It(em) jan thielens sone wijlen godevarts en(de) alijt h(er)mans zijn huysvr(ouwe) woenen(de) te beetze in p(rese)ncia heeft genome(n) tegen/ eerweerdige(n) vad(er) in gode hee(re)n janne van langrode p(re)laet/ des godshuys van vlierbeke thoff desselfs godsh(uys) geheete(n)/ thoff ter monct gelegen te beetze met seke(re)n stucke(n) ende/ p(ar)cheelen van lande(n) bee(m)pde(n) helicht wi(n)ning(en) int cleyn crae(n)broeck/ h(ier) nae volgend(de) alsoe daniel wijlen van mulstede die hier/ voirmaels gehouden heeft En(de) yerst thoof ter monct mette(n)/ huysen hoven bog(ar)den wouwe(re)n en(de) grechte(n) It(em) xxv boende(re)n/ en(de) xxxiiii roeden lants gelegen in diverse stucken It(em) xi/ dach(mael) beempts int legbroeck It(em) een boender beempts geheete(n)/ dlangboend(er) It(em) de helichtwinni(n)ge int cleyn craenbroeck/ It(em) een deel vande(n) legbroeck houden(de) omtrint vii dach(mael)/ It(em) noch vii boende(re)n eens driesch gelegen bij thoff It(em) noch/ een deel van eene(n) beempde geheete(n) kiekensbeempt gelijc/ dien daneel voirs(creven) nae zijnder pechtingen genome(n) hadde/ Te houden te hebben te wynnen van half merte lestlede(n)/ eene(n) t(er)mijn van sesse ja(r)en lang due(re)nde deen nae/ dande(r) sonder middel vervolgen(de) Elcx jairs dae(re)nbynne(n) om/ en(de) voe(r) half de vruchte(n) op de voirs(creven) goede wassen(de) en(de) de/ beempde(n) om en(de) voe(r) lxvi ryns gulden(en) te xx stuv(er)s nove mo(ne)[te]/ deen helicht d(aer) af s(in)[t] jansmisse en(de) dand(er) helicht te kersmisse/ te betalen en(de) altoes bynne(n) sesse weke(n) nae elcke(n) t(er)mijn o(n)begrepe(n)/ / volbetailt te sijne quol(ibe)t ass(ecutu)[m] It(em) sal de wyn gehoude(n) zijn/ m(ijns) voirs(creven) hee(re)n helicht vande(n) vruchte(n) voirs(creven) af te doen(e) en(de)/ inden bant te leve(re)n inder schue(re)n vue(re)n en(de) oick tassen sonder/ cost oft last m(ijns) hee(re)n voirs(creven) ende sal de wyn voirs(creven) m(ijns) hee(re)n/ coren met zijne(n) coerne inne vue(re)n te weten(e) dyerste voede(r)/ voir mijne(n) hee(re) en(de) dand(er) voede(r) voir hemselve(n) It(em) sal de/ wynne sculdich zijn m(ijns) hee(re)n coren te dyest te leve(re)n It(em) de voirs(creven)/ m(ijn) hee(r) sal sculdich zijn den voirs(creven) wynne te leenen(e) alsoe vele/ ghersten als de wynne nu behoeve(n) sal ten yersten ja(r)e te/ besayen(e) desgelijcx oick van wint(er)coren(e) It(em) de voirs(creven) wynne/ sal gehoude(n) zijn den voirs(creven) m(ijnen) hee(re) tvoirs(creven) saet coren bynnen/ den yersten ja(r)e weder geven en(de) te betalen(e) It(em) de voirs(creven)/ m(ijn) hee(r) sal den voirs(creven) wynne gehouden zijn te leenen(e) zijn/ broot coren tot den oegst toe te weten(e) thien mudde(n) rocx/ welcke thien mudden rocx hij oick bynne(n) den yerste(n) ja(r)e/ m(ijnen) hee(re) weder geven sal moeten oft m(ijnen) hee(re)n goeden moet hebbe(n)/ It(em) sal de voirs(creven) wyn sculdich zijn te laten(e) de landen vand(en)/ voirs(creven) hove in drie derden te weten(e) deen derdendeel/ met wint(er)coren(e) besayt dand(er) met some(re)n stoppelen en(de) tderde/ brake en(de) dair voe(r) sal m(ijn) hee(r) sculdich zijn den wynne te/ geven(e) xvi mudd(en) rogge(n) zoe verre de wynne voirs(creven) op de/ selve goeden niet en blijft nae zijnen t(er)mijn van vi ja(r)en/ en(de) oft hij d(aer) blijft sal mijn hee(r) vand(en) selve(n) xvi mudde(n) corens/ ongehouden zijn ende sal de wynne noch hebben boven des/ voirs(creven) is de p(ro)uffijte vand(er) dingerie(n) vand(en) hove It(em) oft den voirs(creven)/ m(ijnen) hee(r) beliefde te ty(m)me(re)n soe sal de voirs(creven) wyn gehoude(n) zijn/ tselve hout aen te halen(e) te weten(e) aen zijn hoff oft moelen(e)/ te beetse behalve(n) dat de wyn den affal dair af hebben/ sal It(em) oft soe gebuerde dat e(n)nich volck van orlogen/ den wy(n)ne ov(er)quame dair af sal m(ijn) hee(r) hem cortsel/ doen gelijck regenoten It(em) sal de wynne verdecken/ alle ja(r)e op de huysinge vanden voirs(creven) hove drie hondert/ walms It(em) sal oick sculdich zijn de selve wyn de/ huysingen te houden(e) vander onderste rijkelen nederweerts/ ende alsmen dair dect plect metst oft ty(m)mert va(n) oude(n)/ wercke soe sal de wynne de wercklude(n) den montcost/ geven den genen die tot den wercke behoe(re)n sullen/ en(de) mijn hee(re) sal de dachue(re)n betalen It(em) de wynne sal sculdich/ zijn den leem en(de) gereetscap tot den wercke voirs(creven) dienen(de)/ met zijne wagen(e) ende p(er)den halen des sal mijn hee(re) sculdich/ zijn de voirs(creven) huysen nu te levere(n) gerepareert ende de/ wyn sal die tot zijne(n) afscheyden(e) gerepareet laten It(em) sal m(ijn) hee(re)/ den wynne geven voir elcken man van zijne(n) lieden die hij in/ swins costen sette(n) sal eene(n) stuv(er) sdaigs It(em) de wyn sal gehoude(n)/ / zijn den voirs(creven) zijnen t(er)mijn due(re)nde de voirs(creven) landen te/ wynnen werve(n) en(de) te mesten wel en(de) loflijc op zij getijdige/ vo(r)en gelijc regenoten It(em) en sal de voirs(creven) wyn de voers(creven)/ landen tot zijne(n) drie lesten ja(r)en niet moegen hoervruchte(n)/ It(em) de voirs(creven) wyn en sal de voirs(creven) lande niet moegen voirt/ uutgeven mer selve die moeten houden ende tstroe d(aer)/ af comen(de) etten en(de) dat tot meste bringen ende dat/ voe(re)n op de voirs(creven) lande ten meesten prouffijte vanden/ selven landen It(em) sal de voirs(creven) wynne gehouden zijn/ alle ja(r)e te ov(er)mergelen twee boende(re)n vanden voirs(creven)/ landen It(em) sal de wynne de voirs(creven) beempden jairlijcx/ moeten doen ryolen en(de) de grechten doen vagen ende/ die onderhouden wel en(de) loflijck op zijnen cost Item/ sal de selve wynne de voirs(creven) beempde(n) moete(n) ond(er)houde(n)/ van breeme(n) doirne(n) en(de) mirhoopen en(de) die bynne(n) sijne(n)/ yersten drie ja(r)en doen uut roeden en(de) slichten op/ zijnen cost It(em) sal de voirs(creven) wynne jairlijcx moete(n)/ setten en(de) planten op de voirs(creven) goede(n) drie vive(n)twintich/ goeder cusbair williger poten en(de) die alsoe