Cont sij allen lieden dat jan swylden sone wijlen [vacat]/ in teg(enwordicheit) der scepen(en) van loven(e) gestaen heeft genomen/ en(de) bekint genome(n) te hebben van diericke le begge rintm(eeste)r/ nu t(er) tijt onss gened(ichs) h(ere)n sh(er)toghen in sijnd(er) stad van loven(e)/ thoff des voirs(creven) dierix metten wynnen(de) landen daer toe/ behoiren(de) houden(de) tsame(n) omtrint van vijftich boend(ere)n in/ drie aerden alsoe de voirs(creven) dierick dat heeft te gheete/ en(de) d(aer)omtrint Te houden te hebben en(de) te wynnen eene(n)/ t(er)mijn van neghen jae(re)n lanck deen na dande(r) sond(er) middel/ volgen(de) beghinnen(de) en(de) inne gaen(de) den negensten dach/ des(er) tegewoirdig(er) maent van julio naestcomen(de) Elcx jaers/ dae(re)nbynne(n) elc boend(er) der voirs(creven) vijftich boend(ere)n lants/ om en(de) voe(r) neghen halst(ere)n corens goet en(de) payabel met/ wanne en(de) vede(re)n wel bereyt der maten van thiene(n) vande(n)/ welken de wynne leve(re)n sal te loven(e) jairlix vijfthien mudde(n)/ t(er)wen der maten van loven(e) in afslaghe vande(n) voirs(creven) pachte/ en(de) tsurplus sal hij leve(re)n tot sijns selfs huys in pachte/ van gheete Heeft de voirs(creven) wynne noch gegenome(n)/ vanden voirs(creven) rintmeest(er) vijf en(de) een half boende(re)n lants/ die toe te behoe(re)n plaghen janne henra en(de) sijnen vader/ den voirs(creven) t(er)mijn due(re)nde elcx jaers om en(de) voe(r) vier/ mudde(n) t(er)wen en(de) twee mudden rogs der maten van/[vacat] en(de) te loven(e) te leve(re)n alle jae(re) tsint andriesmesse/ quol(ibe)t ass(ecutu)[m] Item sal de voirs(creven) wynne de voirs(creven) goede/ houden ind(er) maten voirs(creven) ende soe de stucken gelegen sijn/ sond(er) die hem in ande(re)n maten te moeten leve(re)n maer/ soe v(er)re den voirs(creven) wynne dochte dat yemant and(er)s/ hem oft sijns meest(er)s lande te na quame soe mach hij/ die doen meten ten coste van sijnen meest(er) It(em) en(de)/ vorw(er)de dat de voirs(creven) wynne de voirs(creven) goede den/ voirs(creven) t(er)mijn lanck due(re)nde houden wynne(n) werve(n) en(de)/ mesten sal wel en(de) loflic gelijc regenoten bove(n) en(de)/ benede(n) alsoe wel de verste en(de) [als] de naeste en(de) die/ laten tsijne(n) afscheyde(n) alsoe hij die nu aenveerde(n) sal/ te weten(e) al met t(er)wen coren(en) even(en) en(de) erweten besayt/ ende soe v(er)re die ten afscheyde(n) beter bevonde(n) worden/ sal den wynne bijden voirs(creven) rintmeest(er) en(de) oft die arg(er)/ / werden bevonde(n) sal [bij] den wynne den voirs(creven) rintmeest(er) opgeleet/ en(de) gerestitueert wordden na der taxacien die nu en(de) alsdan/ gescieden sal It(em) sal de voirs(creven) wynne hebben te vorddele/ de beemden voirs(creven) [vande(n)] voirs(creven) hove op zeke(re) navolgen(de) (con)dicie(n)/ It(em) sal de voirs(creven) wynne hebbe(n) voer hem de huysingen/ gaende vand(en) coken(en) ter gheten weert en(de) de voirs(creven) rintm(eeste)r/ sal behoude(n) voer hem de ned(er)came(r) comen(de) aende(n) torre en(de) de(n) torre/ oic tot bove(n) toe It(em) sal