It(em) vander questien die geweest es tusschen lambrechten vanden dale als uutge/ wonnen hebbende met genechten voe(r) zeke(re) zijn wettighe schult zeke(re) haeflike/ goede die waren joes joly en(de) dair inne gewijst zijnde also steet m(ar)cii/ xi lestleden in deen zijde en(de) gielijs joly svoirs(creven) joes vader in dande(re)/ alse van eenen bedde en(de) twee slapelaken geheten beucke die hij also/ hij seyde zijn p(ro)per goed waren en(de) den voirs(creven) zijnen sone geleend hadde/ biedende dairaf zinen eed welcke goede de voirs(creven) lambrecht aengeveerd/ hadde en(de) met den ande(re)n goeden vercocht eysschende d(air)om de selve gielijs/ restitucie vanden voirs(creven) bedde en(de) beucken oft de weerde d(air)af ter taxacien/ vanden schatt(er)s of vanden ghenen die de selve goede gecocht mochten/ hebben Dairop de voirs(creven) lambrecht antwerde dat hij tvoirs(creven) bedde/ en(de) laken niet gehadt en hadde mair dat henrick de custe(re) die gepand/ hadde uut svoirs(creven) joes huyse voe(r) gebreck van huyshueren vanden selven/ huyse en(de) voe(r) de selve huyshue(r) hadde hij die vercocht maer seyde/ dat dairaf alnoch ewat ghelds overschote welck overschot hij/ meynde dat hem sculdich ware te volghen met meer woirden ten beide(n)/ zijden geallegeert So hebben de scepen(en) van loeven gewijst voe(r) een/ vo(n)nisse dat de voirs(creven) lambrecht aen tvoirs(creven) overschot vanden voirs(creven)/ gepanden en(de) vercochten goeden verdoolt es Cor(am) roel(ants) borgh vync/ heyk(ens) caverson ap(ri)lis vi