Item na dien dat jan de vos ende marie zijn dochter met den voirs(creven)/ janne vanden dale en(de) lijsbetten svos zijnen wive zuster der vors(creven)/ marien de voirs(creven) goede indivisim voe(r) de voirs(creven) ix ryd(er)s erflic/ verobligeert ende verpandt hebben ter beden en(de) p(ro)fijte svoirs(creven)/ jans vanden dale en(de) zijnre huysvrouwen hoewael nochtan de/ helicht vanden selven goeden toebehoiren(de) es den voirs(creven) janne de/ vos als tochte(r) en(de) marien als erfwive soe eest dat d(air) o(m)me/ en(de) mids dien de vors(creven) jan vanden dale ende zijn huysvrouwe gelooft/ hebben voer hen heuren erven en(de) nacomelinghen deen helicht vanden/ voirs(creven) goeden den voirs(creven) janne en(de) marien toebehoiren(de) costeloes/ te houden en(de) tontheffen teeuwighen daghen vanden ix ryders/ voirs(creven) Ende de voirs(creven) ix ryders erflic uuter voirs(creven) ca(m)men/ jairlicx ten behoirliken tijden desselfs jans leefdaghe langh/ te gelden en(de) te betalen also in tijds ende in uren dat de selve/ goede die ter meerd(er) vestich(eit) met der ca(m)men verobligeert zijn/ egheen schade hebben noch liden en sullen noch dair voe(r) geprae(m)pt/ worden in e(n)nigher manie(re)n Ende de selve rinte van neghen/ ryders t(er) stont na de doot des voirs(creven) jans de vos lossen ende/ quiten en(de) also de voirs(creven) verobligeerde goede ontlasten ende/ bevryen oft der voirs(creven) marien de weerde van heuren voirs(creven)/ verond(er)panden goeden in ande(re)n zijnen p(ro)pe(re)n goeden erfgoeden [desselfs jans en(de) zijns wijfs] of rinten dair voe(r) goedgenoech zijnde verguetsen t(er) taxacien/ van goeden mannen Cor(am) eisd(em)