Item robbert gheylart mathijs vanden kerchove henric vanden berghe/ en(de) jan lichtvoets scepen(en) lijsbetten ts(er)toghen weduwe cornielis wilen/ colvere in hue(re)n hoff ter wolfshaghen in yeghenwordicheiden der/ scepen(en) van loven(e) gestaen hebben openbairlic ghetuyght dat zij/ als scepen(en) der voirs(creven) lijsbetten dair bij en(de) over wa(r)en des omtrint
//
sint jansmesse baptisten lestleden een jair was dair eene/ wettighe deylinghe voir hen ghemaect was tusschen janne s(er)vaes/ ter eender robberde opden berch gertruyden servaes sijnen wijve/ suster des voirs(creven) jans woute(re)n roekeloes en(de) marien vanden/ s(er)vaes zijnen wijve zuster des vors(creven) jans en(de) g(er)truyden wettige/ kyndere wilen symoens servaes die hij hadde van heylwigen wilen/ veralijten sijnen wijve ter ander zijden vanden goeden die/ hen bleven en(de) v(er)storven zijn na en(de) vander doot dan hue(re)n/ voirs(creven) vader en(de) moeder in welcker deylinghen den voirs(creven)/ janne servaes vielen de goede hier na bescreven Te weten(e)/ yerst drie dachmale beemps gelegen inde prochie van nederijssche/ geheten proofstgoede ter plaetsen geheten wolfshaghe tusschen/ den goeden gheerts wilen mynnemoens in deen zijde ende/ willems vanden wayenberge ter ande(re) Item een half boend(er)/ beemps aldair gelegen opt tzoken tusschen den goeden des/ voirs(creven) willems ter eender en(de) jans vanden kerchove ter/ andere sijd(en) Item een dachmale beemps dair neven gelegen/ tusschen de goede meester peters van thielt ter eender sijden/ en(de) willems vanden wayenberghe ter [andere] Item een [half] dachmale beemps/ inde selve prochie gelegen inde bogartbeemde tusschen den/ goeden stevens lyekens in deen zijde en(de) de goede der erfge/ namen der weduwen wilen abeluys [in dander] Item een dachmale lants/ gelegen inde selve prochie ter plaetsen gheheten bogart delle/ tusschen woute(re)n cretsart in deen zijde en(de) janne arnts in dandere/ Item een half dachmale lants gelegen inde bogartdelle tusschen/ den goeden henricx de cock in deen zijde en(de) woute(re)n cretsarts in/ dandere Item een dachmale lants beemps gelegen ter wolfshage(n)/ tusschen den goeden he(re)n jans van sinte gorix ridd(er)s in deen zijde/ en(de) jans everarts op dander opden he(re)n chijs en(de) last/ ghelijc en(de) in alle der manie(re)n de voirs(creven) goede gelegen zijn t(er)/ plaetsen voirs(creven) luttel myn oft meer inder maten houden(de) opden/ he(re)n chijs en(de) last uuten voirs(creven) voirs(creven) goeden ghaende ten gewoenlike/ tijden te betalen uutghescheiden den co(m)mer van alsulken onder/ halven mudde corens d(er) maten van loven(e) erflijc als derfgename(n)/ gheerts wilen mynnemoens op e(n)nighe der goede voirs(creven) ende/ opde goede hier na bescreven die den voirs(creven) robberde g(er)truyd(en)/ sijnen wijve woute(re)n roekeloes en(de) marien zijnen wijve in deylinge(n)/ gevallen zijn die de selve robbert wouter en(de) hue(r) wijve vors(creven)
//
