Item om te comen tot der zoenen vanden dootslaghe geschied inden p(er)soon/ jacops wilen steenweeghs der stad bode bij romboute cluwens ti(m)merman/ sijn de voirs(creven) rombout ter eenre ende willem steenweeghs brued(er) svors(creven)/ wilen jacops yerst uuten brode tybouts zijns vaders behoirlic gedaen/ bij consente desselfs ter ande(r) zijden bij onderwijse ende raide van heur/ beider vrienden overcomen der poenten ende condicien hier na volgen(de)/ die de voirs(creven) rombout op lantsoene gelooft heeft tonderhouden(e) en(de)/ te voldoene Te weten yerst dat de vors(creven) rombout bynnen xl dage(n)/ naistcomen(de) porren sall ende doen eenen wech s(in)t jacops in galissien en(de)/ bynnen xl daghen nae dat hij van daer comen sall zijn doen eenen/ wech s(in)te peters te romen ende van elcker goede wairheit bringhen/ na der stad recht It(em) dat de voirs(creven) rombout voe(r) de salicheit vander/ zielen des voirs(creven) aflivighen t(er) stont sal doen doen tot zijnen laste/ tgebet van iii(½)[c] cloest(ere)n dwelc hij t(er) stont alsoe inden goidshuyse/ vanden augustinen te loeven heeft gedaen en(de) noch drie dertichsten/ en(de) d(air)aff oic goede certificacie den vors(creven) wille(m)me doen It(em) dat/ de voirs(creven) rombout bynnen eenen ja(r)e naistcomen(de) tot zijnen coste zall/ doen maken ende setten opt graff des voirs(creven) wilen jacops op s(in)te/ g(er)truyden kerchof een yse(re)n vergulden cruce alsoe goed en(de) vanden/ fantchoene dat is tcruce dat lijsbeth van rymena(m) aldair omtrent/ den torre heeft doen setten ende de vrienden des voirs(creven) rombouts voe(r)/ dovercomen van des(en) hebben gesien Ende vanden voirs(creven) gebede d(er)tichste(n)/ en(de) cruce te setten zijn borghen des vors(creven) rombouts ongesundert/ willem griffoen soen wilen jans woenen(de) te steynhockesele jan vand(er)/ beke soen jans teversberghe en(de) meester jan van duysborch renu(n)c(iantes) (et)c(etera)/ Et p(ri)mus It(em) es vorwerde ende merckelic in desen ondersproken oft zoe
//
geboerde dat jan steenweeghs svors(creven) willems brueder die de zoene/ toebehoirt so verre hij noch leeft ende die omtrint vier jair buyte(n)/ lants heeft geweest alnoch livich en(de) leven(de) wa(r)e ende bynnen/ lants quame dat de selve jan zijn recht desen niet tegenstaen(de)/ op den vors(creven) romboute sal moegen volghen al wairt oic dat/ dit tractaet geheelic wa(r)e voldaen sonder dat hij uut saken van/ desen den vors(creven) wille(m)me oft yeman(de) anders yet sal moeghen/ eyschen oft hier mede behulpen It(em) heeft voirts mids desen de/ voirs(creven) rombout volcomelic quijtgeschouden gielise de vos den/ jonghen van all tghene des de selve gielijs int genechte/ dair den dootslach geschiede aen hem van quetsue(re)n oft and(er)s/ mocht hebben mesdaen Ende mids desen en(de) op de voirscr(even)/ vorwerden heeft de vors(creven) willem bij consente als vo(r)e den/ vors(creven) romboute de doot van zijnen vors(creven) brueder verdraghen/ en(de) quijtgeschouden Dit geschiede int goidshuys vanden/ augustijnen te loeven Cor(am) vync caverson januarii xxiiii