verwaren/ en(de) verdoirne(n) dat zij vande(n) beesten niet verdorve(n) en wordde(n)/ en(de) oft m(ijnen) hee(re) geliefde ald(aer) te setten e(n)nige alboemen/ pooten die sal de wynne oick moeten verdoirnen alsoe/ dat die vande(n) beesten niet verdorven en wordden It(em) sal/ de voirs(creven) wynne de wegen grechten en(de) straten gaen(de) om sine/ en(de) aen(de) voirs(creven) goeden moeten houden in goeden state/ op zijnen cost alsoe dat dair af gheen scade en come/ It(em) sal de wynne den voirs(creven) t(er)mijn due(re)nde de voirs(creven)/ huyse vande(n) voirs(creven) hove desgelijcx de wouwe(re)n/ boegarde(n) en(de) grechte(n) jairlijcx op zijne(n) cost wel ende/ loflijck moeten ond(er)houden en(de) die laten tot zijnen/ afscheyden(e) alsoe men hem die leve(re)n sal Item sal/ de wynne moete(n) inneheffen en(de) goet doen alle chijsen/ yngerien mestwagen(en) en(de) hee(r)lich(eiden) nae inhouden(e) vand(en)/ chijs boeken te beetse te etsvrijke? en(de) te halen en(de)/ die mijne(n) hee(re) alle ja(r)e ov(er)levere(n) en(de) volbetalen ten/ lanxsten te paesschen behalven der ingerien gelijck/ vo(r)e gespecificeert steet It(em) sal de voirs(creven) wynne/ gehouden zijn wel loflijc en(de) getrouwelijck te bedienen/ de meyerie des voirs(creven) godshuys ald(aer) en(de) van allet gene/ dat dair af compt van hee(r)lich(eiden) pontpe(n)ni(n)g(en) kue(re)n en(de) and(er)s/ m(ijnen) hee(re) voirs(creven) deugdelijcke rekeninge ende betalinge/ / jairlijcx moete(n) doen ende dair voe(r) sal hij hebben/ een tabbaert laken gelijck ande(re) des voirs(creven) godshuys/ meye(re)n It(em) en sal de voirs(creven) wyn niet moege(n) afhoude(n)/ oft stru(n)cken e(n)nich opgaen(de) hout It(em) sal de voirs(creven)/ wynne de voirs(creven) lande en(de) beempden moete(n) bevreden/ op zijnen cost sond(er) afslach van mijne(n) hee(re) te eysschen/ van ov(er)vluedich(eit) van wate(r) oft and(er)s des sal mijn/ hee(re) hem laten thout d(aer)toe dienen(de) behalven oft/ de ghete oft de middelste grecht van boven besteken/ wordde sal m(ijn) hee(re) de dachue(re)n dair af betalen Item/ sal de voirs(creven) wynne m(ijnen) voirs(creven) hee(re) ende de gene die/ mede comen sullen twee werve(n) tsjaers ontfangen op/ zijnen cost elcken male twee dagen en(de) twee nachte(n)/ en(de) oick ontfangen alle de gene die(n) van des godsh(uys) wege(n)/ d(aer) come(n) sullen tallen tijde(n) als dat gebue(re)n sal It(em) sal/ de voirs(creven) wynne hebben tscaerhout van twee boende(re)n/ boschs geheete(n) de corweye ende dair voe(r) sal hij der/ costerie(n) des voirs(creven) godshuys jairlijcx betalen vie(r) r(yns) guld(en)/ half s(in)[t] jansmisse en(de) half s(in)[t] m(er)tensmisse It(em) sal mijn hee(re)/ den wyn doen vie(r) coyen twee p(er)den twee ploegen en(de)/ eene(n) wagen dwelcme(n) sal scatte(n) ten prijse van goede/ ma(n)nen dwelc de voirs(creven) wyn gehouden sal zijn te/ betalen(e) en(de) te restitue(re)n bynne(n) drie ja(r)en naistcomen(de) En(de)/ alle dese vorweerden (et)c(etera) hove naus(nydere) ap(ri)lis xv