de voirs(creven) wynne houde(n) in goede(n) state de/ huysinghe vande(n) voirs(creven) hove vander ond(er)ster rijkelen ned(er)weerts/ en(de) sal oic aenhale(n) allen den leem diemen aende huysinge behoeve(n)/ sal It(em) sal de voirs(creven) wynne jairlix moete(n) leve(re)n sesse hond(er)t/ walme(re)n om opde voirs(creven) huysinge te leggen(e) daer des meest behoeft/ de dachue(re)n ten laste vande(n) rintm(eeste)r en(de) den montcost ten laste/ vande(n) wynne It(em) sal de voirs(creven) wynne den voirs(creven) rintm(eeste)r jairlix/ leve(re)n twee halst(ere)n pataigien d(air) voe(r) hij afslaen sal twee halst(ere)n/ corens It(em) sal de voirs(creven) wynne den voirs(creven) rintm(eeste)r houde(n) vi/ capuyne It(em) es vorw(er)de dat de voirs(creven) wynne jaerlix betale(n)/ sal alle chijsen uute(n) voirs(creven) goede(n) gaen(de) die hij den voirs(creven)/ rintm(eeste)r afcortten sal alsoe in tijts dat den voirs(creven) rintm(eeste)r d(aer) bij/ gheen scade en(de) gesciedde It(em) sal de voirs(creven) wynne jairlix moege(n)/ besaeyen een boend(er) met raepsaye maer ten lesten jae(r) sulle(n)/ de rintm(eeste)r en(de) de wynne dat half en(de) half deylen It(em) en sal/ de voirs(creven) wynne gheen stroe niet brande moege(n) te nieute bringe(n)/ noch en sal oic gheen vruchte(n) moege(n) v(er)copen van yemande and(er)s/ lande moege(n) and(er)s noch dese pechtinge yeman(de) voirts uutgeve(n)/ den voirs(creven) t(er)mijn due(re)nde sonder consent des voirs(creven) rintmeest(er)s/ It(em) sal de voirs(creven) wynne ten oexst naestcomen(de) hebbe(n) alle de/ vruchte(n) van coren(en) even(en) en(de) ande(re) opde voirs(creven) goede staen(de) en(de)/ dat t(er) estimacie(n) va(n) goede(n) ma(n)nen hen des verstaen(de) It(em) sal/ de voirs(creven) rintmeest(er) alle jae(r) sijne(n) voirs(creven) wynne geve(n) een tabbart/ laken It(em) heeft de voirs(creven) wynne bekint vande(n) voirs(creven) rintm(eeste)r/ in presten oft leeni(n)gen ontfange(n) te hebben(e) de p(ar)cheelen en(de)/ ten prijse alsoe die h(ier) na volgen(e) Te weten(e) yerst twee p(er)de(n)/ met dobbelen h(er)nassche ge[e]stimeert op achtien rijns gul(den) It(em) twee/ wagen(en) met hue(re)n toebehoirte(n) toexste en(de) te meste geestimeert/ op elff rijns gul(den) It(em) drie ploegen twee eeghden met/ huer(er) toebehoirte(n) gescat op drie rijns gul(den) ende ii vvercken(en)/ en(de) een soch gescat op drie rijns gul(den) van welke(n) leeni(n)ge(n)/ de so(m)me gedraeght xxxv rijns gul(den) te lx pl(a)c(ken) tstuc It(em) oft/ den voirs(creven) rintm(eeste)r dese vorw(er)den niet en geliefde(n) te acht(er)volgen/ sal hij d(aer) af sijne(n) rou moege(n) seggen bynne(n) xv dagen naest(comende) Ende/ alle dese vorw(er)den (et)c(etera) en(de) heeft voirt geloeft de vors(creven) wynne/ dat hij t(er) manisse(n) des vors(creven) rintmeest(er)s de(n) selve(n) rintm(eeste)r goede loflike/ caucie en(de) borchtochte setten sal voer scepen(en) va(n) lov(en) beyde voe(r)/ de voirs(creven) presten en(de) p(ri)ncipale pachtinge goetgenoech sijnde cor(am)/ boxhoe(re)n roelants julii iiii