Cond zij allen lieden dat jan pauwels woenen(de) topvelpe zoen wilen/ jans in teg(enwoirdicheit) d(er) scepen(en) van loeven gestaen heeft genomen en(de) bekent/ dat hij genomen heeft van joffr(ouwe) katlinen van berthem weduwe/ jans wilen loenijs thof ten broecke der selv(er) weduwen metten/mett beemde die de voirs(creven) wilen jan [loenis] vercregen heeft jeghen/ mertene brughets en(de) zijnen swag(er) en(de) ande(re)n zijnen toebehoirte(n)/ gelijc de voirs(creven) wilen jans loenijs dat ald(aer) te houden plach/ en(de) jan oliviers dat nu in jaerschae(re)n gehouden heeft en(de)/ gelegen zijn inde p(ro)chie van overijssche en(de) d(aer)omtrint uutgeno/ men de wate(re)n wuwers en(de) savoiren ald(aer) d(aer) inne de wyn gheen/ recht hebben en sal Te houden te hebben en(de) te wynnen/ van halfmeye naestcomen(de) eene(n) t(er)mijn van zess jae(re)n langh/ deen na dand(er) staphans volgen(de) Elx jaers dae(re)n bynnen/ voe(r) drien(de)twintich gripen xl pl(a)c(cen) voe(r) de gripe gerekend te/ sente mertensmisse te betalen der voirs(creven) weduwen alle jae(re)/ den voirs(creven) t(er)mijn due(re)nde en(de) telken t(er)mijne alse vervolghde/ schout Met vorwerden dat de wynne op te houwen vanden/ bosschen negheen be[e]sten houden noch driven en mach dan/ als de selve bosschen drie jaer oudt zijn by alsoe dat de/ selve wyn de beesten alsoe sal doen hueden dat de weduwe/ aen hue(re) voirs(creven) bosschen gheen schade hebben en sal en(de) oft zij/ d(aer)aen e(n)nige schade lede die heeft de wynne geloeft op/ te richten It(em) sal de wynne zijn berringe moegen neme(n)/ aen heggen en(de) hagen d(er) selv(er) goede ter minst(er) schaden maer/ en sal gheen hout moegen houwen op vorlen of bosschen/ noch oic inde beemde die vercregen zijn tegen mailgifer/ van rosierbosch It(em) sal de voirs(creven) wynne alle tstroe vanden/ voirs(creven) goeden comende int voirs(creven) hof met zijnen beesten/ slijten en(de) mest d(aer)af maken en(de) vue(re)n opte voirs(creven) lande/ slands meesten p(ro)fijte It(em) sal de wynne hie(re)n bynnen jairlix/ leve(re)n vijftich goeder cusbae(re)r walme(re) om de huisinge d(aer)mede/ te decken en(de) niet meer walme(re) moegen maken maer tstroe/ voirscr(even) te meste maken en(de) beke(re)n als voirs(creven) es It(em) waert/ alsoe dat der voirs(creven) weduwen geliefde meer walms/ of riet te coepen so sal de voirs(creven) wynne dien walm of/ riet dair zijt coept halen en(de) int voirs(creven) hof vue(re)n en(de)/ alsmen ald(aer) dect plect oft metst oft ty(m)mert d(aer)af sal de/ weduwe de dachhue(re)n betalen en(de) de wynne sal den/ werclieden den montcost geven en(de) d(aer)toe leem vitselroeden/ theene en(de) vitsel[dack]roeden leve(re)n en(de) de huisinge houden/ vand(er) und(er)ster rikelen ned(er)wart op zijnen cost [It(em) heeft de voirs(creven) weduwe geleent den wynne tsijne(n) ae(n)comen xxiii pet(er)s d(er) mu(n)ten (et)c(etera) die hij hae(r) tsijnen afscheiden wedergeven sal] It(em) sal/ de voirs(creven) wyn de voirs(creven) lande wel en(de) loflic wynnen/ en(de) werven gelijc hierna bescreven steet te weten den
//
roggene(n)aert op vier getidege voren en(de) den gersten aert op drie/ voren en(de) devene op twee voe(re)n en(de) op dleste jaer den roggen/ aert besaeyt laten op vier getidege voren en(de) vi dachmail/ g(er)sten op drie voe(re)n en(de) devene op twee voren en(de) de brake/ eens omgedaen It(em) es vorwerde dat de voirs(creven) weduwe op/ dleste jaer vanden voirs(creven) t(er)mijne eenen saeyer setten mach/ die haer de twee arde besaeyen sal met goeden cusbae(re)n/ sade dwelc haer de wyn d(aer)toe leve(re)n sal en(de) den saeyer/ zijn dachue(re)n en(de) montcost geven It(em) es vorwerde dat [de] voirs(creven)/ wynne jairlix hie(re)n bynnen betalen sal [sonder afslach] den co(m)mer en(de)/ tsijs die onse gened(ige) he(re) de hertoge van brabant mailgifeert/ van rosierbosch en(de) die van genvaul aen de voirs(creven) goede hebbe(n)/ sond(er) cost oft laes last der voirs(creven) weduwen En(de) of hae(r) d(aer)af/ e(n)nige schade quame die heeft geloeft de voirs(creven) wyn op te/ richten It(em) sal de wyn den voirs(creven) t(er)mijn due(re)nde de beemde/ ald(aer) wel en(de) loflic ryoelen en(de) de grechten ruymen en(de)/ vagen en(de) die tsijnen afscheiden alsoe laten en(de) desgelijx [die] oic/ tsamen metten bogarde wel en(de) loflic [laten] v(er)maect en(de) oft/ hij inden bog(ar)t zijn beesten liet gaen lang(er) dan tot inga(n)g/ merte so sal hij de beemde alsoe v(er)maken dat de/ beesten d(aer) inne niet en gaen It(em) alsmen de straten ald(aer)/ en(de) rivie(re)n ald(aer) gebiedt te makene oft beleidt so sal de/ wyn die op zijnen cost alsoe maken dat d(er) weduwe(n)/ d(aer)af gheen schade en come en(de) sal de wynne op dleste/ jaer van zijnen t(er)mijne tdistelbloc ald(aer) wail en(de) loflic/ vermaect en(de) beheympt laten It(em) es vorwerde dat de wyn/ alle dappele jairlix ald(aer) wassende die zij in beiden/

