goede/ wijlen loren fielx dieux It(em) van eenen stuck lants houden(de) vijf en(de) een/ half dach(mael) gelegen te gotta tusschen de goede jans cakereel en(de) de/ goede d(er) he(re)n van chanthrain Ende woude de selve jan [gielb(er)t] hem rechts/ totte(n) voirs(creven) goeden vermeten dat hij des op heden alh(ier) tegen den/ voirs(creven) vrancke(n) te rechte gecompareet wae(re) D(aer) hij niet comen en es/ den voirs(creven) vrancken hem ald(aer) v(er)wachtende v(er)suecken(de) vanden voirs(creven)/ goeden in sijne(n) beleyde gehouden te werden So hebben de scepen(en)/ van loeven(e) t(er) manissen smeyers en(de) by contu(m)acien des voirs(creven) gielb(er)ts/ gewijst voe(r) een vo(n)nisse datmen den voirs(creven) vrancken vanden voirs(creven)/ goeden houden sal in sijnen beleyde alse verre het noch voe(r) scepen(en)/ comen es cor(am) kersma om(n)ib(us) scab(in)is dempto kersmake(re) julii xxiii