van hue(re)n goeden nabescreven hen in deylingen gevallen jairlix/ dragen en(de) betalen moeten en(de) de pande des vors(creven) jans s(er)vaes/ dair voir mede pant staende costeloes houden dwelc zij geloofden/ en(de) toeseiden tachtervolgen en(de) oic uutgescheiden een half/ mudde rox erflijc die in questie staen tusschen den p(ar)tien vors(creven)/ en(de) janne goederthoy dair af zij insgelix den vors(creven) janne s(er)vaes/ en(de) zijn goede als voir gelooftden tot eeuwegen dagen tont/ heffen Ite(m) was [in erf]vorwerden tusschen den voirs(creven) p(ar)tien oic ondersproken/ inden gevalle oft uuten vors(creven) dachmale beempts ter wolfshage(n)/ gelegen jairlix meer chijs ghinge dan ii(½) pl(a)c(ken) brabants erflijc/ die de kercke van huldenberghe d(air) op heeft dat dat meer/ de voirs(creven) robbert en(de) wouter met hue(re)n werdynnen tot eeuwege(n)/ dagen dragen zullen en(de) dair af den vors(creven) beempt ontheffen/ en(de) dat zij dat geloofden tachtervolgen Ende [dat] ter ander/ sijden zijn bleven en(de) vielen den voirs(creven) robbeerde woute(re)n/ en(de) hue(re)n werdynnen in huer(er) deylingen de goede hier na/ bescreven Inden yersten thuys en(de) hoff met allen den toebehorte(n)/ alsoet gelegen is ter wolfshagen inde prochie van nederijssche/ tusschen den goeden der vors(creven) weduwen coleners ter eender sijde(n)/ en(de) de strate gaende van nederijssche ter lanen weert [ter ande(re)] comen(de)/ achterweert tot aende goede jans kerremans Item een/ bloc lants houden(de) onderhalf dachmale gelegen aldair/ tusschen de strate gaen(de) te loven(e) weert en(de) den goeden des/ voirs(creven) jans kerremans en(de) stevens kymps Item een half/ boender lants gelegen aldair tusschen der voirs(creven) weduwe/ colveners in twee zijden en(de) den goeden des voirs(creven) he(re)n jans/ inde derde Item een boend(er) lants aldair gelegen tusschen den goed(en)/ des voirs(creven) he(re)n jans in deen zijde en(de) derfgenamen peters wilen/ borremans in dande(re) Item onderhalf dachmale lants gelegen/ op cleyn janshof tusschen den goeden des vors(creven) he(re)n jans in deen/ sijde en(de) der erfgenamen d(er) weduwen wilen abeluys ter ande(re)/ en(de) den reywech inde derde ghelijc en(de) in alle der manie(re)n/ de voirs(creven) goede gelegen zijn ter plaetsen voirs(creven) inder maten/ vors(creven) luttel myn oft meer houden(de) opden chijs en(de) last d(air)/ voir uutgaende ten ghewoenliken tijde te betalen Ende
//
vortaen opde voirs(creven) onderhalven mudde corens erflic aen/ derfgenamen gheerts wilen mynnemoen die zij tot eeuwege(n)/ daghen uut hue(re)n vors(creven) goeden dragen en(de) jairlix ghelden/ moeten ten behoirliken tijden en(de) de goede vors(creven) des jans/ d(air) af en(de) oic van alsulken halven mudde rox erflic als jan/ goederthoy opde vors(creven) goede p(re)tendert te hebben ontlasten/ dwelc de voirs(creven) robbert wouter en(de) hue(r) werdynnen alsoe/ voir hen en(de) hue(r) nacomelingen also geloofden te doene/ Thuygen(de) vort de vors(creven) scepen(en) dat de vors(creven) p(ar)tien na recht/ met allen solempniteiten elc op tghedeelte des [anders] behoirlic/ verthijdden en(de) geloofden de deylinge goet vast gestentich/ en(de) van weerden te houden en(de) elc den ande(re)n genoech te doen/ wair zij deen den ande(re)n te nauwe gedaen hadden also/ dat elcken van hen en(de) hue(re)n nacomelingen vast ende/ seker sal moeghen wesen welcke scepen(en) voirs(creven) alle/ en(de) yegewelcke daigen voirs(creven) in p(rese)ncien der scepen(en)/ van loven(e) bracht hebben tuygen(de) dat voir hen als recht/ geschiet was bidden(de) den [selven] scepen(en) van loven(e) dat zij dit/ over hen besegelen en(de) tuyghen wouden want zij gheene(n)/ gemeynen zeghel en hadden dwelc wij jans roelants/ en(de) willem tants scepen(en) van loven(e) ter eernstigher beden/ d(er) voirs(creven) scepen(en) gedaen hebben int jair ons he(re)n duysent/ vierhondert tween(de)tachtentich decembris vijff