It(em) also alse willem wilen de witte van herent anderwile gecregen heeft/ tegen jacoppen wilen de gruyte(re) zeke(re) tsijze aen ende op div(er)se goede/ ende onderpande te he(re)nt gelegen en(de) onder den ande(re)n vier cap(uynen)/ en(de) vii pe(n)ninghe ouds tsijs aen en(de) op een huys en(de) hof belege(n)/ neven oest(er)hem tusschen de goede gielijs vander horst aen deen/ zijde en(de) de goede symoens nijs in dande(re) gelijc zeke(re) scepen(en) brieve/ van herent vanden voirs(creven) vercrighe gemaict de voirs(creven) tsijze met/ heuren panden begripen So zijn comen voe(r) scepen(en) van loeven wout(er)/ de mu(n)te(re) en(de) machtelt switten zijn wijf wettighe dochter svoirs(creven)/ wilen willems den welken also zij seyden en(de) oic blijcte met scepen(en)/ brieven van loeven die zij dairaf thoenden de voirs(creven) vier cap(uynen) en(de)/ zeven pe(n)ninghe in deylinghen gevallen zijn Openb(ar)lic bekynnen(de)/ dat joff(rouwe) jehanne weduwe svoirs(creven) wilen jacobs hen voe(r) den voirs(creven)/ tsijs van vier cap(uynen) en(de) vii d(enieren) mids gebreke datmen bevond inde/ vesticheit d(air)af den voirs(creven) wilen wille(m)me gedaen vanden voirs(creven) wile(n)/ jacoppen opgeleeght en(de) betailt heeft een zeke(re) so(m)me va(n) pe(n)ninge(n)/ dair mede zij van heure alse vanden voirs(creven) tsijze wel content en(de)/ te vreden zijn Sceldende der voirs(creven) joff(rouwen) jehannen vand(er) wairscap/ en(de) geluften van genoech doen svoirs(creven) wilen jacobs en(de) oic alle trecht/ dat zij hebben mochten inden selven tsijs volcomelic quijte Geloven(de)/ dien tsijs noch de voirs(creven) weduwe uut ocsuyne van dien ne(m)mermeer/ teyschen oft aen te spreken in e(n)nigher manie(re)n Geloven(de) voirts der/ voirs(creven) joffr(ouwen) jehannen van des(en) quitancien en(de) van allen den rechte/ dat zij oft der voirs(creven) machtelden medeerfgenamen hebben mochten/ inde voirs(creven) vier cap(uynen) en(de) vii pe(n)ninghe alt(oes) inne te staen ende/ warand te zijne tegen eene(n)yegeliken Cor(am) heyk(ens) caverson ja(nua)[rii] pe(nulti)[ma]