Allen den ghenen (et)c(etera) ende bizunder den eerwerdighen edelen voirsienigen/ ende wisen onsen lieven he(re)n p(re)sident en(de) he(re)n vanden p(ar)lamente onss gened(ichs)/ he(re)n tsh(er)toghen tot mechlen reside(re)nde burg(er)meest(ere)n (et)c(etera) saluyt met/ ky(n)niss(en) der wairheit doen te weten dat op den dach van heden voer ons/ comen en(de) gecompareert zijn in heuren p(ro)pe(re)n p(er)sone die eerw(er)dighe/ meester robbeert de lain doctoir in beiden rechten meeste(r) jan gordyen
//
canonick inder kercken van sinte peters te loeven en(de) lodewijck roelants nut(er)tijt/ scepen(en) onss gened(ichs) h(ere)n tsh(er)toghen in zijnre stad van loeven hen zeggende/ en(de) dragende als executeurs des testaments der edelre wilen vrouwe/ johannen van wesemale zaligher gedachten En(de) hebben aldair ter/ p(rese)ncien van ons in alle der bester formen en(de) manie(re)n zo dat na recht/ best mach dienen macht en(de) effect gripen volcomelic gemechticht gesett/ geordineert en(de) geconstitueert en(de) met des(en) l(ette)ren vermechtighen zetten ordine(re)n/ en(de) constitue(re)n heure p(ro)cureurs den eerb(ere)n voirsienighen meest(er) janne/ grymeel wille(m)me vander meynairtshoven meest(er) boudewijne gropreet/ en(de) meester griffone fabri en(de) elken van hen bizunder met machte en(de)/ auctoriteite eene(n) of meer ande(re) p(ro)cur(eur)s te substitue(re)n en(de) oft hen dochte/ dienende die te revoce(re)n en(de) de macht van heurer voirs(creven) voirs(creven) p(ro)curacien/ wed(er)om in hen te reassume(re)n also dicke en(de) menichwerven als dat sall/ moegen dienen oft behoeven tot der saken die de voirs(creven) wilen vrouwe/ johanne van wesemale in leven(e) zijnde betoghen hadde voer de eerw(er)dige/h(ere)n en(de) edele h(ere)n vanden p(ar)lemente voirs(creven) tegen den edelen he(re) h(ere)n ja(n)ne/ van wassene(re)n ridde(r) vrouwe katlinen van craen zijnre medegesellynnen/ tielma(n)ne oem en(de) heuren medeplicht(ere)n aengaende der saken van lx/ clinck(ar)den erflicker rinten met den verlope van vier jairen o(m)me de/ sake van dien als p(ro)cur(eur)s der executeuren voirs(creven) nu voirt met rechte te/ continue(re)n en(de) te vervolghen met gaders oic allen ande(re)n saken die de vors(creven)/ executeurs voer de voirs(creven) eerwerdighe h(ere)n hangende hebben oft v(er)hopen/ hangende te hebben om de selve saken tegen den voirs(creven) h(ere)n janne van/ wassene(re)n en(de) zijnen medeplicht(ere)n en(de) allen ande(re)n wie dat es of zijn/ zall in aenlegg(er)s of verweerd(er)s stad te rechte te compare(re)n tgedinge/ te conteste(re)n te reco(n)venie(re)n te verantwerden en(de) met rechte te diffende(re)n/ alle gescriften libelle en(de) ande(r) over te gheven en(de) vand(en) wederp(ar)tien/ beghe(re)n overgegeven te worden te replice(re)n te duplice(re)n en(de) alle termijne/ van rechte te houden beide also wale int principael als int accessoir alle/ instrumenten munimente(n) en(de) getuygen inder saken te p(ro)duce(re)n en(de) vand(en)/ wed(er)p(ar)tien te zien p(ro)duce(re)n en(de) te hoiren zwee(re)n en(de) die te batte(re)n ende/ heure deposicien te wederleggen also dat na recht behoeven en(de) diene(n)/ sal en(de) alle vo(n)niss(en) also wale int(er)locutorie als diffinitive teyschen en(de) te/ verwachten tgewijsde te vervolgen en(de) te versuecken geexequeert te/ worden en(de) alle behoirlike eede calu(m)pnie en(de) ande(re) inden name der voirs(creven)/ constitueerd(er)s te doene en(de) vand(en) wed(er)p(ar)tie(n) versuecken gedaen te/ werden En(de) voirtaen g(e)n(er)alic en(de) specialic alle tghene d(air) inne te doene/ en(de) te vorde(re)n dat de voirs(creven) constitueerd(er)s selve soude(n) moegen doen/ of vord(ere)n in e(n)nig(en) manie(re)n wairt dat zij telk(en) tijd p(rese)nt en(de) voer/ oeghen wae(re)n Geloven(de) de selve constitueerd(er)s vast en(de) gestentich/ te houden zo wes bijden vors(creven) p(ro)cur(eur)s oft den eene(n) van hen of heuren/ gesubstitueerden in des voirs(creven) es en(de) in des d(air) aen cleven mach gedaen/ en(de) gevord(er)t sal worden het zij te wynne en(de) te verliese in e(n)nig(en)/ manie(re)n zond(er) argelist cor(am) meld(er)t burg(imagistro) berghe heyk(ens) scab(inis) aug(usti)/ xx