Allen den ghenen (et)c(etera) Soe eest dat wij teghewoirdichlick/ versocht sijnde voe(r) de gherechte waerheyt c(er)tifice(re)n dat zyd(er)t/ den zesten daghe van des(en) teghewoirdig(en) maent octob(ris) tot/ opden dach van heden deen nae den ande(re)n te div(er)sen stonde(n)/ in ons(er) p(rese)ncien verschene(n) en(de) gheco(m)pareert sijn en(de) hen/ verthoent hebben in natuerliken levene livende en(de) levende/ zijnde de p(er)sone hier na bescreve(n) Te weten(e) ierst h(er) jan/ vanden zande geheete(n) luycx prieste(r) raes vander lynden/ henrick van muylke joffr(ouwe) lysbeth ysacks weduwe lod(ewijcx)/ wijlen vanden meersberghe joffr(ouwe) yde ysacks huer zust(er)/ religieuse inden goidshuyse vander banck bij loven katline/ maghermans nu wettighe huysvrouwe jacobs van vertrijcke/ tynnepotghiet(er)s jan van berthem soon wijle(n) roelofs joffr(ouwe)/ g(er)truyd sangwijns nu religieuse inden goidshuyse van sinte/ bernards bij diest joffr(ouwe) marie scusters weduwe vrancx/ wijlen kemels jacob edelhee(re) en(de) jan de custe(re) bruede(r) soen/ wijlen pauwels Bekynnende en(de) verlyende de selve p(er)sone/ ende elc van hen zoe verre hem des aencleeft met dese(n)/ selve(n) brieve dat sij ontfanghe(n) hebben uut handen henricks/ celen rintmeest(er) nu t(er) tijt onss ghened(ichs) he(re)n tsh(er)toghe(n) in/ zijnre stad van tshertogenbossche en(de) van weghe(n) desselfs/ onss ghened(ichs) he(re)n de lijfrenten hier nae bescreve(n) Te/ weten de voirs(creven) h(er) jan vanden zande thien rijnssch(en) guld(en)/ raes vander lynden thien rijnssch(en) gulden(en) henrick/ van mulke vijf rijnssche guld(en) joffr(ouwe) lijsbeth ysacks vijf/ rijnssche gulden de voirs(creven) joffr(ouwe) yde huer sust(er) vijf rinssche/ guld(en) katline magermans met consente des voirs(creven) jacobs/ van vertrijcke heurs mans drie rijnssche gulden(en) jan/ van berthem vijf rijnssche guld(en) de voirs(creven) joffr(ouwe) g(er)truydt/ sangwijns drie rijnssche guld(en) joffr(ouwe) marie scust(er)s vijf/ rijnssche gulden(en) jacob edelhe(re) zeven en(de) eene(n) halve(n)/ rijnssche guld(en) en(de) jan de custe(re) twee en(de) eene(n) halve(n)/ rijnsche guld(en) welke p(or)chelen en(de) so(m)men de voirs(creven) p(er)sone/ zeiden hen verschene(n) ende ghevalle(n) te wesen te bamisse/ lest voirlede(n) van heuren jairliken lijfrente(n) opde p(ro)fijten/ en(de) demanien des voirs(creven) onss ghened(ichs) hee(re)n in zijnre stad/ vanden bosch voirs(creven) ende opde selve stad gelijc de brieve
//
dair op ghemaect dat clee(re)n moeghe(n) Bekynnen(de) hen de/ voirs(creven) p(er)sone ende elc bezunder vanden zijnen boven/ gheruert alse vanden voirs(creven) t(er)mijne en(de) allen voerlede(re)n/ t(er)mijne(n) voer wel betaelt en(de) vernuecht Sceldende dair/ af quite onsen voirs(creven) ghenedighe(n) hee(re) zijne(n) rintmeest(er) ende/ der stad vanden bosch voirs(creven) en(de) allen ande(re)n des quitan(cie)/ behoeven(de) Des torconden (et)c(etera) Act(um) xxvii octobr(is)