Alzo als op heden comen zijn by den rade vand(er) stad alhier jan huet/ en(de) met hem martin philippe geheten le febvre bege(re)nde navolgen(de)/ eene(n) c(er)tificacie brieve reco(m)mandacie brieve die vanden rade va(n)/ brabant comen wae(re) datmen hem ontco(m)meringhe van rechte/ dade vanden geschille vand(er) rekeni(n)gen en(de) van zeke(re)n v(er)cochten/ goeden uutstaende alhier en(de) in rechte gevesticht voe(r) den/ rade vand(er) stad tuschen den voirs(creven) janne huet t(er) eenre zijden/ en(de) odry le bys van famillereux en(de) met hem reyne(re)n de/ custe(re) en(de) jacobpe de le croilliere behuwde zoen des voirs(creven)/ odrys beide na des(er) stad rechte beleidt tot desselfs odrys/ goeden t(er) ande(re) D(aer)op de selve odry en(de) zijn beleidde andw(er)de(n)/ en(de) begheerden alzo zij voir gedaen hadden dat de voirs(creven) jan/ vestich(eit) stelde beide van coste van thoeniss(en) en(de) and(er)s ind(er) saken/ behoevende en(de) de t(er)mi(n)acie en(de) tgewijsde te houden ende/ te voldoen ofts noot wae(re) zunderlinge gemerct dat de/ voirs(creven) jan in henegouwe oft dair by alzo woende en(de) and(er)s/ na zinen staet gescapen wae(re) den bedwanghe van rechte/ alhier tond(er)bliven Hopen(de) dat van reden(en) en(de) rechts wegen/ dat alzoe behoirde zund(er)linge te voird(er) want de voirs(creven)/ odry alsulk(en) caucie selve aleer hadde moeten hier in des(er)/ saken doen Bege(re)nde na dat de selve jan alsulken vestich(eit)/ gedaen hebben zoude dat de voirs(creven) zake mids visitacien vand(en)/ gescriften en(de) thoeniss(e) gehoirt zijnde geexpedieert worden/ mochte Op all dwelke de voirs(creven) jan en(de) zund(er)linghe de/ voirs(creven) martin alrehande hoghe opdragende woirde/ sprekende Zeiden dat zij gheen vestich(eit) doen en souden/ gem(er)ct dat zij selve eyssen(de) wae(re)n en(de) en wilden hen oic/ tot gheenen appoi(n)temente gheven dair zij en(de) huer wed(er)p(ar)tie/ begruett geweest wae(re)n alzo beide de selve p(ar)tien uut d(er) came(re)n/ v(er)togen wesen(de) en(de) ind(er) saken biden rade alh(ier) gesproken ende/ ov(er)dragen zijnde den selven p(ar)tien uutsprake te doene/ Sijn de voirs(creven) huet en(de) m(ar)tin t(er) stont en(de) zond(er) de voirs(creven)/ uutsprake te v(er)beiden of orlof [ande(re)n] dach te nemen onwerdichlic/ ewech getogen En(de) tvoirs(creven) ov(er)drach was t(er) memorien gestelt/ te weten want int stuck vand(en) voirs(creven) rekeni(n)gen de voirs(creven) p(ar)tien/ in (con)trarien faiten bevonden wae(re)n en(de) dat de voirs(creven) odry oic/ hadde geboden te thoene(n) dat de voirs(creven) huet tot den voirs(creven)/(con)sent gegeve(n) hadde dwelc hem de selve huet ontkende was/ ov(er)dragen thoeniss(e) d(aer)op tae(n)hoeren en(de) [om] int p(ri)ncipail ontco(m)m(er)lic voirt/ te varen alsoe behoe(re)n zoude en(de) dat stuck vand(en) voirs(creven) caucien te doen/ totte(n) ynde van dien berusten zoude En(de) op dat de voirs(creven) odry en(de) zijn/ beleidde croenden dat hen tvoirs(creven) bloexken erfs geheten closin en(de) de/ vruchten die hij d(aer)op gewo(n)nen hadde byden voirs(creven) huet of den/ he(re) op vrouwe va(n) fa(m)illereux ongebruyckich gemaict wae(re)n/ d(aer)af recht te doen also na gelegenth(eit) behoe(re)n soude dit/ geschiede cor(am) borch(oven) subsit(tu)[to] coker(oul) burgim(a)g(ist)ris ludo(vi)[co] de/ oppend(orp) f(eria) iii ap(ri)l(is) x