It(em) henrick van mansdale geheete(n) kelderma(n) t(er) eenre denijs de walsche/ geheete(n) van oudreghem t(er) ande(r) zijden zijn met malcande(re)n overcomen/ alse van ja(n)ne van oudreghe(m) brueder des voirs(creven) denijs die de voirs(creven)/ henrick aengenome(n) heeft zijn ambacht va(n) schilderie(n) te leeren(e) Ierst/ dat de voirs(creven) henrick de(n) selve(n) janne zijn ambacht van schilderie(n) wel/ en(de) getrouwelic leere(n) sal van alle(n) wercke tot schilderie(n) behoeven(de)/ eene(n) t(er)mijn van iii ja(r)en lang due(re)nde innegaen(de) en(de) uutgaen(de) sinte/ denijs dage en(de) dat hij daghelicx te wercke come(n) sal en(de) altoes/ te maeltijde thuys eete(n) gaen Des sulle(n) de voirs(creven) moeder ende/ heur kinde(re) den selve(n) henricke dair voe(r) gheve(n) neghen rijnsch g(uldenen)/ te lx pl(a)c(ken) tstuc eens de drie rijnsch gulden(en) d(air)af gereet twee/ dair af van desen daghe voirt over een jair en(de) alsoe totte(n) iii ja(r)en toe
//
behalve(n) oft e(n)nich van hen beide(n) aflivich worde bynne(n) middele(n) tijde dat/ yeghelijc alsdan ombegrepe(n) sal moege(n) afstaen nae advena(n)t vande(n)/ tijde En(de) oft de voirs(creven) jan bynne(n) middele(n) tijde sijne(n) meest(er) ontliepe/ soe soude de voirs(creven) somme gevalle(n) zijn behalven oft hij wed(er)quame/ dat alsdan de voirs(creven) zijn meest(er) hem sculdich soude zijn te vollee(re)n/ om tselve gelt En(de) oft henrick buyte(n) tooghe wercke(n) wair dat/ wa(r)e soe sal hij de(n) jonghe(n) met he(m) leyde(n) en(de) den cost hebben/ van henricke(n) Met condicie(n) voirt oft de voirs(creven) jan oic siech/ worde bynne(n) acht daghe(n) dat hij alsoe lange nae zijne(n) tijt leere(n)/ sal als hij verlet sal hebben Cor(am) hove tants octobr(is) xiii