It(em) also alse symoen de scheepe(re) anderwile gecregen en(de) genomen/ heeft tegen janne de scheepe(re) zijnen brueder desselfs jans/ helicht van eenen huyse en(de) hove gelegen opten blauwenputte/ hen beiden van heuren vader en(de) moeder verschenen op twee ryd(er)s/ en(de) een ort te xxv(½) stuv(er)s den ryder erfliker rinten die hij jan/ daer aen behielt en(de) die de voirs(creven) symoen aen zijnen brueder en(de)/ in zijnen weduwen stoele namails afgequeten hadde zonder/ guedinghe dairaf te hebben also hij zeide Dwelck de vors(creven) jan/ hem ontkynde ende de selve p(ar)tien comen zijn biden raide vander/ stad daer de voirs(creven) symoen yesch en(de) beg(er)de guedinghe te hebben/ vander voirs(creven) rinten aengesien der afquitinghen voirscr(even) en(de) dat/ hij jan zijnen maenbrief den voirs(creven) symoene overgegeven hadde/ die tusschen hen beiden gecancelleert waird In welken eysche/ jan hoopte ongehouden te wesen en(de) elck bij zek(ere)n redenen die hij/ in gescrifte overgaff Dairaf de raid vander stad ten uut(er)sten/ termijneerde so verre symoen zijnen eed dade van zek(ere)n poente(n) die/dat hij bigeleeght hadde dat hem dan de vors(creven) jan behoirlike/ guedinge en(de) vestich(eit) doen soude vander voirs(creven) rinten oft hem zijn/ pe(n)ninghe wederke(re)n van welken poenten hij zijns eeds volquam/ So es comen de voirs(creven) jan en(de) heeft gelooft den voirs(creven) symoene/ behoirlike guedinghe en(de) vesticheit te doen hebben vander vors(creven) rinten/ tusschen dit en(de) belokenen paeschen naistcomen(de) oft dae(re)nbynnen/ de voirs(creven) pe(n)ninghe vander afquitinghen te weten xl ryd(er)s ende/ eenen halven inder weerden voirs(creven) te stellen opten wissel om die/ aldair te staen en(de) te bliven tot dat hem de selve guedinge gedaen/ sal wesen en(de) zij sculdich waren en(de) behoirden te staen oft die/ pe(n)ninghe bijden voirs(creven) symoene ald(air) om de voirs(creven) rinte dair mede te/ quiten behoirlic gesett hadden geweest Voerts es vorwerde dat/ elck van hen draghen sal de helicht vanden pontgelde der stad/ vander voirs(creven) afquitinghen verschenen Cor(am) heyk(ens) cav(er)son m(ar)cii xxvii