It(em) also zeke(r) geschill uutstont tusschen mijnen he(re) den abdt tsgoidsh(uys)/ van everbode inden name vanden selven goidshuyse in deen zijde ende/ gheerde roelants wynne vanden hove ende goeden svoirs(creven) goidshuys tot/ aweyns in dande(re) alse vanden diversen gebreken ende eyschinghen/ die zij malcande(re)n eyschende waren vanden drie jairen der vors(creven) pech/ tinghen die uutghinghen te halfmerte lxvii So zijn comen voer/ scepen(en) van loeven h(er)bertelmeeus vanden valgate proofst en(de) h(er)willem/ de becke(re) van oesterwijck svoirs(creven) goidshuys backmeester inden name/ vanden selven goidsh(uyse) en(de) marie wettich wijf svoirs(creven) gheerds nu mids/ siecten absent zijnde ende wouter de witte die der voirs(creven) gehuysschen docht(er)/ getruwt heeft ende joes roelants svoirs(creven) wynnen brueder ende joes/ me(n)nekens der voirs(creven) marien brueder inden name ende van weghen/ svoirs(creven) gheerds den welcken de selve wouter joes en(de) joes h(ier)inne geloeft/ hebben te vervanghen Kynnende en(de) lyende dat zij bij middele van/ vrienden ov(er)comen waren vanden voirs(creven) geschille also hier na volght/ Ierst dat de voirs(creven) gheerd quijt en(de) ongehouden bliven sal va(n) allen/ den pachten die hij den voirs(creven) goidshuyse vanden voirs(creven) drie jae(re)n/ sculdich was gedragende tsjaers twelff mudde tarwen tweelf mudde/ pachtcorens ende thien rijnsch gulden(en) Desgelijcx sal hij quijt/ zijn van thien rijnsch gulden(en) die hij sculdich was vanden lesten jae(r)/ / voe(r) de voirs(creven) drie jair ende voirts van allen actien en(de) eysschinghen die tvors(creven)/ goidshuys hem vanden voirs(creven) drie jairen ende van daer te voren eysschen(de)/ mocht zijn vander voirs(creven) pechtinghen hoedanich die zijn en(de) tot des(er)/ sal tvoirs(creven) goidshuys den voirs(creven) wynne gheven oft afcorten vier mudde/ hards corens der maten van loeven eens Ende mids allen desen sal de/ voirs(creven) wyn draghen alle lasten die hij sculdich was oft es te draghen/ en(de) te voldoene ande(re)n dan den voirs(creven) goidshuyse mids der voirs(creven) pechti(n)ge(n)/ bynnen den voirs(creven) drie jairen oft van daer te voren Alse van corweyde(n)/ houden gijsten en(de) ande(re)n hoedanich die zijn en(de) den selven goidshuyse/ dairaf quijte en(de) ongelast houden ende sal oic mids dien tvoirscr(even)/ goidshuys quijt ende ongehouden zijn van allen actien en(de) eysschinghen/ die hij den selven goidshuyse soude hebben moegen eysschen vand(er) scaden/ die hij bynnen den voirs(creven) drie jairen geleden heeft vanden volcke van/ wapenen van corweyden oft van e(n)nighen ande(re)n saken der voirs(creven) pachtin/ ghen aengaende vanden tijde der voirs(creven) drie jairen oft van daer te voe(re)n/ Desgelijcx zijn de voirs(creven) p(ar)tien ov(er)comen vanden jae(r) dair na volgende/ uutgaende te halfmerte lestleden dat tvoirs(creven) goidshuys quijt ende/ ongehouden zijn sal van allen actien oft eysschinghen die de voirs(creven) wyn/ te henw(er)ts hebben mochte uut saken vander schaden vanden volcke va(n)/ wapenen op dat jair bij hem geleden en(de) oic vanden waghene die va(n)/ wegen m(ijn) he(re)n van gheete bynnen den voirs(creven) hove gehaelt es en(de) vand(er)/ schaden en(de) verlette dat hij mids den volcke van wapenen en(de) tderve(n)/ vanden voirs(creven) wagene aen zijn lande en(de) vruchten oft and(er)ssins ghadt/ mach hebben Ende van allen ande(re)n gebreken die hij den goidshuyse vors(creven)/ van dien jaire soude hebben moegen eysschen des sal de voirs(creven) wyn/ quijt zijn van alsulken xii mudden rogs xii mudden tarwen en(de) thien/ rijnsch gulden(en) alse ten selven jaire vander voirs(creven) pechtinghen v(er)schenen/ zijn Cor(am) abs(oloens) ouder(ogghe) julii xii