It(em) gielijs van p(er)gate heeft opgedraghen met rechter verthijeniss(en) sijn/ meeste huys gelegen in s(in)te quintens strate metter poirten voe(r) ter/ straten metter scaelgien borreputte wijngairde en(de) hoeven dair toe/ behoirende en(de) metter heymelicheit ten ynde vanden voirs(creven) wijng(ar)de en(de)/ met eenen weghe en(de) uutganghe tot inden werft doir een poirte/ ald(air) en(de) allen ande(re)n heuren toebehoirten tsamen met eenen cleyne(n) huyse/ en(de) zijnen toebehoirten gelegen aen en(de) neven de voirs(creven) scaelgie gelijc/ de voirs(creven) goede gelegen zijn inde voirs(creven) s(in)te quintens strate tuschen/ de goede meester jans wellis doctoir in medicinen in deene [zijde] en(de)/ svoirs(creven) gielijs ande(re) goede en(de) de goede sgoidshuys van olen aen/ dande(r) zijde behoudelic dat de cokene vanden voirs(creven) cleynen huyse/ onder en(de) boven zo verre trecht dack vanden ande(re)n tween huysen/ svoirs(creven) gielijs daer neven gelegen hem boven de selve cokene strect/ en(de) niet voirder zal volgen ende bliven den voirs(creven) gielijsen en(de)/ inder selver breidden sal hem bliven den hoff achter en(de) aen de voirs(creven)/ cokene gelegen Desgelijcx sal hij behouden een gedeelte vanden/ bleyckpleyne oft hove den voirs(creven) meesten huyse toebehoiren(de) gelegen/ tselve gedeelte achter ende aen derve toebehoirende der vors(creven) cokenen/ en(de) den ande(re)n twee huysen svoirs(creven) gielijs en(de) houdende inde breidde/ op deen ynde naest den muere staende aen svoirs(creven) goidshuys goede/ acht voete en(de) streckende hem van daer ten voirs(creven) wijng(ar)de wairt tot/ op drie voeten na den mue(r) den voirs(creven) meesten huyse toebehoiren(de) ende/ staende tusschen thoefken achter de voirs(creven) cokene gelegen en(de) thoefken/ aen en(de) ter zijden vander voirs(creven) scaelgien en(de) op dat ynde sal tselve/ gedeelte breed zijn zeven voete welcke zeven voete en(de) de voirs(creven) drie/ voete verre tvoirs(creven) meeste huys bevreden sal en(de) van op dat ynde tot/ den ande(re)n ynde toe sal de voirs(creven) gielijs den vrede houden metende/ lijnrecht vanden eenen ynde tot den ande(re)n Ende den voirs(creven) gielisen/ uut den voirs(creven) goeden gedaen en(de) te male afgewijst zijnde soe waird/ daer inne gegoedt en(de) geerft ten erfliken rechte mychiel vijds/ alsnu student inder univ(er)siteit van loeven geboren van beve(re) inden/ lande van waes soen wilen jans vijds bij orlove en(de) maniss(en) tshe(re)n/ vanden gronde en(de) vo(n)niss(en) van scepen(en) Ende es tusschen den voirs(creven)/ mychiele en(de) gielisen bevorw(er)t voe(r) hen en(de) heure nacomelinghe des/ hier na volght Ierst dat den voirs(creven) mychiele toebehoiren sal de goete/ liggende boven tusschen zijn cleyn huys en(de) svoirs(creven) gielijs and(er) huys/ en(de) dwater dairaf comende sal hij mychiel moeten leyden op zijn erve/ also dat den voirs(creven) gielisen daer bij egheen schade en come It(em)/ dat de voirs(creven) gielijs ten ynde van zijnen erve aen of tegen derve
//
svoirs(creven) mychiels egheene ty(m)meringhe of metselrie maken en sal daer/ inne [hij] e(n)nighe vynst(ere)n gate oft uutsien hebben oft houden en sal moeghen/ desgelijcx en sal hij egheene vynste(re)n gate oft uutsien moege(n) houden/ of maken inde heymelicheid of ty(m)meringhe nu staende op dynde/ van zijnen hove aen tgedeelte svoirs(creven) mychiels gielijs dat hij/ vanden voirs(creven) bleyckpleyne behouden heeft noch oic in zijn huys/ staende naest des voirs(creven) mychiels cleynen huyse inde zijde ten/ selven cleynen huyse wairt [al waert] dat tselve cleyn huys afgebroken worde/ oft verviele Ende oft den voirs(creven) mychiele inden voirs(creven) saken yet/ te luttel geschied wae(r) dat heeft de voirs(creven) gielijs verthijende in des(en)/ der p(ri)vilegien vander voirs(creven) univ(er)siteit gelooft alt(oes) te voldoene zo/ verre alsulken letsel of gebreck toequame bij oft uut ocsuyne svors(creven)/ gielijs mids e(n)nig(er) vorderinghen van rechte die hij oft zijn recht en(de)/ actie hebbende op oft vanden voirs(creven) goeden gedaen en(de) gevordert mochte(n)/ hebben en(de) anderssins niet Gelovende voirts de voirs(creven) gielijs den vors(creven)/ mychiele de voirs(creven) goede opten tsijs of rente die margriete weduwe/ kerstiaens wilen gielijs geheten zoeten dair aen heeft en(de) voerts op/ allen den last en(de) co(m)mer dair uut gaende opten achtiensten dach van/ sporkille int jair van achten(de)tsestigen lestleden alse op allet recht/ nu dair uut gaende te warande(re)n also dat den selven mychiele vast/ en(de) genoech sal moegen wesen Van welcken co(m)me(r) en(de) laste voirger(uert)/ de voirs(creven) mychiel gelooft heeft tvoirs(creven) stuck hoofs dat de voirs(creven) giel(ijs)/ vanden voirs(creven) hove oft bleyckpleyne behouden heeft scadeloes en(de)/ co(m)merloes te houden en(de) tontheffen tot eeuwighen daghen de vors(creven)/ zijn ande(re) goede daer voe(r) bij orlove tshe(re)n vanden gronde den vors(creven)/ gielisen tonderpande zettende Cor(am) heyk(ens) caverson febr(uarii) xix