Cond zij allen lieden dat jan everarts soen willems everarts/ van s(in)te katlinen houthem en(de) reyne(r) van gate woenen(de) ter sluysen/ soen wilen henricks hebben genomen en(de) bekindt genomen te hebbe(n)/ van loenijse van udekem vierdalf boender lands oft dair omtrint/ gelegen in eenen stucke inde prochie van meldert opt meldertvelt/ tusschen de goede willems van kersbeke en(de) des altairs van ons(er)/ vrouwen te roesbeke comen(de) tot aende h(er)strate aldair Te houden/ te hebben en(de) te wynnen van halfmerte lestleden eenen termijn/ van tweelf jairen langh deen na dander zonder middel volgen(de) Elcx/ jairs dae(re)nbynnen voer en(de) om vier mudde hards corens goeds en(de) / payabels met wanne en(de) vede(re)n wel bereidt pacht van meldert/ en(de) loevensche mate ts(in)te andriesmisse apostels te loeven [betalen] en(de) te/ loeven dairt den voirs(creven) loenijse gelieven sal te leve(re)n den selven/ loenijse jairlicx den vors(creven) t(er)mijn due(re)nde (et)c(etera) quo(li)[b(et)] ass(ecutu)[m] Met/ vorwerden dat de voirs(creven) wynnen tvors(creven) land wynnen en(de) werven/ selen gelijc reengenoten boven en(de) beneden en(de) dat tallen zess/ jairen eens wel en(de) loflic overmesten en(de) zo verre zij tselve/ land bynnen den lesten drie jairen vanden voirs(creven) t(er)mijne hoer/ vruchten willen zo selen zij dat bynnen den selven lesten drie/ jairen noch eens loflic moeten dair voe(r) overmesten en(de) ten/ eynde van desen t(er)mijne zelen zijt laten besaeyt wel en(de)/ loflic met corter have(re)n op een vore It(em) zelen oic de voirs(creven)/ wynnen zonder afslach vanden voirs(creven) pachte jairlicx betalen/ allen den tsijs uut den voirs(creven) lande gaende zo in tijds dat/ bij gebreke van dier betalinghen dair op gheen schade/ en geschiede welke vorwerd(en) voirs(creven) En(de) hier voe(r) zijn [es]/ borghen der vors(creven) wy(n)nen willem everarts vorscr(even) en(de) henr(ic) druys van meldert Et p(ri)mi duo cor(am) roelants/ langrode april(is) xxiiii