Item lambrecht vander heyden in deen zijde ende goird panhuys soen wilen/ jans in dande(re) die zek(ere)n stoot underlinghe tegen malcande(re)n gehadt/ hebben van twee sacken tarwen der maten van thienen erflic die/ de vors(creven) lambrecht meynde te hebben op zeke(r) goede des voirs(creven) goirds/ te zittert gelegen en(de) dair voe(r) de selve lambrecht met rechte/ op den voirs(creven) grond begonnen hadde te volghen en(de) des dien/ aencleeft hebben hen de selve p(ar)tien gesubmitteert ende verbonden/ in zegg(ere)n ende mynlike yffene(re)n Te weten de vors(creven) lambrecht in/ pet(ere)n rogghe ende janne van udekem voerspreke ende de vors(creven) goird/ in goirde crabbe ende wille(m)me van kessele bij also dat de vors(creven)/ lambrecht zijnen eysch in gescrifte overgeven sal den zegg(er)s/ zijnre wederp(ar)tien bynnen xiiii nachten naistcomen(de) Dair op de/ voirs(creven) goird zijn verantwerden oic in gescrifte overgeven sall/ bynnen xiiii nachten Dair na den zeggers zijnre wed(er)p(ar)tien en(de) bynnen middelen tijde ofts behoeft zelen zij gethuyghnisse ae(n)horen/ welke zeggers op dat zijs eens zijn heur uutsprake doen zulle(n)/ bynnen eenre maend dair na ende oft zijs niet eens en worden/ dat zij dan de sake also die voer hen comen es overbringhen/ zullen in handen van eenen overman die hen gelieven sal die zijn/ uutsprake bynnen xiiii nachten dair na gehouden zal sijn te doene/ P(ro)mitt(ens) rat(um) quilibet sub bandone duodecim leonu(m) mediatim d(omi)no duci/ braban(tie) (et) mediati(m) d(omi)no temp(or)ali sub quo juvent(us) fu(er)it p(er)solven(da) Heeft/ voirt gelooft de vors(creven) goird dat hij tusschen dit en(de) maendach/ avont naistcomen(de) alsoe vele doen sal dat den vors(creven) lambrechte/ ongecancelleert volghen selen alle alsulke brieve rue(re)nde vand(en) vors(creven)/ rinten alse de vors(creven) goird onder de wet te zittert beslagen heeft/ bij alsoe dat die wederom geleeght zullen worden onder scepen(en)/ van loeven opte ii[ste] came(r) in alsulker manie(re)n als die te voren/ lagen oic op eenen banduyn van x r(insche) gulden(en) ad opus quo/ sup(ra) p(er)solven(dum) roelofs vos januarii xiiii