Item gord ende margriete voirscr(even) hebben geloeft onge/ sundert en(de) ongesceiden heer janne uuten hove dieme(n)/ heet zedele(re) den jonghen dat sij heynkene soen der/ voirs(creven) m(ar)grieten die sij hadde van janne wilen vanden
//
grate natuerlic soen jans vanden grate noch t(er)tijt ond(er)/ sinen mondegen dagen wesen(de) dat sij den selven/ bij hen houden zullen van eeten van drincken en(de) wael/ en(de) teemelic gecleedt tot dat hij tsinen mondeghen/ daghen comen sall sijn En(de) voort dat sij alle de/ schout des voirs(creven) jans wilen die hij sculd(ich) bleven/ es betalen en(de) tgheent datmen hem sculd(ich) bleven/ es ten naesten dat sij zullen connen inheffen zullen/ en(de) alle tgheen dat boven d(er) betal(inge) van des hij sculd(ich)/ moch wesen overbliven sall aen lijfpensie tot des/ voirs(creven) heynkens live leggen sullen daer inne sij/ gord en(de) m(ar)griete hue(r) heffen hebben zullen also langhe/ alst den voirs(creven) heynken genuecht bij hen te bliven en(de)/ niet lang(er) En(de) so wa(n)neer heynken van henlieden sceide(n)/ wilt oft sall so sullen sij den voirs(creven) heynken de voirs(creven)/ lijfpensie en(de) oec v schellinghe groete erfstsijs op/ de stat van thiene(n) ov(er)geve(n) en(de) vestigen inder bester/ vuegen dat dat sal mogen gescien cor(am) lomb(ar)t/ borch(oven) m(ar)tii xxvi