It(em) jan de moer geheten bastijns heeft ov(er)gegeven geconsenteert en(de) geloeft/ dat alwaert alsoe dat katlijne dochter bastijns wilen de moer zijns brued(er)s/ voir hem aflivich wordde dat nochtans de kynde(re) marien wilen/ bastijns zijnre zuster die zij hadde van arnde coursay en(de) de kynde(re)/ margrieten wilen moers oic suster des voirs(creven) jans die zij hadde va(n)/ arnde wilen carbeel deylen zelen en(de) hen sal laten deylen gelijc hem/ in alle de goede have en(de) erve die na der voirs(creven) katlijnen bliven zelen/ hoedanich die zijn Alsoe dat de voirs(creven) kynde(re) staen zelen in hoe(re)r moed(er)/ stad en(de) de selve goede gedeilt zelen werdden in drie gelike p(ar)cheelen/ d(aer)af hij hebben en(de) trecken sal deen deel de kynde(re) d(er) voirs(creven) wilen marien/ dande(r) en(de) de kynde(re) d(er) voirs(creven) wilen margrieten tderdde Ende heeft/ voirt geloeft de voirs(creven) jan den voirs(creven) kynde(re)n in des voirs(creven) es nu(m)m(er)meer/ stoot of letsel te maken in e(n)nig(er) manier(re)n maer hen en(de) eene(n)yegelike(n)/ dat aengaende d(aer)af altijt genoech te doen alsoe dat hen vast en(de) genoech/ zijn moege voerts zo zijn de voirs(creven) jan t(er) eenre zijden henrick vand(er)/ heyden inden name lijsbetten zijns wijfs docht(er) des voirs(creven) wilen arnds/ carbeel en(de) inden name vanden ande(re)n kynde(re)n des selfs wilen arnds/ en(de) de voirs(creven) arnd coursay inden name van zijnen wettigen kynde(re)n die/ hij heeft vand(er) voirs(creven) wilen marien zijnen wive in dande(r) zijde ov(er)come(n)/ en(de) hebben geconsenteert dat de voirs(creven) jan de moer der voirs(creven) katlijnen/ die een kynts [en(de)] stom kynt es houden sal moegen alsoe lange als hem/ gelieft voe(r) xii pet(er)s tsjaers die hij van hae(re)n goeden nemen sal en(de)/ daer voe(r) sal hijse houden van allen behoeften uutgedaen van cleedi(n)gen/ de welke men nemen sal vander ov(er)baten vanden selven goeden ende/ wes dan skynts goede dae(re)n boven [daeraf] ov(er)schiett salmen aenleggen/ en(de) beke(re)n ten orbe(re) en(de) p(ro)fijte vander selver katlinen roel(ofs) j(aspar) abs(oloens) ja(nuarii) xx
//