Item tot des voirs(creven) is heeft de vors(creven) anceal in meerder vestich(eit)/ der renten voirs(creven) den vors(creven) janne vanden bossche en(de) adriane/ met rechte in hue(re)n handen gelevert de juwelen hier/ na gescreven Te weten(e) een gulden cruyse dair inne op/ deen zijde staen vijf taflen van dyomenten dair af den und(er)sten/ twewerf langer is dan dandere en(de) opde vier hoeken vand(er)/ selver zijden vier taflen van robbijnen En(de) op dande(r) zijde/ vanden selven cruyse vijff taflen van robbijnen en(de) opde vier
//
hoeke vand(er) selver zijden vier taflen van dyomanten met vier/ groete p(er)len en(de) eender guldender keten(en) wegen(de) tsamen drie/ onchen myn drie vierlinghe van eenen ynghelschen troys/ ghewichte Item eenen hoeghen selve(re)n trygyenap van drie/ stucken staende op drie leeukens met tranen gemaect d(air)af/ die tranen half en(de) de borde ond(er) en(de) boven vergult zijn metten/ knoepe In welcken trygynap bynnen d(er) schotelen staet een/ verguld(en) sonne mett(er) sterren inde middelt met tsh(er)togen/ wapen(en) van bourg(oig)[nen] weghen(de) omtrent achtien merck/ en(de) ii ynghelsche selvers troys Met condicien wart sake/ dat de vors(creven) pensionarise jairlix van hue(re)n renten vorscr(even)/ niet betaelt en wordden dat zij hen en(de) elc van hen metten/ vors(creven) juweelen nad(er) stat recht van lov(en) sullen mogen behulpe(n)/ om die ten hoeghsten te vercopen en(de) de rente metten principale/ pe(n)ningen dair aen te neme(n) opdat de live oft e(n)nich van hen/ d(air)op de renten staen als dan livich wae(re)n En(de) inden gevalle oft de/ vors(creven) lijfrente(n) na inhout d(er) vors(creven) brieve afgequeten wordden/ oft besedt op goede pande dat de vors(creven) jan en(de) adriaen gehouden/ zullen zijn die vors(creven) juweelen den vors(creven) anceal oft e(n)nighen/ ande(re)n p(er)soen behoirlic geco(m)mittert met procuracien van mijnd(er)/ vruwen lonyse de laye vruwe van saillant te restitue(re)n in alle/ d(er) manie(re)n sij die aenvert hebben Cor(am) truwant for(estario) (et) d(i)c(t)is scab(inis) eod(em)