It(em) na dien dat lyebrecht sausen als man ende momboir marien shanen/ geheten van couthem zijns wijfs te rechte betoghen heeft voer meye(r)/ en(de) scepen(en) van loeven henricken zannen zeggende de selve lyebrecht/ dat arnd wilen van gobbelsrode geheten vanden hove jan van/ couthem vader der voirs(creven) marien met heuren medeplicht(ere)n v(er)bonde(n)/ hebben aen goeswijne ende clemencien kynde(re) goeswijns wilen/ vanden zande in iii(½) gulden rijders lijftochten ende dat de vors(creven)/ wilen arnd den voirs(creven) janne van couthem en(de) zijn ande(r) medeplicht(ere)n/ gelooft hadde tontheffen Zeggende voirt dat de voirs(creven) henr(ic) zanne(n)/ na staet der heiligher kercken getruwt heeft die wettige docht(er)/ des voirs(creven) wilen arnds van gobbelsrode en(de) na de doot van hem int/ sterfhuys gewandelt en(de) de have aenveerde als erfgename bieden(de)/ dat te thoenen meynen(de) dair om na dien dat hij die lijftocht gecuelt/ heeft dat hem de voirs(creven) henrick zannen sculdich zal zijn dairaf/ tontheffen van zijnen gebreke die hij met zijnre eed p(rese)nteerde te/ groetsene ende te verifice(re)ne Ende den voirs(creven) lyebrechte tsijnen/ thoenisse gewesen zijnde des niet en volquam so hebben de/ scepen(en) van loeven gewijst dat de voirs(creven) henrick zannen der/ aenspraken die lyebrecht te hemw(er)t gedaen heeft ongehouden/ zal zijn Cor(am) roelants roelofs lyeminghen berghe vos heyk(ens) januarii xxvi