Item vander questien die gebuert es voe(r) den raide vander stad tuschen/ arnde cuttens ende woute(re)n van rillair oudecled(er)cop(er)s ter eenre en(de)/ vrancken loenkens ter ande(re) om der haefliken goeden wille die/ de voirs(creven) arnd ende wouter gecocht hadden teghen anthonijse/ de verme(re) met den liechten daghe alsoe zij seiden en(de) vanden/ cope bij hen gedaen den voirs(creven) anthoenijse genoech gedaen/ Welke comanscap bij hen geschied was sonder argelist/ p(rese)nterende heuren eed dat de voirs(creven) comanscap geschied wae(re)/ geweest sonder fraude ende argelist ende dat zij de geheel/ pe(n)ninghen vanden cope betailt hadden behalven vii miten/ die de voirs(creven) anthoenijs hen quijtschout ende naden cope en(de)/ betalinghen voirs(creven) bleven de voirs(creven) vercochte goede bynnen den/ huyse des voirs(creven) anthoenijs ov(er)mids dat e(n)nighe vanden voirs(creven)/ coop(er)s int vercopen vanden haefliken goeden meester claes/ wilen c blijde onledich waren beghe(re)nde dairom dat de/ voirs(creven) vrancke die na der hand alsoe hij zeide geleidt mocht/ zijn dbelet bij hem gedaen onderwesen en(de) bedwonghen/ wordde af te doene Dair teghen de vors(creven) vranck seide/ dat hij behoirlic voer zijn wettich schult geleidt was Ende/ want hij de voirs(creven) haeflike goede bynnen platen bevonden/ hadde niet weten(de) dan die den voirs(creven) anthoenijse toebehoirden/ meynende mids dien dat die hem ende zijnen beleide sculdich/ wa(r)en te volghen Es getermineert so verre de voirs(creven)/ arnd ende wouter heuren eed daden dat zij den voirs(creven) coop/ gedaen hadden bij daghe en(de) navolgen(de) heurer rollen en(de)/ pe(n)ninghen gelijc voirscr(even) steet betailt ende dat den coop/ sonder argelist wae(re) dat hen dan de goede dair questie/ om es volghen souden welken eed de voirs(creven) vranck/ na dat hen dien gestaeft was hen verdroech Act(um) in/ pleno consilio p(rese)ntib(us) pynnoc moelen burg(imagistris) et aliis/ de consilio septembr(is) ultima