Alsoe als ten v(er)sueke en(de) v(er)volghe joffr(ouwen) katlinen kerremans die/ met scepen(en) brieve(n) van loven(e) jaerlix heeft vijftich hollan(sche)/ gulden(en) hae(r) leefdaghe lang aen en(de) op de goede h(ier) na bescreve(n)/ die toe te behoren plaghen willem(me) wilen vanden borchove(n) en(de)/ joffr(ouwe) katlinen sijnd(er) sust(er) die nu besitten(de) es jan van berthem/ te vertrijcke te willebringe(n) te bout(er)shem te roesbeke en(de) daer/ omtrint gelegen gescreve(n) es geweest den meye(r) va(n) cumptich/ oft sijnen stedehoude(r) huer de selve goede soe v(er)re die ond(er)/ hem gelegen wa(r)en voer gebreck der voirs(creven) renten te leve(re)n/ en(de) te doen volghen Ende oft de voirs(creven) jan van berthem oft/ yemant and(er)s tegen de voirs(creven) scepen(en) brieve yet seggen oft/ allege(re)n wilde dat hij des op heden als ten naesten v(er)streken(en)/ daghe alhier quame voer meye(r) en(de) scepen(en) int recht gelijc/ de versuecbrieve dat voird(er) inhielden Ald(aer) de voirs(creven) jan va(n)/ berthem noch niemant van sijne(n) weghen comen en es ende/ de voirs(creven) joffr(ouwe) katline te rechte come(n) es trecht voirt v(er)sueken(de)/ doende oic blijkende certificacie en(de) resc(ri)pcie vande(n) voirs(creven)/ meye(r) dexecusie navolgen(de) den voirs(creven) v(er)sueke en(de) oic tdachbesceyde(n)/ bij hem geschiet te sijne Soe hebben de scepen(en) van lov(en)/ t(er) manessen smeyers gewijst voer een vo(n)nisse soe v(er)re der/ voirs(creven) joffr(ouwen) katline(n) wed(er)p(ar)tije niet en quame ten opstane smeyers/ en(de) van hen scepen(en) datmen haer vande(n) voirs(creven) goeden houden/ sal in haer(er) leveri(n)gen tot hae(re)n wettige(n) gebreke behoef alsoe v(er)re/ alst noch voer hen scepen(en) comen es cor(am) boxho(r)en lyefkenrode/ hoeven tybe febr(uarii) xxv
//
H(ier)na volgen de goede d(aer) voe(r) mencie afgemaect es/ Ierst eene(n) beempt gelegen te bout(er)shem tusschen de goede/ vand(er) came(ren) en(de) de rivie(r) ald(aer) It(em) eene(n) beempt gelegen/ te v(er)trijcke tusschen de goede jans vanden borchove(n) ende/ wouters de rademake(re) It(em) eene(n) beempt houden(de) een/ boend(er) gelegen int broec van vertrijcke tusschen de goede/ jans vanden borchove(n) en(de) wout(er)s de welde rademakers/ en(de) bijde strate aldaer It(em) eene(n) beempt gelegen ten oude(n)/ weghe tusschen de goede sjoncke(re)n van bout(er)shem en(de) de/ goede vander came(re)n