sijden te geliken coste [van hen beiden sal] selen doen lesen sal doen lesen/ en(de) de helicht d(aer)af met allen den praet braetpe(re)n op/ zijnen cost te loeven leve(re)n daert d(er) voirs(creven) weduwen best/ gelieft It(em) sal de voirs(creven) wynne op dleste jaer van zijne(n)/ t(er)mijne de messie en(de) schue(re) ald(aer) geruympt laten wel en(de)/ cusbaerlic Ende alle dese vorwerden (et)c(etera) H(ier)af zijn borge(n)/ svoirs(creven) wynnen henrick pauw lyebrechts zijn brued(er) en(de)/ jannes van ophem geheten gelts van bierbeke (et)p(ri)m(us)/ roela(n)ts meersberghe maii x/

S(ententiatu)m p(er) joh(ann)em loenijs t(am)q(uam) adductum ad bona do(micel)[le] ka(thari)[ne] ei(us) m(at)ris cor(am) cok(eroul) sa(m)ps maii xvii a(nn)[o] lviii (et) e(st) add(uctus) cor(am) eisd(em)

S(ententiatu)m p(er) joh(ann)em loenijs t(am)q(uam) add(uctum) ad bona q(uo)nd(am) do(micel)[le] ka(thari)[ne] ei(us) uxor(is) cor(am) lynt(re) cok(eroul) oct(obris) xxviii a(nn)[o] lix (et) e(st) add(uctus) ad bona mo(bi)[lia] (et) i(n)mo(bi)[lia] p(ro)u[t] (et) eius fideiussoru(m) eisd(em)