It(em) de provisoiren en(de) mombo(r)en vander tafelen sheilichs [gheests] van s(in)te mychiels te/ loeven hebben inden name vander selv(er) tafelen wettelic gemechticht en(de)/ volcomen macht gegeven en(de) met des(en) l(ette)ren mechtich maken en(de) volcomen/ macht gheven symoene laureys clerck der selver tafelen en(de) willem(me)/ van leele natuerlic en(de) elcken bizunder thoenre des(er) om alle alsulken/ chijze renten pachten en(de) sculden alsmen der voirs(creven) tafelen nu sculdich/ es oft namails wesen sal te manen teyschen op te boe(re)n en(de) tontfange(n)/ den sculde(re)n va(n) heuren ontfanghe quijt te scelden en(de) quitancie te gheve(n)/ de selve chijze renten pachten en(de) sculden en(de) alle der voirs(creven) tafelen/ ande(re) saken en(de) stucken die zij nu te doen heeft oft namaels hebben sal/ in aenlegg(er)s oft verweerd(er)s stad aen ende tegen eenenyegeliken/ met rechte te vervolgen en(de) te bedinghen die te wynnen en(de) te verliesen/ tallen plaetsen en(de) voer alle gerichten daer dat behoeven en(de) te doen/ sal wesen en(de) alle manie(re)n en(de) pointen van rechte d(aer)toe te vorde(re)n die/ na recht oft costume vand(en) plaetsen daer dat geboert behoiren moegen/ en(de) voerts alle tghene (et)c(etera) Geloven(de) vast van wegen der voirs(creven) tafelen/ cu(m) (com)put(atione) (et) revoc(atione) cor(am) hoeven burg(imagistro) abs(oloens) ouder(ogghe) scab(inis) dec(embris) xxi